哥林多后书 1:1-1:2

注释:

一般来讲，第一到九章是hō͘人看做使徒保罗写hō͘哥林多教会ê第四封书信。使徒保罗写书信lóng有一个共同特色，就是先会自我绍介，然后请安，续落来就是o-ló，koh来就会讨论伊书信中想beh讲ê问题。其实，使徒保罗书写ê信件之模式，mā是当时流行ê一种书信格式。

使徒保罗一开始就说明家己是「奉上帝ê旨意作基督耶稣ê使徒」，这真清楚teh表明伊m̄是经过使徒会议票选出来ê「使徒」（参考使徒行传一：21—22）。Koh讲，伊表明家己就是「使徒」，chit-ê词ê意思是teh指「奉差遣」，这kah使徒行传第九章15节有关系。

Koh讲，chia真清楚表示伊写chit封信，是kah「提摩太」同齐联名写ê。提摩太是使徒保罗tī第二pái传福音ê时，tī路司得tú-tio̍h ê而拣选出来当伊ê助手ê，是一个人人o-ló ê少年人，老父是希腊人，老母是犹太人，使徒保罗亲自为伊行割礼（参考使徒行传十六：1—3），并当伊是「tī信仰上ê真kiáⁿ」（参考提摩太前书一：2），后来差派伊去哥林多教会访视该教会ê情形（参考哥林多前书十六：10）。因为án-ne，哥林多教会信徒lóng认bat提摩太，伊讲写chit张phoe，mā带tio̍h提摩太ê请安hō͘ in。

哥林多后书 1:3-1:11

注释:

Tī chit段经文中thang分做两个段落，一是第3到7节，二是第8到11节。Tī前段经文中，伊讲tī患难中得tio̍h安慰，tī后段经文中强调，虽然经历到患难，m̄-koh并无因为án-ne改变本来ê信心，却是koh khah坚定。

第3到7节，tī chia开始就讲「主耶稣基督ê父上帝」，chit种用词tī约翰福音非常清楚，耶稣一再称呼天顶ê上帝，就是伊ê老父，用「父子」来表明伊kah上帝之间有特别ê关系。Koh讲，chit位上帝mā是一切「安慰」ê来源，tī chit段经文中，使徒保罗共用了9次「安慰」chit-ê词，主要原因是哥林多教会已经受tio̍h真大ê迫害，chit种迫害是来自犹太教徒ê，后来甚至演变做罗马政府ê迫害。Á哥林多教会ê信徒到底是tú-tio̍h甚么患难（苦难）？真可能无亲像使徒保罗tī哥林多后书第十一章24到27节所讲ê hit种明显，属tī肉体ê问题，可能是teh指tī家庭á是家族中tú-tio̍h信仰差别上有ê冲突。因为án-ne，使徒保罗tī chia用「安慰」来鼓励众信徒tio̍h坚定信心。伊鼓励哥林多教会kah亚该亚所有ê信徒，tio̍h勇敢、坚强，因为耶稣mā kah大家同齐受苦。伊勉励大家彼此互相分担、安慰。

第8到11节，tī chit段经文中，使徒保罗提起tī亚细亚省（今á日ê土耳其境内）ê时chūn bat遭遇患难。这患难指ê是甚么？伊无讲清楚。Mā可能kah伊tī以弗所ê经验可能有关（参考前书十五：32、十六：9），mā有可能是使徒行传第十九章记载有关以弗所城发生暴动ê事件。伊讲hit种情况之危急已经到à「连生存ê希望都无了」，kah-ná是「被判死刑」仝款，tī chit种情况之下，siōng好ê方法就是祈祷，因为óa靠人ê气力是非常薄弱ê，只有「óa靠Hit位hō͘死人koh活ê上帝」，chit位全能者ê救助。伊劝勉哥林多教会信徒，面对苦难siōng好ê方法就是祈祷，伊mā希望大家mā为伊kah其他同工tī福音ê事工祈祷。

哥林多后书 1:12-1:24

注释:

使徒保罗Tī chit段经文中非常清楚kā哥林多教会ê信徒讲，所传hō͘ in ê福音信息是「真正」、「实在ê」，m̄是两头含（kâⁿ） ê。伊讲两个基本ê信仰认bat：1.上帝ê应允tī耶稣ê身上成就à。2.是因为耶稣，上帝ê圣神tī每一个信徒ê身上做记号。换句话讲，离开耶稣，就无得tio̍h上帝拯救ê希望。

第12到14节，使徒保罗知影哥林多教会内，有kóa假使徒（伊讲「超等使徒」）tī信徒中放话，讲使徒保罗不诚实，chit-má使徒保罗tī chia真清楚表示，伊是诚实地kā上帝赏赐ê恩典传达信息hō͘ in，而且所传讲ê chiah-ê lóng thang tī「主耶稣koh来ê日子」，hō͘哥林多教会ê信徒感觉夸耀。Chia所讲ê「主耶稣koh来ê日子」，意思是teh指审判ê日子来临ê时chūn， ē-tàng坦然面对，无惊惶。因为伊tī书信中所写，lóng是诚实语。

第15到18节，使徒保罗因为本来有计画beh去哥林多教会访问两pái，因为án-ne，tī第15节提起讲beh hō͘ in「加倍得tio̍h欣慰」，就是伊希望tī前往马其顿chìn前先去一pái，然后tī回程ê时，koh去一pái，án-ne前后有两pái访问。M̄-koh有人批评伊，讲伊ê计画不时改变，bē-tàng信。只是后来这计画有改变，伊是直接tùi以弗所来访，chit项事成做哥林多教会有人批评使徒保罗ê话柄，m̄-koh使徒保罗澄清chit种谣传，伊讲伊ê应允绝对是可靠，就亲像上帝是信实ê仝款。

第19到20节，tī chia使徒保罗特别提起kah伊同工传福音hō͘哥林多教会ê西拉、提摩太等，所传讲ê福音信息lóng是有上帝做保证。In既然传讲真实ê福音信息，表示in所讲mā一定是真实。因为诚实就是荣耀上帝ê方式。

第21到22节，chit两节非常重要，使徒保罗提起每一个信耶稣ê信徒，身上lóng有上帝ê灵同在，而且做印记。换句话讲，每一个信徒lóng一定tio̍h是诚实可靠ê人。因为身上有上帝ê记号，而这记号mā是将来审判ê时做为分别ê路用。换句话讲，若是无诚实，这记号就会雾雾无清起来，甚至消失，án-ne，就无法度成做「分别为圣」ê信徒。

第23到24节，tī chit两节伊清楚表明：上帝ē-tàng成做伊ê保证人，证明伊所讲是诚实ê。伊m̄去哥林多，是为tio̍h in好，因为hit时哥林多教会内部发生真chē争执，chiah-ê争执甚至牵扯到使徒保罗身上，因为án-ne，伊决定m̄去，有可能是无想beh hō͘状况因为伊在场而显得koh khah复杂。伊认为哥林多教会ê信徒应该tī信仰上已经成熟，必定会清楚判断是非曲直chiah-tio̍h。

哥林多后书 2:1-2:11

注释:

Tùi第一章13到14节，就thang看出使徒保罗写phoe hō͘哥林多教会，m̄-nā有所谴责，mā明确指出in中间有人tī教会中乱放话，伊希望该教会信徒ē-tàng明白伊写chit封信ê用心，beh hō͘ in知影除了基督耶稣无别ê福音thang信，伊深信该教会信徒对chit点是非常清楚。

可能是第一pái ê访问，发生bē爽快ê事。照哥林多后书第十二章14 节kah第十三章1节ê记载，使徒保罗bat三pái访问哥林多教会。因为án-ne，可能写chit张phoe ê时，已经是第二pái访问à。

第1到2节，tùi chit两节thang看出使徒保罗ê信，确实hō͘哥林多教会ê信徒澄清过去对使徒保罗ê误会。因为án-ne，使徒保罗表示下pái去访问哥林多教会ê时，bē koh再hō͘ in感觉艰苦心。

第3到4节，使徒保罗提起「hit张phoe」，而且讲是tī「忧伤痛苦中流真chē目屎」写ê信，m̄-koh咱确实真oh确认到底是toh一kóa phoe，是遗失了？á是teh指哥林多前书？

第5到8节，使徒保罗tī chia并无明确指出是甚么人hō͘伊kah哥林多教会信徒感觉烦心，有kóa圣经学者认为是kah哥林多前书第五章1节所提起ê hit件「乱伦」事件有关。M̄-koh mā有无仝ê看法，认为是hit群自称「真使徒」中ê领导者。Tī chia，使徒保罗清楚表示，伊无愿意hō͘ chit种人难堪，原因是大家已经知影是甚么人，而且已经谴责了chit种人，使徒保罗认为án-ne就有够。其实，这mā是伊处理哥林多教会纠纷ê方式之一。不过mā有可能chiah-ê造成哥林多教会纠纷ê人，已经hông驱逐离开教会，就m̄免koh再继续讨论。M̄-koh tùi第7到8节ê经文来看，有可能是chiah-ê人已经知影家己犯m̄-tio̍h去，使徒保罗希望哥林多教会众信徒会赦免chit种人，án-ne á是允准以hō͘ in有机会koh再tńg来过团契生活。

第9到11节，对hiah-ê造成教会纷扰ê人，使徒保罗基本上是尊重哥林多教会ê决定，in愿意赦免，伊就赦免。Siōng主要ê用意，就是希望教会内部ê纷扰ē-tàng早日平息落来。因为信仰团契siōng惊发生纠纷，而hō͘撒旦chhōe-tio̍h渗透ê机会，hō͘福音ê事工受tio̍h koh khah chē ê阻碍。

哥林多后书 2:12-2:17

注释:

使徒保罗Tī chit段经文提起耶稣救赎ê福音信息，对人ê性命是珍贵ê，因为án-ne，只要是接受耶稣做性命ê主，chit种人身上会散发出一股香气，hō͘人欢喜而欢喜接近。

第12到13节，「特罗亚」，这是设tī以弗所北面ê一个海口城市，mā是当时一个重要ê商业都市。照使徒行传第二十章7到13节ê记载，使徒保罗tī chiah-ê地方传福音ê时chūn，有一名叫iáu推古ê少年人，因为听使徒保罗讲道ê时chūn tuh-ku，tùi三楼窗口摔了落来死去，m̄-koh使徒保罗hō͘伊活起来。使徒保罗tī chia讲伊tī此城市有一个真好ê机会thang传福音，可惜ê是伊tī特罗亚无tú-tio̍h提多，hō͘伊无法度平静落来，因为án-ne，伊就离开特罗亚到马其顿去。Tī哥林多后书第七章5到7节讲使徒保罗tī马其顿iáu是无法度安定，一直等提多到了马其顿kah in会合，并且带来哥林多教会ê良好反应了后，使徒保罗chiah koh开始积极投入tī福音事工。

第14到16节，使徒保罗一向ê看法是：福音会hō͘人ê性命发出香气。因为án-ne，拒绝福音kah接纳福音，ē-sái性命散发出无仝ê气味。

第17节，这是非常重要ê一节经文。当时ê基督教会内，已经有人kā传福音当做「商品」teh贩卖，其实chit种人就是为tio̍h beh敛财。如果以今á日来讲，就ná亲像kā传福音事工当做是一种「职业」，为tio̍h是beh维持生活ê需要。M̄-koh，真正传福音ê工作不应该有chit种心态，因为福音是为tio̍h beh救人ê性命，就一定tio̍h有奉献性命ê态度，所讲ê献身使命感。

Koh讲，koh khah严重ê，就是kā福音「商品化」teh贩卖，这是非常不应该ê。换句话讲，使徒保罗强调福音是上帝白白赏赐hō͘人ê（参考罗马书三：24），耶稣就是beh他ê门徒白白得来ê，就beh白白hō͘别人（参考马太福音十：8）。

哥林多后书 3:1-3:6

注释:

Chit章，使徒保罗kā耶稣带来ê新约kah摩西ê旧约律法作ê对比，希望用chit种方式帮助哥林多教会信徒koh khah清楚知影，耶稣所带来ê救赎恩典，kah摩西律法所讲述ê是无仝款ê。使徒保罗会án-ne用心解释，是因为该教会中，有人一再强调旧约时代摩西律法ê功劳，soah疏忽耶稣ê救恩chiah是正确ê信仰。

使徒保罗Tī chit段经文中，用比较坚定ê口气teh讲述伊kah其他众同工tī福音事工上所做ê见证，ná亲像the̍h-tio̍h上帝ê「推荐书」一般，无法度随便。伊同时希望所有ê信徒lóng是án-ne ê态度，mā就是tùi家己身上hō͘人看tio̍h「上帝ê形像」。古早时，做一个人beh到一个生份ê团体去ê时，lóng会带tio̍h一封推荐信，写phoe ê人表示对chit-ê人ê言行举止负责，使徒保罗就bat tī伊ê书信中推荐过同工，亲像伊推荐坚革哩教会ê执事菲比hō͘罗马教会，请in接待伊，无论伊有甚么需要，就帮助伊（参考罗马书十六：1—2）。伊mā绍介提摩太hō͘哥林多ê教会，希望in帮助伊继续头前ê行程（参考哥林多前书十六：10—11）。Tùi chiah-ê thang看出推荐信，代表ê就是推荐者本身。

第1到3节，原来tī哥林多教会中有人teh讲使徒保罗无人替伊写推荐书，chiah-ê讲伊chit种话ê人，欢喜展宝手上有某某人ê推荐，好表示家己身分ê特别。M̄-koh使徒保罗tī chia讲哥林多教会ê信徒就是伊ê推荐书，chit种推荐书是写tī每一个信徒ê心内。

第4到6节，使徒保罗tī chia强调，伊传福音并m̄是凭tio̍h人ê才tiāu，却是上帝赏赐ê恩典，chit种恩典就是hō͘伊成做福音ê奴仆。而成做奴仆传达主人救恩ê信息，chit种福音事工是一种约定，而chit-ê约定是写tī心版上，m̄是写tī文册上。Chit种讲法真类似先知耶利米对当时以色列人民讲，表示上帝beh kah以色列人民立新ê约，chit种约是刻tī以色列人民ê心版上（参考耶利米书三十一：33），无koh是刻tī外面表ê记号。使徒保罗强调这是耶稣带hō͘每一个信靠伊ê人一种新ê性命记号，而伊就是chit种新记号ê传达者，只是一个奴仆ê身分，所以无甚么好夸耀ê。

哥林多后书 3:7-3:18

注释:

Tī chit段经文中，使徒保罗引用出埃及记第三十四章29到35节经文作叙述ê论点，说明tī耶稣内面，就是带tio̍h性命ê荣耀，kah摩西时代已经有真大ê差别。

第7到8节，使徒保罗并无否定上帝透过摩西颁布律法hō͘以色列人民ê重要性，而当摩西上西奈山顶去领受上帝律法ê时，是带tio̍h光彩落山来，m̄-koh chit种光彩已经被耶稣取代à。因为律法并bē-tàng带hō͘人新ê性命，是koh活ê耶稣带hō͘大家新ê性命，án-ne chiah是真正光彩kah荣耀。

第9到11节，tī chit段经文中，使徒保罗koh一pái强调，tī耶稣内面是一个全新ê约，chit-ê约是用上帝ê灵写tī人ê心中。因为án-ne，旧约是外在ê，新约则是内心ê。伊讲旧约ê亮光是出现tī摩西tùi山顶落来ê时chūn，带tio̍h上帝ê荣耀光芒，hō͘人无法度正视伊。M̄-koh，新约则tùi人ê心内产生新性命，hō͘人因为耶稣基督kah上帝有和好ê关系，性命永远是一个荣耀，因为是上帝ê灵tī人ê心内。使徒保罗认为应该以新ê「约」来取代旧ê时代所渐渐褪去ê光芒。

第12到18节，tī chit段经文中，使徒保罗引用出埃及记第三十四章33到35节ê背景，提起当时摩西是the̍h-tio̍h帕子遮家己ê面。Chia所讲ê「帕子」，thang tùi几个方面来了解：1.阻止人正确了解上帝语。2.它同时成做人kah上帝之间ê隔墙。chit-má，所有信耶稣ê人，不koh受摩西来ê chit种「帕子」阻隔，因为耶稣已经拆除了chit种隔阂ê布帘（参考希伯来书十：19—20）。而hō͘人ē-tàng除去这「帕子」来认bat耶稣救恩ê，就是上帝ê灵，mā就是圣神。圣神，chiah是改变人性命ê气力。

哥林多后书 4:1-4:6

注释:

这是真有意思ê一章，使徒保罗tī chia强调讲，人ê身躯会渐渐衰弱，m̄-koh，tī耶稣内面却是日日更新，所tú-tio̍h ê目nih-á痛苦，是为tio̍h beh迎接khah美好ê荣耀，这荣耀是永恒ê。

Tī哥林多后书第一章，tī使徒保罗讲tio̍h基督徒ê身上是带有基督耶稣ê「印记」，伊特别强调chit-ê「印记」是用圣神烙印tī人ê心内。然后伊tī第三章继续提起一个重要ê观念：基督徒就是siōng好ê福音推荐者。伊讲chit种推荐是写tī人ê心内，却m̄是用文字写tī纸上á是石版上ê。

为甚么使徒保罗会一再提起人ê心？原因就是伊认为一个基督徒，应该是tùi心ê革新开始，一个人如果心思意念bē改变，单有外在ê记号是无意义ê。这mā是为甚么伊teh写hō͘加拉太教会ê书信中，就强调讲：「有受割礼kah 无受割礼lóng 无要紧，要紧ê 是咱tio̍h 成做新创造ê 人。(全民版)」（加拉太书六：15）这mā是伊写hō͘哥林多教会所讲ê，人若tī基督里，就是一个新造ê人（参考哥林多后书五：17）。

Tī chit段经文中，使徒保罗强调福音ê本质就是耶稣，伊是性命ê救主。因为án-ne，任何传福音者，lóng是福音ê奴仆，而奴仆ê职分就是尽力去完成主人付托ê使命。

第1到2节，使徒保罗讲上帝kā chit项福音ê任务付托hō͘伊kah其他同工，伊ê职责就是beh hō͘这福音显耀出来，用实际ê行动来说明福音ê真理。第2节是真重要ê一节经文，使徒保罗提起传福音一定tio̍h有ê基本态度：放弃暧昧见笑ê事。Chia讲「暧昧见笑ê事」，伊特别指出两点：包括诡诈、曲解上帝ê话。所谓「诡诈」，意思是teh指无论tāi-chì好bái lóng敢做。而siōng严重êto̍h是「曲解上帝」，上帝原本是beh hō͘人ê性命得tio̍h滋润，是hō͘人ê性命活起来。

第3到6节，福音事工并无一定是会顺利，反tńg常受tio̍h阻碍，有人怀疑拒绝，有人接纳。Chiah-ê lóng是真正常ê事，m̄-koh重要ê是beh知影福音ê中心，就是「耶稣基督是主」，m̄是用人做中心，chit点tī使徒保罗到外邦地区传福音ê背景来看，确实是件真无容易ê事。因为tī he时chūn，罗马帝国ê国势非常强盛，罗马皇帝当teh积极推行神化皇帝ê运动，所有tī罗马帝国统治下殖民地ê人民，lóng一定tio̍h拜罗马皇帝，kā皇帝当做神敬拜。Mā就是讲罗马皇帝就是罗马帝国统治下属民ê「主」。而使徒保罗却是teh传「耶稣基督是主」，这就kah罗马政府ê政策相违背à。M̄-koh即使án-ne，使徒保罗iáu是仝款强调，创造万物ê主宰会hō͘忠实tī他ê子民看见亮光，因为会看见上帝ê荣耀藉tio̍h耶稣显明出来。

哥林多后书 4:7-4:15

注释:

Tī chit段经文中，使徒保罗用相对性句来说明：一个人是m̄是kah耶稣ê救恩连结，会带来完全无仝ê结果，mā就是性命kah死亡之间ê差别。

第7节，使徒保罗形容虽然传福音者有上帝ê荣耀，m̄-koh m̄-thang bē记得家己ná亲像一个「瓦器」仝款，无甚么特别价值。真正价值是tī瓦器内所装ê内容—福音ê信息。

第8到9节，chit两节是teh说明第7节ê意义。「瓦器」是hit种脆弱ê物件，m̄-koh却无被「压碎」；仝款ê，tī福音事工上tú-tio̍h真chē困难，m̄-koh都无被击倒，原因是：如果容易被phah倒，án-ne就m̄是真正福音，因为福音就是「上帝ê大能」（参考罗马书一：16），无任何力量ē-tàng phah倒上帝。Koh讲，传福音虽然有时会真孤单，m̄-koh m̄-thang bē记得，上帝一定会kah忠实tī他ê人同在。

第10到12节，使徒保罗讲每一个性命里lóng带tio̍h死亡，m̄-koh却tī耶稣内面得tio̍h性命。死亡，这是每一个人lóng一定tio̍h面对ê事实，因为有罪ê人，就是必朽ê人。M̄-koh tī耶稣内面有koh活ê ǹg望，而koh活带来ê就是性命ê ǹg望。因为án-ne，thang án-ne讲：基督教siōng大ê信息，就是koh活！

第13到15节，tùi chit段经文中看使徒保罗一生中siōng关心ê，就是ài怎样做chiah ē-tàng kā耶稣基督ê救恩传hō͘ koh khah chē ê人知影。伊心中所思、所想ê，就只有chit件事：怎样hō͘ koh khah chē人知影耶稣就是上帝差遣来到世间ê救主。伊确信所有传福音ê人，lóng会得tio̍h上帝赏赐ê恩典，就是kah耶稣同齐koh活。

哥林多后书 4:16-4:18

注释:

Tī使徒保罗ê看法里，只要ē-tàng传出福音，其他ê lóng m̄重要à。Tī第1节使徒保罗就经讲过「不灰心」，chit-má伊koh chiah koh讲了一pái，beh表明ê就是：即使有真chē困难，甚至身躯mā受tio̍h真chē折磨，m̄-koh he lóng bē阻止伊继续传扬福音ê决心，颠倒，伊是jú传性命jú感觉甘甜、有力，而且ná亲像ta̍k工得tio̍h新性命仝款。如果koh活是永恒ê性命大事，比起肉体受苦难chit种事，肉体ê苦难实在是chiok短暂。第18节是伊kui个信仰理念ê中心，伊认为基督徒应该kā信仰奠基tī永恒ê性命上，m̄是teh chhōe hit-ê目nih-á ê满足而已。因为án-ne，关心hit-ê看bē-tio̍h ê事物，mā是一种信心ê表现，而希伯来书第十一章1节án-ne讲：「信是所ǹg 望ê tāi-chì ê 凭据，是所未看tio̍h ê tāi-chì ê 确据。(全民版)」使徒保罗希望大家用「永恒ê性命」ê眼光来看性命问题；m̄是致意看会tio̍h ê，ài kā眼光放远，看tio̍h hit-ê属tī天顶ê奖赏chiah是正确ê（参考腓立比书三：14），因为天顶ê奖赏是永恒ê。

哥林多后书 5:1-5:10

注释:

Chit章是继续前一段经文（第四章16到18节）所提起有关永恒ê性命问题。

Tī chit段经文中，使徒保罗提供三个基本观念，一是人tī世间ê性命时间是目nih-á ê；二是每一个人lóng ài面对上帝ê审判；三是每一个躯体ê性命lóng会变化。

第1到5节，tī chit段经文中，使徒保罗用「地上ê帐棚」kah「天顶ê 住宅」做对比，解释第四章18节所讲ê「暂时ê」kah「永恒ê」之间ê无仝。「帐棚」，chit-ê词ê希腊文有两个字，一是「skene」，另外一字是「skenos」。Chit两个字ê字根lóng是「ska」，原意lóng是teh指「遮盖」。Tī chia，使徒保罗用ê是「skenos」chit-ê字，tī新约中只出现tī chit段经文两pái（第1 kah第4节），强调ê是「暂时ê遮盖」。换句话讲，使徒保罗是借用chit-ê「skenos」字，beh说明人ê身躯只是暂时kā人ê性命遮盖teh。Chit种「暂时性」ê遮盖物，随时thang tàn掉、更换。伊讲性命ná亲像一个搭「帐棚」khiā起ê人仝款，「帐棚」讲拆就拆，讲搬徒就搬徒。意思是tī世间ê性命是随时会发生变化，无安定，mā就无永恒thang讲。

另外一点，我讲过使徒保罗是受过非常深厚希腊教育ê人，对性命ê看法mā认为灵魂是「暂时」寄居tī身躯ê躯壳中，死ê时chūn，就会离开躯壳tńg来到天家，chit种看法是非常典型ê希腊思想。所以续落来下一句就是讲tio̍h一个信耶稣基督ê人，「上帝会hō͘咱天顶ê住宅」，tú好kah「地上ê帐棚」相对照；「帐棚」是人ê手所制造ê，ná亲像使徒保罗、亚居拉kah百基拉，lóng是制造帐棚ê人。M̄-koh相对ê「天顶ê 住宅」是上帝ê手所建造ê。 

使徒保罗讲每一个信耶稣ê人，ná亲像thǹg掉了世间ê重担，改穿天顶ê衫裤进入永恒ê性命中，享受tio̍h由上帝替人所准备ê天家。Chit种穿上新衫裤，mā是一种遮盖（mā表示除去ê意思）所有ê罪恶，hō͘人无koh有见笑ê感觉。而穿上新衫裤、天顶ê 住宅，lóng是上帝亲自替咱准备，并且以圣神替所有信耶稣ê人作担保（参考哥林多后书一：22）。

第6到10节，tī chit段经文中，使徒保罗提起人ê软弱，就是无法度克服罪teh左右人ê性命，结果hō͘人常常背离了上帝ê旨意，去行惹起上帝义愤ê事。因为án-ne，做一个人iáu活tī世间，chit种kah罪ê交战就会继续无停地发生。伊koh一pái提起真实ê信仰并m̄是凭眼见，却是凭信心，是有勇气情愿kah主同齐khiā起。第9到10节是非常重要ê经文；chit两节使徒保罗koh一pái强调每一个耶稣ê信徒，是beh取悦上帝，原因是人ài面对上帝ê审判，上帝会按照人所做ê一切进行审判kah报应。希伯来书ê作者mā án-ne讲：「所有ê 被造物，无一项ē-tàng 对上帝隐瞒；万物lóng 暴露tī他ê 目睭前；咱ê 行踏lóng tio̍h 对他交带清楚。(全民版)」（希伯来书四：13）无错，大家lóng一定tio̍h向上帝交出tī chit-ê世间一切所讲所行ê记录。

哥林多后书 5:11-5:21

注释:

Tī chit段经文中，使徒保罗讲tio̍h一个信耶稣ê人，应该有所改变，ná亲像一个重新创造出来ê人仝款。

第11到12节，使徒保罗对hiah-ê批评伊ê人ê回答真清楚，就是beh kā性命khǹg tī耶稣身上，因为性命之所以有ǹg望，是因为耶稣ê缘故。如果无耶稣ê救赎恩典，即使是活teh，mā是活tī罪恶ê痛苦中。因为án-ne，伊希望哥林多教会信徒会tī品格上成做福音ê见证者，án-ne，就ē-tàng挡teh hiah-ê只重视外表、虚假ê人ê口。

第13到15节，tī哥林多教会中，有人批评使徒保罗是「起siáu」，意思是teh指伊专讲hiah-ê 无实际话。其实，耶稣tī传福音ê时chūn，mā是hō͘人认为「起siáu」（参考马可福音三：21），犹太人领袖甚至公开讲伊是hō͘ 鬼王别西卜附身（参考马可福音三：22）。使徒保罗mā bat被罗马ê总督非斯都认为是「起siáu」，讲伊是学问大，hō͘伊「神经失常」（参考使徒行传廿六：24）。Chiah-ê lóng tī说明使徒保罗性命改变真大，大到众人无法度适应。原因是伊亲自遇tio̍h了koh活ê耶稣，体验tio̍h上帝对伊ê疼，hō͘伊愿意用性命所有ê气力投入福音ê事工。

第16到19节，chit段经文thang讲第五章ê经文中心，使徒保罗强调一个人若是信耶稣就是伊性命ê救主，就是新造ê人，无koh根据旧ê生活性命看世间ê tāi-chì物。M̄-koh ē-tàng hō͘一个人信耶稣就是救主，并m̄是人家己ê能力，却是上帝奇妙作为。使徒保罗án-ne讲，已经teh确定一个基本观念：一个人会信耶稣就是伊性命ê救主，这是出tī上帝ê拣选。为tio̍h是beh chit-ê信耶稣ê人，去见证福音，并hō͘人因为领受福音会得thang kah上帝和好。

第20到21节，使徒保罗讲伊是作「基督ê特使」，这「特使」一词tú好表示并无需要tùi一定ê程序推举出来。因为伊tī大马士革亲自遇tio̍h koh活ê耶稣，tùi án-ne伊讲家己当「使徒，m̄是因为人ê选召，mā m̄是受人ê委派，却是耶稣基督kah Hit位hō͘他tùi死里koh活ê父上帝指派ê」（参考加拉太书一：1）。M̄-koh chit种「特使」，并m̄是beh hō͘伊得tio̍h甚么特殊待遇，颠倒，tī福音事工上，伊比别人koh khah卖力地做好福音「奴仆」ê工作，为tio̍h福音ê缘故，使徒保罗差不多是到à忘我ê状态。为tio̍h见证福音，伊是尽一切性命ê气力。为tio̍h是beh希望ē-tàng帮助koh khah chē人藉tio̍h耶稣ê救恩，会得thang kah上帝和好。

哥林多后书 6:1-6:13

注释:

基督教信仰siōng中心ê主题就是「死而koh活」。如果离开chit-ê主题，基督教ê信仰就无甚么好讲ê à。而讲tio̍h「死而koh活」ê信息，就一定tio̍h tńg来到耶稣tī十字架上ê救赎功劳，ná亲像使徒保罗所强调ê，人只有tī koh活ê信仰内面，chiah会有「新造ê人」ê形像出现（参考哥林多后书五：17、以弗所书四：24）。无koh活ê性命，hit种ê性命是死ê，无甚么好期待ê，mā无甚么好ǹg望ê。因为hit种ê性命只有今生，而无未来。这就ná亲像使徒保罗所讲ê：「咱做基督徒ê ǹg 望若kan-taⁿ tī 现世，咱就是世间人中间siōng 可怜ê。(全民版)」（哥林多前书十五：19）耶稣讲：「我是koh 活kah 活命。信我ê 人虽然死去，iáu-koh 会活起来；(全民版)」（约翰福音十一：25）看，chiah-ni̍h大ê应允tī所有信耶稣ê人身上！

Tī第五章20节，使徒保罗讲咱藉tio̍h耶稣会得thang kah上帝和好，chit-má chit段经文继续án-ne强调，m̄-nā án-ne，伊一再表示若是有人kā chit种信息hō͘扭曲，he就是teh破坏福音ê信息。伊强调传耶稣koh活ê信息，是福音忠实ê奴仆该尽ê本分。

第1到2节，chit两节是继续第五章最后一段所讲ê，使徒保罗kā家己teh传福音工作上ê角色，看做ná亲像是「基督ê特使」仝款，而「特使」ê工作就是为tio̍h beh hō͘人kah上帝之间ê关系会得thang重新和好。使徒保罗讲ē-tàng参与chit项福音事工，就是「上帝ê同工」，因为án-ne，是极大ê恩典。其实，使徒保罗chit种话，mā已经teh kā哥林多教会ê信徒讲，in中间bat有人真骄傲地表示家己tī福音事工上传承toh一个人ê派别，是真好笑ê事，因为人无法度救人，只有上帝chiah ē-tàng救人ê性命。因为án-ne，传承自人ê派别无意义。因为tī救人性命ê事顶面，人所ē-tàng做ê实在真渺小、有限，除非有上帝ê恩典灌溉tī人ê性命里。第2节是引用以赛亚书第四十九章8节ê诗歌。这是上帝对他ê奴仆所讲，意思是：时刻一到，上帝拯救ê工作必定会实现。使徒保罗引用先知以赛亚ê诗歌，siōng主要是teh说明上帝ê拯救已经tī耶稣身上显明了，而且m̄-thang怀疑，chit-má就是。使徒保罗一再tī伊ê书信中劝勉信徒，信仰tio̍h把握ê时机，m̄-thang憢疑。因为无人会真正知影耶稣基督甚么时chūn临到。

第3到10节，tùi chit段经文ē-tàng看出使徒保罗tī福音事工上ê坚持kah用心。伊只有一个坚持：投入kui个性命tī传福音ê工作。因为án-ne，只要有妨碍福音ê事，伊就尽帆拚beh排除。相对ê，有人想beh用尽各种方法来阻止伊继续传福音，伊lóng会用坚强ê毅力忍受落来，这一切lóng是只为tio̍h福音ê缘故。如果kah上帝tī传福音ê事工同工就是一种恩典，án-ne，就该好好á珍惜chit份「恩典」。因为án-ne，使徒保罗tī chia提起传福音ê事工应该有两个基本ê态度：一是无愿意别人毁谤咱ê事奉。Chia所讲ê「毁谤」，就是chhōe缺点、错误，á是讥笑、讽刺ê意思。二是不妨碍别人。所谓「妨碍」，mā就是阻挡ê意思。如果福音是上帝极大ê恩典，he就是希望大家lóng有份享受得tio̍h，却m̄是单独自享。不妨碍别人，就是bē成做别人来接近福音ê绊脚石á是障碍。使徒保罗tī哥林多前书第九章19到23节中有真好ê描述，伊讲家己是一个自由人，为tio̍h beh hō͘ koh khah chē人来信耶稣基督，伊thang放落身段，对无仝对象，伊就扮演hit种ê对象，chiah-ê lóng只为tio̍h beh hō͘福音ē-tàng传出去，任何thang用ê方法lóng无放弃。

M̄-koh为tio̍h「无愿意别人毁谤」，「mā不妨碍别人」接受福音，使徒保罗Tī chit段经文中清楚说明伊亲自经历到身心ê痛苦，m̄-koh mā受tio̍h非常ê尊敬、o-ló。换句话讲，tī传福音ê过程中，必定会经历到真chē bē爽快ê经验，同时mā会tú-tio̍h真chē温馨、鼓舞ê感受。这mā是传道者m̄是beh当「烂好人」，而是beh成做一个真有原则ê福音工作者，hō͘ hiah-ê不守圣经教示ê人「讨厌」，m̄-koh却beh hō͘ hiah-ê努力学习圣经真理ê人有性命ê ǹg望，án-ne就对à。

第11到13节，tī chit-ê三节经文内底，thang看出使徒保罗对哥林多教会ê疼。一是伊是kā哥林多教会ê信徒当做知己ê朋友看待—推心置腹，甚至是ná亲像家己ê「kiáⁿ」一般。伊讲哥林多教会ê信徒就是伊tī基督耶稣内面ê kiáⁿ（参考哥林多前书四：14—15），这mā是teh表明伊对哥林多教会信徒有一份特殊ê「父子」关系。另外一方面，使徒保罗tī chia mā强调对哥林多教会信徒，伊是kā它当做ná亲像家己siōng「知己」ê朋友、siōng疼惜ê「kiáⁿ」hit种地亲密关系看待，毫无保留kā福音ê信息传hō͘ in。二是伊希望哥林多教会信徒用仝款ê态度回应伊。伊会án-ne要求in，是因为该教会信徒听tio̍h有人批评使徒保罗kah其他众同工ê工作，就对in产生冷淡ê态度，甚至mā加入了tī背后闲言闲语、散播不实谣言ê行列。使徒保罗讲in chit种心胸真狭窄，欠缺宽阔ê心胸。Chit点mā是使徒保罗感觉艰苦心ê所在，因为哥林多教会是伊kah亚居拉、百基拉chit对夫妻，以及西拉、提摩太投入全部时间开拓起来ê教会（参考使徒行传十八：1—8），甚至为tio̍h见证福音信息，iáu bat hō͘人告状到罗马总督迦流hia去。有án-ne患难ê经历tī in中间，mā应该对使徒保罗有够额ê认bat chiah-tio̍h。Ná亲像伊对哥林多教会信徒有非常ê信任，讲in就是伊siōng好ê「推荐书」仝款（参考哥林多后书三：2）。

哥林多后书 6:14-7:1

注释:

Chit段经文显然kah头前ê经文连连bē起来。Chit段经文比较像该连连tī哥林多前书第五章9到11节所提起ê「以前hō͘ lín ê信里」chit段了后。Tī该段经文中提起哥林多教会中有kóa人「自称做信徒」，m̄-koh却做出真chē连非信徒mā无法度接受ê行为。使徒保罗án-ne形容chiah-ê人ê恶质ê行为。Mā tùi chia，tī chit段经文中，使徒保罗teh探讨有关信徒kah未信者之间ê关系。Chia ê「m̄信」，应该以koh khah阔ê含意来看待。

第14到15节，chia讲「m̄-thang kah m̄信ê人同负一个枷担」chit句话，就是teh指顶面所讲chiah-ê「自称做信徒」，tī信仰生活上却是一再污秽上帝ê名ê人。因为chiah-ê所表现出来ê行为，明明是比无信ê人koh khah惨。Ná亲像使徒保罗对有kóa信徒「kah伊ê继母同居」仝款，比起「异教徒」iáu koh khah惨（参考哥林多前书五：1）。原因是chit种人口口声声讲上帝，而所表现出来ê就是心中根本无上帝。Kah chit种人是无法度同时tī福音事工上做见证ê。Ná亲像「基督kah魔鬼怎样ē-tàng协调neh」，是无可能ê事。

第16节，使徒保罗强调「咱是永远活ê上帝ê圣殿」，chit句话thang参考哥林多前书第三章16到17节、第六章19节等等。使徒保罗就是teh强调耶稣信徒ê身上是有上帝ê形像，因为án-ne，beh hō͘人tùi基督徒身上看tio̍h敬虔ê生活态度。「圣殿」是敬拜上帝ê所在，mā是kah上帝对话ê场所。

第17节，chit节是引用以赛亚书第五十二章11节，先知以赛亚ê诗歌teh提醒以色列人民kā tùi巴比伦帝国中得tio̍h tháu放tńg去家园，m̄-koh teh扛tńg来圣殿ê器物ê时，「m̄-thang tú-tio̍h无清气ê物件，离开ê时tio̍h保持洁净」，意思就是神圣ê物件一定会分别出来。使徒保罗引用chit种话句，主要mā是teh说明：基督徒一定tio̍h hō͘家己kah一般人无仝，hō͘人看tio̍h伊有明显ê新性命形像。

第18节，引用自撒母耳记下第七章14节，上帝答应大卫王beh成做所罗门王ê庇护者，ná亲像老父teh看顾kiáⁿ仝款地带领伊。Chit种「父子」关系之譬喻mā出现tī先知ê文献里，亲像：耶利米书第三章19节。路加福音第十五章11到32节，耶稣譬喻中有关「仁慈ê老父」，mā是kā上帝kah人之间ê关系，以「父子」关系做基础。

第七章1节，是chit段经文ê结论。使徒保罗就是beh强调：身为基督徒，就应该有圣洁ê观念，而且是身心lóng圣洁。这mā是伊写hō͘罗马教会书信中所讲ê：基督徒tio̍h亲像献hō͘上帝ê「活祭」仝款，是圣洁ê，kah chit世界有无仝，án-ne chiah ē-tàng得tio̍h上帝ê欢喜接纳（参考罗马书十二：1—2）。

哥林多后书 7:2-7:7

注释:

Chit章是用提多带tńg来哥林多教会好ê消息做主轴。Tī第二章12到13节bat提起使徒保罗因为等bē-tio̍h提多tńg来，心内非常担忧，因为án-ne离开特罗亚到马其顿去。M̄-koh到à马其顿后iáu是无遇tio̍h提多，心内iáu-koh不安。后来提多到了，带来哥林多教会信徒改变归正ê消息，这hō͘使徒保罗大大欣慰。

Tùi第二章13节有提起使徒保罗因为无tú-tio̍h提多而无清楚哥林多教会内部发生ê纷争带来ê结果，心内一直真无平安、操心。伊虽然前往马其顿，iáu是挂念tio̍h哥林多教会ê发展。后来tī马其顿kah提多相会，并且tùi提多听tio̍h真chē关系哥林多教会好款待提多ê事，以及为tio̍h顶pái使徒保罗写ê书信中所提ê各种问题，该教会ê信徒mā「恳切地地」为使徒保罗ê善意辩护，iáu渴望见tio̍h使徒保罗，为tio̍h chiah-ê消息，伊感觉非常安慰kah鼓舞。Mā因为án-ne，使徒保罗chit-má感觉安慰ê是，哥林多教会显然有改变。改变，其实这原本就是使徒保罗写此书信ê主要目的。

第2到4节，tī第六章12到13节，使徒保罗bat讲哥林多教会信徒是「心胸狭窄」，伊劝in tio̍h「宽宏大量」。chit-má则继续ài in「以宽大ê胸怀容纳」使徒保罗kah伊ê同工。为甚么使徒保罗会án-ne讲？应该kah第2节有关：一是使徒保罗讲「阮无做过失礼人ê事」，chit句话反映出当时哥林多教会内有人teh传言，讲使徒保罗有做hō͘哥林多教会信徒感觉见笑ê事。伊kā哥林多教会ê信徒讲，上帝thang为伊做证，如果伊有欺骗in ê所在，愿上帝惩罚伊（参考哥林多后书一：23）。二是使徒保罗提起伊「无破坏甚么人，mā无占过甚么人ê sio̍k」。这可能kah tī哥林多教会内，有人传说使徒保罗伊贪财骗钱有关。使徒保罗tī各地传福音，lóng希望外邦ê教会ē-tàng捐钱帮助tī耶路撒冷教会贫困信徒ê需要。伊mā是án-ne写phoe kā哥林多教会ê信徒讲，甚至希望in tī每一个礼拜ê聚会ê时，lóng ē-tàng「每七日ê 头一日，lín ta̍k 人tio̍h 照家己ê 收入拨一kóa 钱起来khǹg，免得我去lín hia ê 时chiah 开始募款。(全民版)」（哥林多前书十六：2）。Chit种用心却被误解为贪财、骗钱，tùi án-ne，使徒保罗就真不细jī地为chit种传言辩护，讲出工人得tio̍h工钱是应该ê，何况伊都无the̍h哥林多教会任何一分报酬」（参考哥林多前书九：4—7）。

Tī chit段经文中，使徒保罗进一步说明伊对哥林多教会众信徒ê疼，以及kah in是「同生共死」，「绝对信任」。Ài beh特别注意ê是，使徒保罗tī chia ê希腊文是先讲「同死」，然后chiah讲「同生」。特别注意chit句话，是因为tī基督教信仰里，所强调ê是：先有同死，chiah有同生（koh活）。伊写hō͘罗马教会ê书信中，就强调基督徒是kah基督同生、同死（参考罗马书六：5、8）。同死、同生，ē-sái讲是爱情siōng koân ê境界，mā是用来描述双方ê性命亲密地结合做伙ê意思。

第5到7节，chit段经文thang续接第二章12到13节ê经文。Tī该段经文中，使徒保罗讲tī特罗亚因无tú-tio̍h提多而心内不安，就án-ne先离开特罗亚到马其顿去。M̄-koh一直等bē-tio̍h提多ê消息，心内iáu是放心不下。因为m̄知提多受伊之托到哥林多教会访问ê结果án怎。伊之所以担心，kah顶pái亲自去访问ê时chūn，经验到无好ê感受有关（参考二：1、5—11），因为án-ne，chit pái差派提多代表伊去（参考十二：18），mā担心会遇tio̍h ná亲像家己ê经验仝款。第6节ê「hit位鼓励灰心丧志ê人ê上帝」chit句话中ê「灰心丧志」，是teh指「心内谦卑」ê意思。这mā说明使徒保罗有软弱ê一面，伊一方面差派提多去访问哥林多教会，soah koh担忧提多ê安危到无法度静下心来工作，kah伊原本hit种坚强ê意志力无jōa仝款。M̄-koh就tī伊担忧提多ê时chūn，上帝hō͘他ê奴仆使徒保罗siōng好ê礼物，就是hō͘伊所挂虑ê提多平安到马其顿kah伊会合。而且tùi第7节thang看tio̍h提多带hō͘使徒保罗非常欣慰ê消息。

哥林多后书 7:8-7:16

注释:

Tùi chit段经文thang看tio̍h使徒保罗之所以感觉安慰，是因为哥林多教会看了伊ê信了后，确实有改变，而chit种改变mā是原本使徒保罗写chit张phoe ê主要目的。会改变哥林多教会，主要原因就是tī第14节所讲ê，使徒保罗一向「讲实在话」，chit点非常重要。使徒保罗一再劝导外邦教会ê信徒，m̄-nā讲话tio̍h「诚实」（参考以弗所书四：15），而且teh做事顶面mā tio̍h「真心诚意」（参考罗马书十二：9，歌罗西书三：22）。

第8到9节，chia使徒保罗提起以前写过一封信，hit封hō͘哥林多教会信徒「心内艰苦心」ê信，mā是hō͘ in「忧愁」ê信，到底是toh一封？是哥林多前书mah？á是iáu有其他ê书信？Chit点一直无koh khah明确ê答案。一般认为，使徒保罗写hō͘哥林多教会ê书信是有kúi-nā封，bē只有「前书」kah「后书」两封而已。可惜ê是chit-má已经m̄知chit封hō͘哥林多教会信徒「心内艰苦心」、「忧愁」ê信tī tó位，内面写ê是甚么内容。不过，thang了解hit张phoe内容ê用词一定是严厉ê谴责kah指正，因为chit种信chiah会hō͘读ê人「心内艰苦心」kah「忧愁」。

第10到11节，使徒保罗用「上帝用忧愁改变人心，hō͘人得救」kah「属世ê忧愁会hō͘人死亡」做对比；前者表示人明白上帝ê疼，知影家己所犯ê 错误，tùi án-ne心内沈痛，并且积极采取悔改ê动作。后者所讲ê「属世ê忧愁」，是teh指「烦恼」ê意思。Mā就是一个人知影家己做m̄-tio̍h去，却无想beh悔改、认罪，只teh想怎样kā chiah-ê 错误遮掩起来，á是一再烦恼惊hō͘人发见。Á是想出所有ê办法为家己ê 错误辩解。Chit种态度m̄-nā对人ê性命无利益，颠倒，只会hō͘人陷入欺骗、讲白贼ê陷阱里，而且会jú陷jú深。

第12到16节，使徒保罗Tī chit段经文中说明伊写hit封hō͘哥林多教会信徒「心内艰苦心」、「忧愁」ê信，主要ê目的是甚么。伊表明并m̄是为tio̍h hiah-ê 错误 ê人写ê，却是为tio̍h beh明白伊kah哥林多教会信徒之间ê亲密关系，到底是m̄是有变？如果chit种亲密关系已经无koh，就算使徒保罗所用ê文句真细jī，mā是仝款bē有烧热烈ê反应。taⁿtùi提多带tńg来ê讯息是肯定ê，hō͘伊知影彼此之间ê关系并无破坏。伊beh hō͘哥林多教会ê信徒知影：tī伊ê心目中，哥林多教会一直是真优秀ê一间教会，所以，伊讲对in真有信心，thang「完全信任」in。Tī chit段经文中，使徒保罗提起提多带tńg来ê哥林多教会两点hō͘伊非常安慰ê事：一是in听从了使徒保罗ê劝勉。二是in真热情而且真实地接待提多，无因为有人毁谤使徒保罗而hō͘ in对伊ê态度冷淡落来。这mā说明哥林多教会ê信徒ná亲像使徒保罗对in仝款，in对使徒保罗是绝对信任。

哥林多后书 8:1-8:15

注释:

这两章lóng是谈起有关为耶路撒冷教会困苦ê信徒筹募捐款ê事。Tī当时，耶路撒冷教会是siōng早ê一间教会，就ná亲像使徒保罗所讲ê：「这是in 欢喜做ê tāi-chì，其实mā 是in所欠ê 债。因为既然犹太信徒有kah 外邦人做伙分享in 属灵ê 福气，外邦ê 信徒mā tio̍h 应该tī 物质上kā in 帮助。(全民版)」（罗马书十五：27b）伊kā捐助耶路撒冷教会sàn-chhiah信徒chit件事，看做是一种「彼此分享」ê信仰行为。伊hō͘以弗所教会长老ê最后赠言有chit种话讲：「我tī各种事顶面hō͘ lín留落来模样，kā你讲们应该án-ne勤劳工作来帮助软弱ê人。Tio̍h会记得主耶稣亲自讲过ê话：「『Hō͘ 人 ê，比领受 ê khah 有福气。」』(全民版)（使徒行传二十：35）

Tī前一pái hō͘哥林多教会ê书信中，伊bat建议过in án-ne做：「关系募款帮助信徒ê tāi-chì，lín mā tio̍h 照我以前吩咐加拉太hiah-ê 教会ê 办法去做。每七日ê 头一日，lín ta̍k 人tio̍h 照家己ê 收入拨一kóa 钱起来khǹg，免得我去lín hia ê 时chiah 开始募款。(全民版)」（哥林多前书十六：1—2）所谓「吩咐加拉太各教会ê办法」，thang参考加拉太书第二章10节所提起ê，tio̍h「会记得犹太人中sàn-chhiah人ê需要」chit句话，使徒保罗讲这是当时耶路撒冷教会众使徒同意派伊去到外邦地区传福音ê时，hō͘伊ê一个责任，使徒保罗一直kā chit-ê tāi-chì挂念tī心中。以后，使徒保罗无论gōa chē传福音，一直lóng记念耶路撒冷教会贫困ê兄姊之生活需要。有关chit件赈济ê tāi-chì可能kah使徒行传tī主后第44年到46年犹太地区发生ê大饥荒有关（参考使徒行传十一：27—30），mā有可能是因为当时耶路撒冷教会tú-tio̍h极大ê迫害所致（参考使徒行传八：1—3）。

为甚么使徒保罗会对哥林多教会一再提起有关救济耶路撒冷教会ê问题？并且ài in tī每pái聚会ê时chūn，lóng能事先准备好，「每七日ê 头一日，lín ta̍k 人tio̍h 照家己ê 收入拨一kóa 钱起来khǹg，免得我去lín hia ê 时chiah 开始募款。(全民版)」（哥林多前书十六：2）这一定是伊早tī第一pái到哥林多开拓教会ê时，就已经提起过chit件事，而且已经开始teh进行à。因为伊对亚该亚ê信徒提起哥林多教会信徒tī chit件事顶面ê热心，引起亚该亚ê信徒烧热烈ê反应，跟tòe学习（参考哥林多后书九：2—3）。M̄知是甚么原因致使原本是siōng早回应使徒保罗chit项呼吁ê哥林多教会，tī chit-ê项事工上ê回应忽然冷淡á是疏忽了落来，就án-ne使徒保罗就用比较积极ê语气kah态度来鼓励in，除了tī第九章提起亚该亚教会ê信徒向in学习之外，mā清楚kā in讲，希望in kah早准备好预定beh捐款ê钱。

第1到7节，tī chit段经文中，使徒保罗看起来是teh鼓励哥林多教会为sàn-chhiah人ê需要捐款救助，m̄-koh却是对马其顿教会ê信徒赞誉有加。讲马其顿教会ê信徒是「tī极大ê贫困中犹原慷慨捐助」，而且in是慷慨到「竭尽所ē-tàng ê，甚至是超过了in ê气力」（第2到3节）这表示马其顿教会确实是有照使徒保罗ê教导去做，当然使徒保罗án-ne讲，mā是期待哥林多教会ē-tàng学习马其顿教会ê信徒，仝款积极济助贫困者。

马其顿ê教会，是包括腓立比kah帖撒罗尼迦教会，另外在庇哩亚mā有基督徒聚会（参考使徒行传二十：4）。Chiah-ê lóng m̄是真强壮ê教会，m̄-koh却tī疼心ê表现上有美好ê见证。使徒保罗特别提起马其顿ê教会经历「患难」，而且「受tio̍h严重ê考验」，这thang tùi腓立比书第一章29节，以及帖撒罗尼迦前书第一章6节、第二章14节、第三章3节等等处经文看tio̍h。虽然无详细叙述受迫害ê内容，不过却thang知影chit地区ê教会已经tú-tio̍h信仰考验。Tī使徒行传第十六到十七章则记载使徒保罗因为tī腓立比、帖撒罗尼迦、庇哩亚等地方传福音ê时，受tio̍h牢狱kah威胁之灾，m̄-koh siōng重要ê是：即使tī hiah-ni̍h恶质ê情况下，chiah-ê教会ê信徒iáu是充满tio̍h信心、喜乐。Mā因为án-ne，马其顿教会ê信徒是心甘情愿主动beh参与济助耶路撒冷教会贫困信徒ê需要。而in家己并m̄是真富裕，甚至本身mā真贫困，m̄-koh却愿意伸出援手参与，chit点hō͘使徒保罗深受感动。如果贫困ê马其顿地区教会信徒ē-tàng án-ne做，án-ne，比in koh khah富裕、koh khah有信心、口才、知识等等ê哥林多教会应该有khah美好ê见证chiah-tio̍h。这就是使徒保罗以马其顿教会信徒ê见证teh鼓舞、激励哥林多教会ê原因。

第6节，chit节提起使徒保罗写chit封书信是托提多带到哥林多教会去，并且协助in完成chit件已经超过一年ê救助工作。使徒保罗称chit件救助ê工作，乃是一件「善事」。

第8到9节，使徒保罗无想beh定甚么规则来进行chit项救助ê工作，因为若m̄是出tī心甘情愿ê举动，就bē有jōa大ê意义。伊以耶稣hō͘家己变做「sàn-chhiah」，就是beh hō͘信伊ê人ê性命变成富足。这mā是使徒保罗写hō͘腓立比教会书信中所提起ê，有耶稣，就是拥有一切，过去看做富足，lóng kā它看做有亏损（参考腓立比书三：7—8）。Tī chia ê「sàn-chhiah」kah「富足」，lóng m̄是指物质、财富上ê，却是指上帝ê救恩之层面讲ê。

第10到12节，tùi chit段经文thang看出chit项捐款济助耶路撒冷教会贫困信徒之需要，tī哥林多教会已经进行一年ê时间了，显然iáu无完成。使徒保罗kā哥林多教会ê兄姊讲，如成（chiâⁿ）实有疼心，án-ne就应该用实际ê行动来表示，而且是会主动。使徒保罗相信in是一间thang有真好见证ê教会，因为án-ne，伊对chit种教会kan-taⁿ想beh强调一点：tio̍h坚持kā chit项事工用实际ê行动kā疼实践出来。伊提醒in，只要是真心ê捐助，lóng会成做上帝欢喜接纳ê果子。

第13到15节，chit段经文讲出基督教信仰siōng珍贵ê内涵之一，就是分享。这是分享siōng好ê方法，就是彼此互相帮助开始，而这mā是减少负担siōng好ê方式。使徒保罗kā哥林多教会ê信徒讲，当家己富足ê时chūn，会帮助hiah-ê欠缺ê人，而等到家己有需要ê时，hiah-ê接受帮助ê人若是已经富足，in自然会回报过来。使徒保罗mā tī chia提醒哥林多教会信徒，无人会永远富足，mā bē有人永远sàn-chhiah，因为人ê环境会改变。因为án-ne，chit-má富足ê人就应该会想tio̍h欠缺ê人，因为m̄知家己甚么时chūn会有欠缺。

第15节是引用旧约出埃及记第十六章18节ê资料，mā是以色列人出埃及tī旷野ê经验。Hit时，in tī旷野拾拾吗哪，上帝ài摩西kā以色列人民讲，只拾所需要ê量就ē-tàngà。M̄-koh以色列人民中间有人因为贪心，拾拾siuⁿ chē，结果拾多ê人，并无留落来甚么，拾少ê人，mā无任何欠缺，大家lóng仝款够额。贪心，是败坏一个社会、团体siōng快ê酵母，贪心，mā teh表示对上帝无信心。知足，表示知影上帝会赏赐，mā teh表示对上帝有够额ê信心。知足是建造一个和谐团契生活ê主要因素。

哥林多后书 8:16-8:24

注释:

Tī chit段经文中，使徒保罗提起kā怎样管理这笔信徒捐款ê事宜，伊特别提起有三个人会到哥林多教会去协助料理chit件捐款ê事。第一个提起ê就是提多；tī第七章6到7节有记载提多kah哥林多教会、使徒保罗等之间ê互动关系。提多，伊是希腊人，是使徒保罗ê门徒。虽然跟tòe使徒保罗传福音，m̄-koh并无被要求接受割礼（参考加拉太书二：3）。使徒保罗看伊ná亲像是信仰上ê「真kiáⁿ」（参考提多书一：4）。主后49年召开ê耶路撒冷使徒会议，使徒保罗kah巴拿巴同行参加，提多mā随行（参考加拉太书二：1）。伊确实是使徒保罗所倚重ê学生，有两pái受派到哥林多教会去处理该教会发生ê问题，第一pái是去处理该教会纷争ê事（参考哥林多后书七：6），第二pái就是chit-má所读chit段经文提起ê，有关捐款救济耶路撒冷教会ê事。后来，使徒保罗mā派伊去克里特岛，除了传福音，mā ài tīhi̍t 所在设立长老协助管理教会ê事工（参考提多书一：5）。使徒保罗会派伊去哥林多教会，是thang理解ê，因为该教会ê信徒会服从提多ê教导（参考七：15）。伊mā真欢喜担任án-ne工作。

第16到19节，tī第18节、第22节讲另外koh各派一位兄弟kah提加一chhut去。Chit两位兄弟是甚么人，chia并无明讲，只有讲其中一位是「tī传福音ê工作上为各地教会所尊重」，另外一位是「经过kúi-nā pái ê考验」，是一位真热心帮助别人ê人。有kóa圣经学者认为in是路加kah巴拿巴，不过并bē-tàng确定。M̄-koh有一个可能，就是in kah哥林多教会ê信徒lóng真熟，无需要siuⁿ加绍介。另外一个可能是：in已经跟tòe提多到哥林多教会了，当in读tio̍h提真chē所在带去ê chit封信ê时，chit两个人已经出现tī in面前，就kah in认batà。

第20到21节，chit两节thang看出使徒保罗为甚么beh chiah-ni̍h费神来处理信徒捐救济款ê事，就是为tio̍h beh避免引起不必要ê误会（嫌东嫌西）。原本哥林多教会内就有人teh谣传讲使徒保罗可能kā信徒捐救济款挪为私用。使徒保罗后来tī第十一章做真清楚辩护。因为捐款ê数目真chē，如果无小心，真可能会引起koh khah大ê纠纷。因为án-ne，单靠使徒保罗一个人，真容易出差错，伊需要一kóa有公信力ê人来担当chit项工作。Koh讲，第21节使徒保罗提起有关对财务ê事，伊特别是关心耶路撒冷教会穷困信徒ê需要，讲chit件事m̄-nā tī上帝面前tio̍h清楚，tī人面前mā tio̍h清楚。伊m̄是讲只要对上帝交带得过就好，却是tī上帝kah人面前lóng一定tio̍h kā捐款ê事交带清楚，伊讲这是一件「善事」。「善事」，chit-ê字tī希腊文是「kala」，意思是teh指尊贵、可敬。Tī中文《和合本》圣经是用「光明ê事」，天主教《思高圣经版本》用「美名」，《台语版》用「图谋好事」。Thang án-ne了解：办理财务ê工作，是一件非常「可敬」ê事，mā是「尊贵」ê事。只有一个条件：认真、忠实地办理，就会得tio̍h尊敬。因为tī财务上忠实ê人，mā是thang信任ê人。

第22到24节，chit段经文koh一pái提起两名兄弟kah提多同行，主要是去帮忙哥林多教会捐助款项ê事。虽然无提起名，m̄-koh thang知影in lóng是使徒保罗所信任kah重视ê同工。

哥林多后书 9:1-9:9

注释:

Chit章记载使徒保罗用鼓励teh勉励哥林多教会ê信徒。伊引用马其顿教会信徒teh赈济sàn-chhiah信徒ê好事做例（参考八：1—5）。Tùi chit章thang看tio̍h伊对马其顿教会信徒劝勉ê时，是用哥林多教会信徒ê疼心为例，然后，chit-má伊写hō͘哥林多教会ê信中，提醒in别hō͘马其顿教会ê信徒发见哥林多教会并无亲像使徒保罗所o-ló ê（参考第3到4节），这实在是真有趣味ê一幅画面。看起来，哥林多教会「kah-ná」比马其顿教会tī财力上ê能力koh khah好，应该ài有koh khah好ê见证chiah-tio̍h。

使徒保罗Tī chit段经文中先肯定哥林多教会，讲in m̄免伊hō͘ in甚么教导，mā知影会怎样做好chit件济助贫困ê耶路撒冷教会信徒ê tāi-chì。伊只希望哥林多教会记tiâu一件事：马其顿教会信徒是tùi in学习chit件善事，因为án-ne，in应该有koh khah好ê表现，原因是in tī各方面ê能力lóng比马其顿教会ê条件好真chē。M̄-koh伊mā提醒in，一定tio̍h是心甘情愿地捐助，却m̄是出tī勉强。

第1节，提起有关接济耶路撒冷教会犹太信徒ê事，伊tī chia讲「m̄免kā lín写phoe」，原因是tī哥林多前书第十六章1到4节就bat提过关系接济耶路撒冷教会ê需要，chit-má如果koh再提tio̍h怎样办，真容易hō͘哥林多教会ê信徒认为使徒保罗对in无够信任。而tī哥林多后书第七章伊bat一再表示对哥林多教会信徒是「绝对信任」（参考七：4、16），因为án-ne，伊相信in会明白，mā知影该怎样配合使徒保罗ê计划chiah-tio̍h。

第2到4节，提起哥林多教会准备ài接济耶路撒冷教会ê信徒ê tāi-chì，是tùi「旧年」就开始ê。Chia并无讲是tī「旧年」ê甚么时chūn，使徒保罗是提醒in，既然早就已经准备ài做ê事，chit-má应该有成果，这就是第4节所讲ê，如果是早tī「旧年」就讲ài做ê事，到chit-má lóng iáu未动静，而使徒保罗却一再对马其顿教会ê信徒夸耀讲in真早就有反应，án-ne就会hō͘别人认为使徒保罗讲白贼，mā会hō͘哥林多教会tī众人面前感觉惭愧。

第5节，chia所讲ê「几位兄弟」，应该是teh指提多，以及第八章16到23节所讲ê hiah-ê不具名ê兄弟，其中有两位iáu是「各教会ê代表」。为tio̍h募款接济耶路撒冷教会ê事，使徒保罗m̄是家己teh做，却是有一阵信徒teh帮助伊，chiah-ê人有ê iáu是教会ê代表。换句话讲，这是一个委员会teh处理，为tio̍h是beh hō͘ chit种事工有够额ê公信力。Koh讲，使徒保罗一再强调，chit种捐助ê奉献，应该是出tī「甘心乐意，却m̄是出tī勉强」，因为勉强ê奉献，就ē-sái奉献会失去意义。

第6到8节，chit句「少种ê少收；chē种ê chē收」，是当时一句真流行ê谚语。使徒保罗用大家熟悉谚语teh说明一个重要ê信仰观念：帮助别人，ná亲像掖种籽仝款；甚么人帮助别人jú chē，得tio̍h ê mā会jú chē。相对ê，一个吝啬ê人，kan-taⁿ会得tio̍h koh khah贫乏ê心灵而已。续落来tī第7到9节，使徒保罗koh一pái强调帮助贫困ê人ê一个基本原则：甘心乐意。Chia ê「乐意」chit-ê词，tī希腊文ê意思，m̄-nā kan-taⁿ是无怨言而已，而且iáu带有欢欣、满足感ê意思。类似chit种教示tī箴言内面mā有bē少。亲像：「赈济sàn-chhiah人就是teh借hō͘ 上主；他会照伊所行ê 好事来还伊。(全民版)」（箴言十九：17）「好心ê 人会得tio̍h 福气，因为伊 kā 米粮分 hō͘ sàn-chhiah 人。(全民版)」（箴言廿二：9）chiah-ê lóng是teh说明欢喜帮助sàn-chhiah人ê人，上帝一定会加倍赐福hō͘伊。

第9节，是引用诗篇第一一二篇9节ê诗句。诗人特别强调「慷慨赈济穷苦人」ê人，会「强盛，受人敬重」。这是一句真实在，一个会受tio̍h尊敬ê人，就是对贫困ê人充满怜悯ê心。

哥林多后书 9:10-9:15

注释:

使徒保罗Tī chit段经文中，提起一个重要观念：上帝会赐福hō͘ hiah-ê帮助贫困ê人，m̄-nā án-ne，chit项帮助别人，等于teh见证上帝ê慈爱，自然会得tio̍h上帝赏赐ê koh khah chē恩典。

第10到12节，tī chia使徒保罗koh一pái用「种籽」，说明上帝对甘心乐意行善赈济sàn-chhiah人ê赐福，就是赐hō͘ chit种人koh khah chē ê种籽。换句话讲，甘心乐意行善ê人，就kah-ná掖种籽仝款，而上帝赐福hō͘ chit种人ê方式，就是赐福hō͘ chit种人koh khah chē ê种籽，这就产生一种循环：种籽掖jú chē，收成自然就会增加。使徒保罗提醒哥林多教会信徒，会帮助别人ê，等于是teh帮助人知影怎样感谢上帝。Tio̍h注意ê是感谢上帝，m̄是感谢济助ê人，因为所有ê一切，lóng是tùi上帝来ê赏赐。

第13到14节，使徒保罗讲chit项救助别人，等于是忠实tī福音ê事工，chit点认bat非常重要。一间教会有否忠实tī福音事工，就kah这间教会是m̄是有teh救助需要者ê事工上尽心尽力。因为án-ne做，就是teh荣耀上帝。而捐赠á是施与ê人，所得tio̍h ê 回报，就是受赠ê人ê代祷。祈祷乃是kah上帝对话。Chiah-ê受tio̍h救助ê人ê祈祷中，如果提起捐赠者ê名，等于是tī kah上帝对话中提起捐赠、施与者ê名，这意义是非常大ê。

因为祈祷mā是hō͘人kah上帝结连做伙siōng好ê方法，当受tio̍h恩惠ê人，tī祈祷中记念帮助伊ê人ê时chūn，mā等于是teh祈求上帝永远记念甘心乐意帮助人ê人。这mā就等于是teh祝福chit-ê人仝款。

哥林多后书 10:1-10:6

注释:

这四章是使徒保罗teh为家己传福音ê事工辩护。这四章保存在chia，却kah头前九章ê书信内容真不相符？有一个可能性，就是亲像头前已经有提起过ê，使徒保罗写hō͘哥林多教会ê书信m̄-nā是两封而已，可能至少有四封，其中有ê已经遗失。而这四章可能就是遗失了其中一部分，这部分被保存落来，而且编排tī此。Tī第二章4节，使徒保罗bat提起用真「忧伤痛苦」ê心写phoe，伊讲chit封信bat hō͘哥林多教会ê信徒「心内艰苦心」（参考哥林多后书七：8），chit封所讲ê「忧伤痛苦」中所写ê信，可能已经遗失了，kan-taⁿ存ê是最后这四章。

使徒保罗无koh提起有关为耶路撒冷教会募款ê事，因为tī第八kah九两章已经讲得够清楚à。Tùi chit章开始，使徒保罗koh一pái提起有关哥林多教会内部有人对伊攻击ê事，伊用真严厉ê语气提出辩护。原本使徒保罗是真有耐性ê，chit-má伊针对hiah-ê专门teh伊背后散布谣言中伤伊ê人，beh kā in荒谬ê言论攻破，m̄-nā án-ne，伊强调koh过一段时间，mā tio̍h「惩罚hiah-ê不顺服ê人」。Tī chia，伊无讲ài怎样「惩罚」，tī哥林多前书第四章21节，伊甚至讲beh「带tio̍h鞭子去」！tùi chia thang看出hiah-ê专门teh扯后腿ê人确实在哥林多教会中ê言行真嚣张，若无，使徒保罗bē受气到chit种程度。其实tùi哥林多前、哥林多后书，以及加拉太书等书信，就会看tio̍h chiah-ê tī伊背后传播谣言ê人，散布错误信仰内容ê人，就是一kóa已经信耶稣ê犹太人，m̄-koh in iáu是非常坚持接受割礼ê重要性，对使徒保罗不tī外邦人教会中强调割礼ê重要性，非常无法度忍受。甚至讲使徒保罗并m̄是「使徒」，伊所传ê就无权威thang讲。这mā是为甚么后来伊写ê书信中lóng会强调家己就是「使徒」ê原因。

Chit段经文ē-sái讲是第十到十三章ê引言。Tī chit段经文中，lóng thang看tio̍h使徒保罗所用ê词字lóng真强硬，kah-ná一个战士beh出征仝款，所用句有「争战」、「作战」、「武器」、「摧毁」、「攻破」、「堡垒」、「掠取」、「惩罚」等等，chiah-ê词句lóng kah战争ê场面有关，看起来使徒保罗对hiah-ê一再扯伊后腿ê人，实在是到à忍无thang忍ê地步了，kā它看做ná亲像是teh对敌人相刣仝款ê严重，因为chiah-ê专门teh扯伊后腿ê人，有时传ê信息是kah使徒保罗所传ê无相仝；in是传「另外一个耶稣」、「另外ê灵」、「另外一种福音」（参考十一：4）。使徒保罗认为这是非常危险ê，因为这会诱惑信徒ê心腐化（参考十一：3）。Tī使徒保罗ê观念中，信仰是kah性命息息相关ê事，关系tio̍h性命ê得救á无，ná亲像kah仇敌战争仝款，无妥协ê空间。因为án-ne，伊真ài用军队作例，比并传福音有ná出征一般。

第1到2节，tùi chit两节经文thang看出有人tī哥林多教会中放话，讲使徒保罗kan-taⁿ会tī背后讲强硬，tī众人面前lóng是表现ê真谦卑ê款，chit-ê意思是teh指伊不实在。chit-má使徒保罗讲beh「基督ê温柔kah慈祥要求」哥林多教会ê信徒。Chia所讲ê「温柔」，并m̄是指无受气，却是讲bē虚情假意，换句话讲，伊bē讲in爱听ê话。M̄-koh会有同情ê心，希望hiah-ê乱讲话ê人会悔改。Chia ê「慈祥」，意思是teh指和平ê态度，并m̄是beh争吵á是无理吵闹。

Chit-má使徒保罗讲以「基督ê温柔kah慈祥」劝该教会ê信徒「m̄-thang逼我对lín无客气」。Mā就是讲无希望该教会信徒逼伊tio̍h用像相刣ê时ê态度来对待in，因为这是伊所无愿意做ê事。换句话讲，使徒保罗希望哥林多教会信徒如成（chiâⁿ）实tio̍h讲伊ê事，就讲出合理、thang接受ê。M̄-thang乱讲话，故意造谣生非。伊讲，如果iáu是有人beh án-ne，伊就会无客气loh。

第3到6节，使徒保罗hō͘哥林多教会信徒知影，伊是已经准备好beh对付chiah-ê人ā。伊所用ê「武器」是「上帝ê大能」，却m̄是属世ê武器。使徒保罗承认家己是人，伊mā无讲家己是「圣人」，m̄-koh伊讲伊是为tio̍h上帝ê事teh「相刣」，并且是用性命为福音ê事工奋斗。Tī第4节伊并无说明「上帝ê武器」是甚么，m̄-koh tī哥林多前书第一章到二章，伊lóng提起一件重要ê事，mā是伊传福音siōng主要ê内容：「因为我决定，tī lín 中间除了耶稣基督kah 他hông 钉十字架ê 信息以外，无beh 提起其他ê tāi-chì。(全民版)」（哥林多前书二：2）

第5到6节，使徒保罗深信任何阻挡人来信á是认bat上帝tī耶稣内面ê救恩，对付chit种人一点á都免客气，却是beh拚全力kā它phah倒，就是为tio̍h beh hō͘人来信耶稣。这mā是伊tī哥林多前书第九章19到23节所讲ê，因为án-ne，伊tio̍h用尽所有ê方法「总是ài救一kóa人」。真清楚，哥林多教会信徒中有kóa人ê真正ê问题就是tī信仰上m̄-nā无成长，反tńg是kā一般俗世ê恶习行带入教会，使徒保罗chiah会用真严苛ê词句kā in谴责。伊讲beh等到哥林多教会信徒完全顺服伊ê劝勉了后，伊chiah会开始惩罚chiah-ê tī教会作乱ê份子。

哥林多后书 10:7-10:18

注释:

使徒保罗劝勉哥林多教会信徒tio̍h用「主所o-ló ê人」做基准点来看tāi-chì，却m̄是看人ê外表，á是用家己ê尺度teh量。这teh表示ê，就是亲像第五章16节所讲ê，无tī根据人ê标准来估量人。因为tī信耶稣ê人ê身上，应该有全新ê性命价值观kah生活态度出现。

第7到11节，tī chit段经文中thang看tio̍h tī哥林多教会内面，原来有人是án-ne批评使徒保罗ê：一是讲伊m̄是属tī基督ê（第7节）；二讲伊真严厉koh强硬（第10节）；三讲伊「外表平凡，言语粗俗」（第10节）等。

Tùi批评ê第一件事来看，mā就是哥林多前书第一章使徒保罗所提起ê，该教会内部有分裂，有人讲家己是「保罗ê人」，mā有人家己认为是「亚波罗ê人」，mā有人讲是「属彼得ê」，另外mā有人讲家己是「属基督ê」为chit种事，使徒保罗非常受气，伊用真不细jī 讲，无论是属tī toh一派系ê，都无用，因为真正ē-tàng救人性命ê，并m̄是人ê能力，却是上帝。基督徒siōng大ê荣耀就是成做上帝ê同工（参考哥林多前书三：9、哥林多后书六：1）。

关系讲使徒保罗「严厉koh强硬」，使徒保罗并无否认chit点。事实上伊是一个真严厉ê人，对tī hiah-ê乱传话ê人，特别是对外邦人讲in一定tio̍h接受割礼chiah ē-tàng得救ê人，伊是非常严厉地kā in谴责，用词造句一点mā不含糊（参考加拉太书一：8—9）。对hiah-ê自称是基督徒，却一再tī伦理道德生活上m̄知节制，甚至连乱伦ê事mā做得出来ê人，伊主张kā chit种人驱逐离开教会（参考哥林多前书五：1—5）。真可能chiah-ê讲使徒保罗是「严厉koh强硬」ê人，就是犯了chit种毛病，结果当使徒保罗teh谴责ê时chūn，in并无反省、悔改，却是koh khah受气，就tī教会内讲使徒保罗太「严厉koh强硬」，m̄-koh in án-ne做ê结果，是hō͘人m̄敢来加入基督ê信仰团契。

第三点koh khah无应该是信耶稣ê人该有ê态度。使徒保罗ê长相是怎样样，是m̄是真正像chiah-ê批评伊ê人所讲真正「外貌平凡」？无论使徒保罗长相án怎，有一点是thang确认ê：传福音m̄是看外表，因为ē-tàng感动人心悔改归向上帝tī耶稣内面之救恩ê，是圣神，m̄是óa靠人ê气力，当然koh khah bē是外表。Koh讲，使徒保罗真正讲话真粗俗mah？其实不然。Tùi伊写hō͘罗马教会ê书信来看，使徒保罗实在是一个真有学问ê经学教师，m̄-nā án-ne，tùi伊所写ê书信来看，看会出伊所用ê言词lóng是非常谨慎，而且非常优雅ê。第11节是使徒保罗写此书信ê重点之一，伊强调无论án怎，对哥林多教会伊是言行一致地ê。Chit点至少有kā该教会讲，伊并m̄是假鬼假怪ê人，á是讲一套，做ê又koh是另外一套；却是无论是m̄是tī哥林多，伊讲ê kah做ê lóng仝款，chit点tú好mā回应了第十节，有人以「外表平凡」评论伊ê讲法是错误 ê。

第12到16节，tī chia，使徒保罗讲出哥林多教会hiah-ê专门中伤伊ê人ê问题，chit种人就是用家己ê标准teh评论别人。使徒保罗讲出基督教信仰中真重要ê认bat，beh夸口，就tio̍h用上帝ê标准来夸口。换句话讲，如果一个人tio̍h讲tī福音事工上有甚么成就，he就tio̍h用上帝ê准则来衡量。伊bat kā哥林多教会ê信徒讲过，m̄-thang夸口，如果有人beh夸口，就tio̍h用认bat耶稣基督为夸口，其他ê lóng m̄是甚么thang夸口耀ê。伊甚至后来对该教会ê信徒讲，若chiâⁿ实beh夸口，伊讲伊kan-taⁿ会夸口家己ê软弱而已（参考十一：30）。使徒保罗koh一pái强调伊bē占别人ê sio̍k，tī别人努力ê工做基础上去做收成ê事。伊真正希望是tī无人传福音ê所在掖种籽。伊写hō͘罗马教会ê书信中án-ne讲：「我立志beh 去iáu m̄ -bat 听tio̍h 基督ê名ê 所在传福音，chiah bē kah 别人ê 工作重复。(全民版)」（罗马书十五：20）罗马教会虽然m̄是使徒保罗建立ê，m̄-koh伊mā鼓励罗马教会ê信徒帮助伊前往西班牙去传福音（参考罗马书十五：24）。如果连m̄是伊亲自开拓ê罗马教会伊lóng有chit种期待，he对亲自开拓起来ê哥林多教会，伊ê期待当然koh khah深。Thang看出使徒保罗ê用心，全部lóng khǹg tī「Kā福音传出去」chit-ê标准上。其实伊想beh讲ê就是：教会内部若有结党分派，怎样ē-tàng传福音？如果有淫乱ê行为，koh怎样ē-tàng见证福音？无可能ê事。

第17到18节，thang参考耶利米书第九章23到24节。使徒保罗有一个基本观念：传福音ê人，就是上帝ê奴仆。既然是奴仆，就无甚么好夸耀ê。Koh讲，真正teh beh夸耀，mā m̄是家己夸口，而应该是主人所o-ló ê人chiah是真正荣耀。这主人，就是性命ê主宰。

哥林多后书 11:1-11:15

注释:

Chit章使徒保罗针对有关有人讲伊「贪财」ê事提出辩护。另外一方面，mā tī chit章经文中，伊提出为tio̍h传福音，家己mā受tio̍h性命ê威胁。使徒保罗强调伊不得m̄ kā chiah-ê经历苦难ê事讲出来，原因是beh hō͘ hiah-ê一再乱讲话ê人，特别是hiah-ê kā别人努力ê成果，the̍h来套tī家己身上展宝ê「假使徒」，希望in ē-tàng因为án-ne hō͘ chiah-ê人感觉见笑而bē tī教会内胡乱吹嘘，欺骗信徒。

Tī使徒保罗ê观念中非常清楚一件事：夸耀福音事工ê成就，这m̄是信仰应该有ê品德。M̄-koh chit-má伊却一定tio̍h讲kóa家己所经历ê事，其实是beh hō͘ hiah-ê一工到晚夸耀家己tī福音事工上ê成就者感觉见笑，而值得注意ê，是使徒保罗所夸耀ê，竟然lóng是chiah-ê失败ê例，mā是伊受苦ê经历。

Tùi chit段经文ê内容thang看tio̍h，哥林多教会ê问题m̄-nā是淫乱等chit种道德伦理ê问题，mā m̄-nā是有结党分派ê纷争而已，koh khah严重ê ná亲像加拉太教会内所发生ê问题仝款，是属tī信仰本质ê问题，就是有「另外一种福音」、「传另外一个耶稣」，mā有「另外ê灵」等，chiah-ê lóng m̄是使徒保罗kah伊ê同工所传ê hit位拯救者。而chiah-ê mā是造成教会内部分裂ê主要原因之一。

第1到2节，tùi chit段经文中thang清楚看出，使徒保罗是非常有涵养、而且真有口才ê传道者。伊讲家己「有一点蠢」，其实是一种反讽ê讲词，因为伊是受过非常顶真ê犹太法利赛派ê训练，出tī犹太经学大师迦玛列ê门下（参考使徒行传廿二：3），单单chit点，对犹太人来讲是一点mā不「蠢」。如成（chiâⁿ）实是「蠢」，出名ê犹太经学大师迦玛列是无可能收伊为徒ê。第2节是真有意思ê一节经文；tī chia所讲ê「嫉妒」，chit-ê字tī希腊文原文是「zeelo」，是teh指高度ê「嫉妒」ê意思。使徒保罗讲伊「爱」哥林多教会，是「爱」到「嫉妒」ê状态，意思是teh指m̄准有任何差错ê状态。然后伊用夫妻ê关系来譬喻，表示只有绝对忠实。

第3到4节，使徒保罗用创世记第三章蛇引诱夏娃犯罪ê故事做譬喻，来形容伊所看tio̍h tī哥林多教会内部，已经有人引诱信徒弃sak耶稣ê救恩，甚至tī教会内出现所讲ê「另外一个耶稣」、「另外ê灵」、「另外一种福音」。Án-ne看起来，严重ê情形kah-ná bē输加拉太教会（参考加拉太书一：6—9）。使徒保罗就是深惊哥林多教会信徒tī信仰上会受tio̍h án-ne严重ê伤害，所以对哥林多教会有「高度ê嫉妒」，因为jú爱一个人，就jú惊惶对方受tio̍h任合伤害。使徒保罗认为chiah-ê传「另外一个耶稣」、「另外ê灵」、「另外一种福音」，意思是teh指会引诱人离开上帝tī耶稣内面ê救恩。虽然tī chia伊并无说明甚么是「另外一个耶稣」、「另外ê灵」、「另外一种福音」，使徒保罗谴责哥林多教会信徒竟然iáu会乐意接受chit种错误 ê信仰。

第5到6节，chit两节hō͘咱看tio̍h使徒保罗用非常讽刺ê名号，称呼hiah-ê自命真有权威ê人，讲in是「超等使徒」（中文《和合本》用「siōng大ê使徒」）。Chiah-ê人讥笑使徒保罗「言语粗俗」，m̄-koh使徒保罗则认为无论tī toh一方面，伊lóng比chiah-ê自命不凡ê「超等使徒」iáu会khah受有知识。
第7到11节，chit段经文直接指出chiah-ê所讲ê「超等使徒」真面貌，其实讲穿了，就是teh骗钱，m̄-koh in却反tńg来讲使徒保罗teh骗钱。Tùi chit段经文中mā thang看tio̍h使徒保罗传福音ê特色，就是当开拓起一间教会，并hō͘伊坚固起来后，就到另外一地方开拓教会，伊希望这间已经坚固起来ê教会，会全力支持伊开拓另外一间新ê教会。这mā是伊对哥林多教会有所期待ê原因（参考哥林多前书十六：6）。Ná亲像伊写hō͘罗马教会ê书信中，希望该教会协助伊去西班牙传福音是仝款ê用意（参考罗马书十五：24）。因为án-ne，伊讲伊去哥林多开拓教会传福音事工，支援ê气力是来自马其顿教会信徒ê供给。M̄-koh有人却故意散播不实ê谣言，致使哥林多教会有人对使徒保罗有误解。因为án-ne，伊特别tī chia强调，绝对bē造成哥林多教会ê负担。

Tī chit段经文中mā thang看tio̍h使徒保罗开始对hiah-ê攻击伊ê人提出反问：伊有无向哥林多教会索取甚么费用？tùi使徒行传第十八章3节ê记载来看，使徒保罗tī哥林多ê时，是用「制造帐棚维持生活」，伊kah tùi罗马迁居到哥林多城ê百基拉、亚居拉chit对夫妇lóng是一面织帐棚，一面传福音，所以伊讲并无向哥林多教会ê信徒索取任何ê费用。然后tī第8到9节，后来伊专心投入传福音ê工作，chiah-ê经费lóng是来自马其顿教会ê奉献。

注意第8节chia使徒保罗用「剥削」chit-ê词，chit-ê词tī希腊文是一个不时用tī军事行动中ê字「sylao」，意思是「抢夺」、「掳夺」。为甚么使徒保罗会用chit种词来形容伊传福音hō͘哥林多教会ê代价？原因是beh hō͘该教会知影：别人奉献金钱帮助伊tī哥林多传福音，hō͘ in得tio̍h福音ê果子，m̄-koh chiah-ê奉献ê人并无得tio̍h甚么报酬、tńg来收，却是完全奉献出去，而且无任何tńg来馈到家己身起来。使徒保罗讲chit种付出，有点á ná亲像「抢」了别人ê钱仝款，被「抢」ê一方只有损失。伊beh hō͘哥林多教会ê信徒知影：伊用马其顿教会奉献ê金钱，hō͘伊thang传福音hō͘ in，结果是in得tio̍h利益，奉献金钱ê马其顿会友无甚么利益thang讲。这就说明一件事：传福音，m̄是讲究tńg来馈，因为福音m̄是商品，传福音mā m̄是teh做seng-lí，却是tio̍h感谢上帝ê救恩。其实，使徒保罗有一个心愿：tī各地kā福音传开来，这就是伊心中siōng大ê愿望。而chit点mā是伊对哥林多教会期待，表示伊对in深切ê疼。Chit种爱，就是in会得tio̍h真正福音kah上帝ê救恩。

第12到15节，tī chit段经文中，使徒保罗讲到à真正ê问题所在，就是tī哥林多教会内，有人假冒「使徒」ê名号，从事欺骗ê工作。使徒保罗Tī chit段经文中真不细jī地指出，chiah-ê「假使徒」ná亲像豺狼仝款，是假冒伪善ê人。伊提起讲撒旦mā会化装成做天使chit种话，真可能是受tio̍h创世记第三章蛇引诱夏娃犯罪ê事件影响。蛇为tio̍h beh诱惑人犯罪，所用ê词句、内容，lóng hō͘人认为蛇真关心她，beh帮助她，结果是kā人拐诱弃sak上帝ê命令。第15节chit句「in ê结局一定kah in ê行为相符」，thang对照第五章10节：「因为咱lóng一定tio̍h khiā tī基督面前，受他审判。每一个人会按照肉身ê行为，á是善á是恶，接受报应。」chiah-ê欺骗人ê「假使徒」，绝对逃避不了上帝愤怒ê审判，结局一定真惨。因为in诱惑人弃sak了上帝ê诫命，会亲像亚当kah夏娃hō͘ 上帝惩罚仝款ê凄惨。

哥林多后书 11:16-11:33

注释:

Chit段话thang看出使徒保罗心中ê感触是非常深刻ê；伊深深知影hiah-ê teh搅乱哥林多教会ê众「假使徒」，为tio̍h讨好哥林多教会ê信徒，kan-taⁿ会一味地讲谄媚讨好in，尽讲kóa「属世」ê价值观，而不传真实ê福音，án-ne chiah是严重ê问题。所谓「属世」ê价值观，指ê就是用「使徒」名份等之类ê名号，kā人当做权威，却bē记得耶稣tī十字架上ê救赎功劳。使徒保罗谴责哥林多教会竟然ē-tàng容忍chit种事存在！这是非常错误 ê，因为教会ê存在不应该是谈些「属世」ê事kah物，而是beh传耶稣tī十字架上福音ê信息。

第16到17节，chit两节是真讽刺，旨teh讽刺hiah-ê自认为有智慧ê人ê假使徒。Tī使徒保罗ê观点中，传耶稣kah伊死tī十字架上福音ê人，往往hō͘人认为是荒唐、见笑ê事（参考哥林多前书一：22—24）。M̄-koh tī上帝ê眼中，这耶稣钉十字架ê信息却是上帝拯救ê信息。

第18到19节，哥林多教会内真chē人lóng tī跟tòe chiah-ê假使徒吹嘘，使徒保罗看bē落去，mā讲beh讲kóa kah in仝款、其实是真愚戆，he就是bē记得上帝tī耶稣内面ê救恩，kan-taⁿ会夸耀家己ê功劳。使徒保罗tī第18节chia指出tī哥林多教会内，hiah-ê teh夸口ê人，是「the̍h属世ê事来夸口」。所谓「属世ê事」，指ê就是第20节所提起ê五项迫害kah苦难。

第20到22节，使徒保罗tī chia真清楚谴责哥林多教会ê信徒，允准chiah-ê假使徒tī教会中，就是一种侮辱，是极大ê 错误，是非常不应该ê事。第20节chia使徒保罗提起哥林多教会受tio̍h chiah-ê假使徒五项迫害kah苦难，却iáu ē-tàng容忍，这是伊无法度理解ê事，chiah-ê包括了（1）被奴役、（2）hō͘人占便宜、（3）被陷害、（4）被轻视、（5）hō͘人siàn嘴phóe等。使徒保罗就用极尽讽刺ê语句讲家己感觉真「惭愧」，因为伊认为家己「kah-ná」无chit种勇气接受顶面所讲chit种苦难kah迫害。

第22节ê「希伯来人」，chit-ê称呼通常是外国人对以色列人ê称呼，带有鄙视（siùⁿ）ê意味，因为in是游牧民族，被看做是生活水准khah低ê民族（参考创世记三十九：14、17、四十一：12、四十三：32、四十六：34，撒母耳记上十三：19）。In真少讲自称是希伯来人。只有teh kah外国人谈话ê时，为tio̍h表明族群ê无仝，会自称是希伯来人（参考创世记四十：15，出埃及记二：7、三：18）。Tī新约圣经中，所谓「希伯来人」，指ê是hiah-ê讲亚兰语ê犹太人。若是比较广义ê讲法，mā指hiah-ê讲希腊话ê犹太人。使徒保罗自称是「血统纯粹ê希伯来人」（参考腓立比书三：5），以chit点来看，则所谓「希伯来人」，是有含种族纯洁ê意思tī内面。

第23到29节，使徒保罗mā以kah in「sńg一下」夸口ê「游戏」，讲述一下tī传福音ê事工上，向hiah-ê teh自夸ê「假使徒」mā夸耀一下伊ê经历。Mā是tùi chit段经文中，thang看tio̍h使徒保罗所历练过ê迫害，实非一般传道者所ē-tàng比并。使徒保罗m̄-nā是正宗ê犹太人，而且iáu是受过非常高深ê教育kah训练ê经学教师（参考使徒行传廿二：3、廿六：4）。伊提出家己受过ê迫害，只是为tio̍h beh说明一件事：chiah-ê受难，lóng是为tio̍h主耶稣ê缘故，耶稣已经死tī十字架上，伊是为tio̍h大家ê罪来死，án-ne，因耶稣ê死所救赎ê人有甚么好夸耀ê ？无！

第24节chia讲「被犹太人鞭phah过五次，每pái照例phah三十九下」，这是因为摩西法令规定bē-tàng超过四十下（参考申命记廿五：3）。

第30到33节，使徒保罗讲宁可夸耀家己软弱ê事，这tú好讲出hiah-ê kan-taⁿ会夸耀家己真有功劳ê假使徒颠倒ê信仰态度。因为做一个人不承认家己有软弱需要上帝ê扶持、帮助ê时，chit种人是离上帝真远、真远ê。伊特别提起真正该被称颂ê，就是「主耶稣ê父上帝」，chit位上帝chiah是鉴察人心内世界ê上帝。第32到33节，使徒保罗提起讲「亚哩达王」beh掠伊。Chit位亚哩达王就是亚哩达四世，主前9年到主后40年掌管阿拉伯「拿巴提」（Nabataeans）chit-ê国家ê君王。Tī使徒保罗ê时代，大马士革是叙利亚ê范围，m̄-koh罗马皇帝加利古拉在位时代（主后37到41年），伊kā大马士革划入拿巴提ê附庸，交hō͘亚哩达王管理。使徒行传第九章22到25节记载使徒保罗tī大马士革传福音ê时，因为知影有人beh杀害伊，tī伊门徒ê协助下，利用暗时kā伊khǹg tī篮á里tùi城墙上缒下，chiah会得thang逃脱。Mā可能是chit件事ê经验，hō͘伊心中一直感觉见笑，chit时chūn koh一pái提出，m̄-nā反省了家己，mā用来侮辱hiah-ê夸耀家己jōa-ni̍h-á勇敢ê人。

哥林多后书 12:1-12:10

注释:

Tī chit章，使徒保罗进一步说明伊心内ê感触，tùi伊ê书信中thang看tio̍h有两个所在，伊讲tio̍hná心内深处siōng发人省思ê经文，其中之一就是罗马书第七章14到24节，伊讲tio̍h家己心内有两个法则teh斗争，hō͘伊感觉性命ê痛苦。另外一处是chit章，伊讲tio̍h家己被升到第三层天ê荣耀。M̄-koh却同时mā讲tio̍h家己身上有根the̍h bē掉ê「刺」，这「刺」ê时常tī伊身上，hō͘伊无法度夸耀、骄傲起来。另外，tī chit章伊mā提起准备去哥林多进行第三pái ê访问，m̄-koh却mā有惊惶，担忧去ê时chūn会koh受tio̍h无聊ê困扰而发生纠纷。伊ē-sái讲是对哥林多教会「爱之深」，所以kā心内ê事mā表露无遗；伊同时对哥林多教会因爱而「责之切」，soah koh深惊in无法度接受，甚至受tio̍h伤害。

    伊Tī chit段经文中，使徒保罗讲上帝为tio̍h m̄ hō͘伊太骄傲，hō͘伊身上「有一种病像刺纠缠」tio̍h伊。到底是甚么「病」，á是这只是teh象徵某种「试探」，无人知影。

第1到2节，使徒保罗tī chia伊明白表示，夸口无甚么好处，koh khah m̄是伊ê心所愿，只是因为被逼ê实在气不过（第11节），所以决定ài-the̍h一kóa事来讲hō͘大家听听。使徒保罗就以第三人称ê方式，讲伊认bat「一个基督徒」mā有过chit种经验。伊无说明这「一个基督徒」到底是甚么人，m̄-koh真chē圣经学者认为chit-ê人就是使徒保罗家己。问题是使徒保罗tī chia只提起chit-ê人tī十四年前hō͘ 上帝提起第三层天，却无详细叙述「异象kah启示」ê内容。因为án-ne，无法度koh khah进一步明白所讲ê「第三层天」到底是怎样一tńg来事。

第3到6节，使徒保罗重复强调chit种被提升到天庭去ê经验，伊无法度确认是「身躯上去，iáu是伊得了异象」，chit句话充分地表明使徒保罗家己tī认知上ê有限，因为这是属tī上帝ê全能，tī人ê性命经验中，有真chē事是无法度用语言、文字表达得出来，甚至tī认bat上mā会有界限。伊koh一pái表示除了家己ê软弱以外，伊无为家己夸口。主要是免得有人kā伊捧得siuⁿ高，却致使bē记得上帝ê荣耀。

    第7到10节，使徒保罗是kā家己ê软弱kah 刚强同时放做伙，mā tùi chia看tio̍h tī伊心内ê世界，就ná亲像伊tī罗马书第七章14到24节所形容ê，有两种法则一直纠缠tio̍h伊，hō͘伊感觉性命ê软弱kah无力、苦难。Tī chia，伊讲身上有根「刺」，这到底是teh指甚么病症，á是问题，并无清楚。伊bat祈求上帝kā chit hō͘伊痛苦ê「刺」移除，m̄-koh却无得tio̍h应允。因为上帝ê恩典已经满足伊性命ê需要。M̄-koh因为这「刺」所带来ê软弱，chiah hō͘伊随时知影tio̍h óa靠上帝tī耶稣内面ê救恩，而bē骄傲。

哥林多后书 12:11-12:21

注释:

Tī chit段经文中，使徒保罗提起伊对哥林多教会特别ê疼，khah赢过其他ê教会。M̄-koh伊希望哥林多教会mā会以伊爱护in ê疼，来回应伊ê疼。

第11到13节，tùi chit段经文thang看出使徒保罗对哥林多教会付出真大ê心血；伊讲伊hō͘ in哥林多教会赢过其他教会（第13节）。第12节伊讲「藉tio̍h奇事、异能，kah神迹」来证明伊确实有使徒ê身分。Chit句thang对照罗马书第十五章18到19节：「我所beh大胆讲ê只是chit-ê句话：基督藉tio̍h我ê言语行为，koh用神迹奇事kah上帝之灵ê能力hō͘外邦人顺服上帝。因为án-ne，tùi耶路撒冷一直到Í-lū-lī-kóng一带地方，我四界传扬关系基督ê福音。」咱tùi使徒行传看tio̍h使徒保罗确实是有行神迹、奇事ê能力（请参考使徒行传十三：8—12、十六：18、二十：7—12、廿八：1—7）。

第14到15节，tī chit两节经文中，使徒保罗明白表示伊对哥林多教会ê爱情真深厚，真希望有第三pái去访问in。M̄-nā án-ne，伊愿意为该教会ê需要付出一切，m̄-koh期待该教会明白甚么人是hiah-ê专门tī教会中进行欺骗工作ê「超级使徒」。

第16到18节，chia使徒保罗明确地指出hiah-ê「超级使徒」诬指伊「诡诈」、「白贼笼络」哥林多教会（第16节），chit件事真正hō͘伊非常伤心。伊特别提出派提多去帮助in ê事，这hō͘哥林多教会清楚知影，lóng是为tio̍h beh关心in ê信仰正确而做ê措施。

第19到21节，tī chit段经文中，使徒保罗强调家己所做ê一切，lóng是为tio̍h beh「造就」in（第19节）。所讲ê「造就」，就是hō͘ in tī信仰ê层次上提升、进步，ē-tàng阻挡各种诱惑，tī生活上成做圣洁ê基督徒。第20到21节，使徒保罗指出伊心内ê矛盾，既想beh去探望in，soah koh惊受tio̍h伤害，koh khah惊惶去ê时chūn，koh发见教会内iáu有伊siōng无ài看见ê各种侮辱信仰ê事存在。若是án-ne，会hō͘伊感觉非常ê艰苦心。

哥林多后书 13:1-13:4

注释:

Tùi第十章到第十三章，如果kā它khǹg tī chit-ê本经册ê siōng头前，然后chiah开始tùi第一章续接落去，有可能án-ne读起来会比较顺一kóa。因为tī第七章伊提起tī马其顿tú-tio̍h提多后，知影哥林多教会对使徒保罗ê责言有辩护，mā作了澄清，hō͘伊非常欢喜。因为án-ne，tī chit章中，伊提起会有第三pái造访哥林多教会ê计画。

Tùi chit章，mā thang看tio̍h使徒保罗一直真关心哥林多教会内隐藏了一kóa tī第十二章所提起ê所谓「超等使徒」ê人，chiah-ê人表面上看起来，kah-ná真热心福音ê事工，其实是teh破坏教会内部ê团结kah真实信仰。另外一点，就是教会有自称是信徒ê人，m̄-koh却tī生活上真违背信仰，这mā是另外一种伤害福音事工发展ê人，使徒保罗认为对chit种人根本就无需要宽容。

使徒保罗tī chit-ê书信ê路尾劝勉信徒，tio̍h知影tùi心内作反省，一个人á是一间教会mā好，若是无反省ê能力，即使是外在规范得真好，mā无一定是真实ê。若无心内ê自律力，单靠法令ê规范，chit种行为准则真oh改变一个人ê性命ê。这mā是使徒保罗kā哥林多教会ê信徒讲，tio̍h知影反省，因为只有tùi心内反省，chiah会知影甚么是正确ê事，而bē致使成做真理ê绊脚石。

Tī第十二章14节使徒保罗提起会有第三pái造访哥林多教会，mā有一个目的，就是beh处理两件事：第一是hiah-ê造成教会纷争kah搅乱信仰内涵ê「超等使徒」。第二mā是kah第一件事有关，因为hiah-ê专门teh搅乱ê人，会要求使徒保罗提出证据，说明in 错误 ê所在，使徒保罗表示伊一定会hō͘ chiah-ê人清楚知影，伊所讲，lóng是带tio̍h基督ê教导。换句话讲，使徒保罗会真清楚说明真正信仰要义。

第1到2节，使徒保罗讲这是第三pái beh访问哥林多教会。第一pái是tī伊第二pái传道旅行ê时，tùi雅典来到哥林多城。当时伊是用「制造帐棚维持生活」，而tī哥林多城tú-tio̍h tú tùi罗马来ê亚居拉kah百基拉chit对mā是用「制造帐棚维持生活」ê夫妇，in同齐同心传福音，直到西拉kah提摩太tùi马其顿来到哥林多城，使徒保罗chiah专心投入tī传福音ê事工（参考使徒行传十八：1—5）。第二pái到哥林多城ê时间并无清楚记载。根据哥林多前书第十六章5到7节ê记载，有提起讲beh去，然后tùi哥林多后书第一章16节ê记载，ē-tàng看出伊有去，m̄-koh随时tī哥林多后书第二章1节就提起hit-pái ê访问kah-ná有发生些bē爽快ê互动出现，chiah hō͘伊讲：「我下了决心，tī下pái访问lín ê时chūn无koh hō͘ lín忧愁。」然后tī哥林多后书第七章6到7节特别提起提多kah使徒保罗相会面后，hō͘伊加添koh一pái去访问哥林多教会ê意念。而且tùi chit两节经文thang看出，使徒保罗准备第三pái去，特别beh处理hiah-ê搅乱教会信仰秩序ê「超等使徒」者。伊讲chit pái去，绝对bē「宽容in」。

第3到4节，tùi chit两节就thang看出哥林多教会因为chiah-ê「超等使徒」进入了后，就开始用真chē毁谤使徒保罗ê话。使徒保罗讲chit pái去，kā hō͘ hiah-ê kan-taⁿ会晓夸耀家己ê能力、荣耀，另外一方面kan-taⁿ会晓毁谤伊ê人见笑，因为真正信仰并m̄是tī人ê身上，却是tī耶稣ê十字架，咱是beh kah十字架ê耶稣连结做伙，因为上帝已经hō͘十字架顶ê耶稣koh活。因为án-ne，án-ne chiah是信仰ê中心，只有kah koh活ê耶稣连结，信ê人chiah会跟tòe koh活。伊beh hō͘ hiah-ê kan-taⁿ会夸耀家己ê人，见笑到无地自容。

哥林多后书 13:5-13:10

注释:

这是一段非常重要，使徒保罗kā哥林多教会ê信徒讲tio̍h做几件重要ê事：
一是反省一下，家己是m̄是真正基督徒。二是知影有耶稣基督kah咱同在。三是有正直ê行为。四是维护真理ê重要性。五是成做「完全」ê基督徒。Tùi chit段经文thang看出使徒保罗对哥林多教会ê用心，伊期待in m̄-nā tī社会生活上有好ê见证，mā希望in谨记tio̍h身上是带有上帝tī耶稣基督内面ê印记，因为án-ne，生活就一定tio̍h用非常顶真ê态度，m̄是随便，致使糟蹋了上帝拯救ê恩典。伊强调一定做对ê事，即使因为án-ne而被当做失败者，mā不重要。因为真正重要ê，是teh维护真理ê信息。

第5到6节，伊ài哥林多教会信徒知影「考验家己，省察家己」，反省是m̄是有teh过信心ê生活。伊认为真实ê基督徒，应该是会堪得考验ê。挡会tiâu考验chiah ē-tàng证明有活tī koh活ê基督内面。

第7到8节，伊tī chit两节中真清楚强调，维护真理ê方式，就是有正直ê行为，这是siōng基本ê生活kah工作态度。即使因为án-ne而hō͘人耻笑，mā tio̍h承受。基督徒若是无公义、正直ê心，就无法度见证上帝拯救ê疼kah恩典。

第9到10节，伊表明传福音只有一个心愿：hō͘所有听信伊传达福音信息ê人，lóng ē-tàng因为án-ne而刚强。伊祈求上帝保守哥林多教会ê信徒，lóng是tī信仰上刚强ê人，ē-tàng接受各种ê考验chiah bē弃sak真实ê信心。第9节所讲ê「完全」，意思是teh指悔改、改正错误 ê意思。换句话讲，伊teh劝勉哥林多教会信徒tio̍h知影tùi反省中观察家己，是m̄是有犯错，若有，就beh悔改，án-ne就thang hō͘家己ê性命趋向完全。因为悔改ê心chiah是上帝所重视ê。

哥林多后书 13:11-13:14

注释:

这是最后一段请安ê话。
  第11节，使徒保罗ài哥林多教会信徒知影悔改，伊用「努力作完全人」，意思是teh指真心ê悔改，只有án-ne chiah ē-tàng体会出上帝tī耶稣内面怜悯kah拯救ê恩典。Mā只有án-ne，兄弟姊妹间chiah ē-tàng和睦相处。

  第12节，所谓「圣洁ê chim嘴彼此请安」，是teh指带有祝福对方ê请安方式，而这就一定tio̍h先有彼此互相赦免、接纳后chiah ē-tàng做会到。

  第13节，伊对哥林多教会信徒ê祝福，是使徒保罗所写书信中siōng完整ê祝福话句，mā是唯一同时提起「主耶稣基督」、「上帝」、「圣神」等词句。Chit-ê句mā成做「三位一体神论」ê基础。