帖撒罗尼迦前书 1:1-1:10

注释:

Ná亲像使徒保罗写hō͘其他教会ê书信仝款，开始就是请安，koh来就是先o-ló受信ê教会á是对象，续落来就会提起伊写chit张phoe ê原因。

第1节，使徒保罗讲chit封书信是伊kah「西拉kah提摩太写hō͘帖撒罗尼迦教会」ê。西拉，是使徒保罗第二pái传福音ê时ê同工（参考使徒行传十五：40）。伊是耶路撒冷教会所派出ê两位代表之一，另外一位是巴撒巴ê犹大（参考使徒行传十五：22），in两人tī教会lóng受尊敬，甚至tī安提阿教会hông称做是上帝ê先知（参考使徒行传十五：32）。
另外一位是提摩太，伊mā是使徒保罗第二pái出去传福音ê时，tī路司得tú-tio̍h ê一位难得ê好青年。Tī路司得kah以哥念ê众信徒lóng真o-ló提摩太（参考使徒行传十六：1—2）。

Chit节使徒保罗iáu提起一件非常重要ê信仰认知，he就是帖撒罗尼迦教会是「属tī父上帝kah主耶稣基督」，chit句话真清楚说明一间真正教会，并m̄是属tī某一个人ê教会，mā m̄是某一个人拥有ê私人财产，真正基督教会，乃是属tī上帝kah耶稣基督ê。

第2到3节，使徒保罗一开始就提起beh为帖撒罗尼迦教会ê缘故感谢上帝。原因伊提起三点：一是in kā信仰实践出来，chia ê「信」是teh指对上帝绝对忠实。二是用疼心辛劳工作，使徒保罗tī chia所用ê「疼心」，tī希腊文是用「Agape」chit-ê字。三是坚守主耶稣基督ê ǹg望，chia ê「ǹg望」，是teh指对koh活ê ǹg望。Tùi chit点mā看tio̍h帖撒罗尼迦chit本书信有一个非常重要ê主题，就是讲tio̍h未来koh活ê信息。这thang看出帖撒罗尼迦教会tī使徒保罗眼中，是一间有达tio̍h「信、望、爱」这三项标准ê教会。

第4到7节，使徒保罗称呼帖撒罗尼迦教会ê信徒「兄弟众姊妹」，伊tī hō͘该教会这前后两本书信中，mā不过是短短ê八章，m̄-koh「兄弟众姊妹」却用了共计21次，前书用了14次，后书用了7次。使徒保罗用chit-ê词句ê意思，原本是teh指「被一般人看做愚笨、无能力、地位卑贱」ê，m̄-koh却lóng是hō͘上帝拣选ê子民（参考哥林多前书一：26—27）。使徒保罗tī chia则用「兄弟众姊妹」chit-ê词，强调大家lóng是上帝所意爱ê对象，是上帝特别「拣选」出来ê人民。Koh讲，使徒保罗mā强调伊传讲福音信息除了用言语，mā「óa靠圣神ê大能」，这是teh指感动人心ê气力。因为福音ê信息若无圣神ê感动，就算人用尽了所有súi ê词藻，mā是枉然。

Tùi第6节就会发见帖撒罗尼迦教会mā受tio̍h迫害。受tio̍h迫害ē-sái讲是早期教会共同ê经历，当时罗马帝国ê政府已经开始对基督徒有防备之心，而且开始对基督徒施压力。使徒保罗o-ló帖撒罗尼迦教会信徒真有见证，即使tī chit种迫害之下，in学习使徒保罗ê模样，mā学习耶稣基督tī十字架ê受难，宁可接受迫害，mā bē改变对上帝ê忠实，并且iáu用喜乐ê心接受，chit点thang真m̄是简单ê事。这mā是为甚么使徒保罗会讲帖撒罗尼迦教会信徒是马其顿kah亚该亚教会ê模范。

第8到10节，chit段话对帖撒罗尼迦教会ê信徒来讲，确实是真大ê鼓励。使徒保罗讲帖撒罗尼迦教会美好ê见证已经传开来，而且jú传jú远。使徒保罗提起tī外面地教会传述有关帖撒罗尼迦教会信徒有美好见证ê事，包括三点：其一是in接受福音ê热情；二是in tī信仰上有美好ê见证；三是in用信心teh ǹg望耶稣基督ê koh再临。Á值得注意ê是有关第10节ê「ǹg望耶稣tùi天顶降临」，使徒保罗tī chit本书信中提起真chē pái，有第二章19节；第三章13节；第四章16节；第五章2节。Mā thang án-ne讲，帖撒罗尼迦前书ê主要内容mā是teh谈论有关耶稣koh再临ê主题。

帖撒罗尼迦前书 2:1-2:19

注释:

Tī chit章使徒保罗讲tio̍h有关伊tī帖撒罗尼迦传道ê经历。Tī这章经文中thang看tio̍h该教会中，有人对使徒保罗kah其他同工真chē所在诽谤，伊对chiah-ê流言只做sió-khóa ê辩驳，m̄-koh伊深信帖撒罗尼迦教会ê信徒应该会明白过去ê日子里，使徒保罗kah其他同工lóng是尽心尽力服事，而且对该教会就ná亲像老父对待家己ê kiáⁿ仝款。

第1到3节，第1节kah第一章9节是有关连ê；tī第一章9节提起使徒保罗kah西拉去帖撒罗尼迦传福音ê时chūn，in对福音ê信息有真好ê回应。Tī使徒行传第十七章4节mā有记载，讲使徒保罗kah西拉tī帖撒罗尼迦城ê事工真好，m̄-nā得tio̍h了信徒，in中间有人尚且是「希腊人kah妇女界ê领袖」。M̄-koh chit-má该教会内有kóa谣言传出中伤in tī hia开拓ê福音事工，因为án-ne，使徒保罗tī-chia作了澄清：

	第一是「m̄是出tī幻想」，这是teh指使徒保罗teh传讲耶稣基督koh活ê信息。使徒保罗强调耶稣基督ê信息m̄-nā是真实，而且是上帝拯救ê大能（参考罗马书一：16），伊甚至讲如果耶稣基督无koh活，án-ne信仰耶稣基督chiah是「幻想」（参考哥林多前书十五：16—17）。其实使徒保罗就是亲自遇tio̍h koh活ê耶稣基督，chiah会拚命四界见证。

	第二是「无不良动机」。Chia所讲ê「不良动机」，指ê是人心内ê心思意念不纯洁，有想beh陷害别人ê意念。使徒保罗传上帝tī耶稣基督内面拯救ê福音，chit-ê福音乃是为tio̍h beh拯救人ê性命免tī灭亡，怎样可能成做「不良动机」？所以伊讲无「不良ê动机」（mā thang参考哥林多后书十：2）。

	第三是「m̄是想欺诈甚么人」，chit句话mā反应了当时tī信徒中间发生ê事，就是有人假冒先知á是「使徒」ê身分，就是为tio̍h beh欺骗别人ê钱财，chit种情形tī哥林多教会发生真chē起（参考哥林多后书十一：5）。其实chiah-ê lóng是故意beh毁谤使徒保罗kah其他同工。

第4到6节，chit段话非常重要，mā讲出传道者应该有ê态度kah使命感。使徒保罗强调一个传福音ê人，m̄是teh讲求人ê o-ló，因为福音事工是上帝拯救人ê事工，是tùi上帝来ê交托，因为án-ne，tio̍h对上帝负责。福音就是上帝ê信息，上帝ê信息可能会hō͘人感受tio̍h ná亲像针刺一般ê艰苦心（参考希伯来书四：12），m̄-koh无法度因为án-ne就不讲、不传。Mā无法度因为人ê o-ló就心满意足，因为人ê o-ló可能是虚假ê，上帝则鉴察人心内ê意念。

第7到9节，这是一段非常感动人ê话语。使徒保罗表白伊为tio̍h beh传福音，ē-sái讲是毫无保留kā性命lóng献上。伊tī第7节chia讲对待帖撒罗尼迦教会ê信徒，有ná老母teh养饲家己ê kiáⁿ仝款，而tī第11节则讲ná亲像老父对待家己ê kiáⁿ仝款。Koh讲，mā tùi chia看tio̍h使徒保罗kah同工传福音有一个特色，就是除非有信徒甘愿资助，亲像腓立比教会信徒出钱出力，若无，伊就以家己ê技能（织帐棚为业）维生，工作所得够额糊口了后就继续传福音ê事工。Chit件事thang tùi使徒行传第十八章1到5节中，伊kah亚居拉kah百基拉夫妇ê故事得tio̍h证明。伊无希望因为传福音反tńg造成众信徒ê负担。

第10到12节，这是一段记载对献身传道ê人真重要。使徒保罗kah西拉，tī传福音ê事工上，确实真尽心、尽力，并且teh生活言行举止中，lóng保持「纯洁、公正、无thang责备」，并且这m̄是使徒保罗家己讲了就算，伊hō͘帖撒罗尼迦信徒家己评断是m̄是án-ne，同时，伊mā以上帝ê名为证。

注意chia提起ê三样言行：
一是纯洁，这是teh指分别为圣。意思是teh指kah一般人有无仝。如果以今á日ê话语来讲，就是不流俗。

二是公正，意思是teh指有规律，不随便，态度谨慎。

三是无thang责备，意思是teh指无甚么thang引起争端，á是hō͘大家感觉为难、无好处理ê事。

伊tī chia mā劝勉帖撒罗尼迦信徒，tio̍h用蒙上帝ê欢喜为目标。因为基督徒就是分别为圣ê人。

第13到16节，第13节是真重要ê一节经文，使徒保罗真清楚表示，伊所传的确实是上帝ê福音，并m̄是属tī人ê信息。因为福音是上帝ê话语，对hiah-ê想beh弃sak上帝ê人来讲，听起来是真刺耳ê。因为上帝ê话ná亲像双刃ê剑仝款利剑剑，hō͘人oh得忍受，甚至会刺透人ê骨髓（参考希伯来书四：12）。Chia mā提起帖撒罗尼迦教会kah犹大地区ê教会仝款，受tio̍h严厉ê迫害（参考使徒行传八：1、十一：19、十二：1）。使徒保罗提起chiah-ê迫害基督徒ê犹太人，其实mā是杀害耶稣基督kah先知ê人，chiah-ê行为是冒犯上帝，一直teh阻止福音传向外邦。使徒保罗讲chiah-ê人ê行为kan-taⁿ会累积koh khah chē ê罪恶，有一工上帝ê「义愤」会临到in身上。

第17到20节，这是一段鼓励ê话。第17节ê「分离」，意思是teh指「成做孤儿」。使徒保罗kā帖撒罗尼迦教会ê信徒讲，伊无法度去看in，是因为有阻碍，却m̄是故意弃in tī无顾。使徒保罗并无说明到底是甚么事阻碍in去看in，不过有可能是因为耶孙被掠了事阻碍了，后来为tio̍h beh避开不必要ê灾害，众信徒kā使徒保罗kah西拉护送到庇哩亚，然后koh tùi庇哩亚护送到雅典，可见当时情况ê危急（请参考使徒行传十七：10—15）。

第19节使徒保罗koh一pái讲tio̍h一个重要ê主题：主耶稣koh来。这mā是伊tī chit两封书信重复提起ê问题，可见使徒保罗写hō͘帖撒罗尼迦教会ê书信，主要目的就是beh kah in讨论有关chit方面ê信仰认知。

	Koh讲，使徒保罗o-ló帖撒罗尼迦教会乃是in工作成果ê「希望」、「喜乐」、「冠冕」，伊是teh指该教会ê信徒，tī受tio̍h迫害ê时，并无放弃信仰，mā因为对该教会存极高ê ǹg望，知影该教会thang成做传福音真好ê基地。Chia所讲ê「冠冕」一词，并m̄是指国王头壳顶所戴ê王冠（diadema），却是指tī竞技场上比赛得胜者头壳顶所戴ê花冠（stephanous）。使徒保罗意思是讲：当耶稣基督koh再临到ê时chūn，伊bē空手见耶稣基督，却是会双手捧tio̍h tī帖撒罗尼迦教会ê福音果子呈现tī耶稣基督ê面前。该教会ê成果，等于使徒保罗等众同工头壳顶ê冠冕仝款ê耀眼，mā是in siōng大ê荣耀。

帖撒罗尼迦前书 3:1-3:13

注释:

第二章17节使徒保罗提起家己无法度如愿地到帖撒罗尼迦教会去探望in，m̄-koh差派伊siōng得意ê门徒提摩太代替伊去。Á chit-má提摩太tùi in he里tńg来，带hō͘使徒保罗非常大ê安慰，原因是提摩太提起该教会ê各种见证，hō͘伊知影帖撒罗尼迦果然是一间真有美好见证ê教会。

    第1到5节，tī chit段经文中，使徒保罗提起差派提摩太去访问帖撒罗尼迦ê教会，是为tio̍h beh鼓励in。M̄-koh mā同时kā in讲，伊对该教会信徒有非常ê信心。Tī第1节chia所用ê「留」一字，原来是teh指有含「生死之别」ê意义。换句话讲，使徒保罗差派提摩太去，是tī非常m̄甘 ê情况下派去ê，因为提摩太就ná亲像伊ê「真kiáⁿ」一般（参考提摩太前书一：2），因为提摩太离开，使徒保罗就一定tio̍h家己一个人独自前往雅典，可能因为án-ne有「落寞」ê感觉。提摩太kah-ná tī帖撒罗尼迦教会停留ê时间比预期ê iáu khah长，当使徒保罗到哥林多城ê时chūn，提摩太kah西拉chiah来chit-ê城kah伊相会（参考使徒行传十八：5）。

	使徒保罗讲派提摩太去，目的是为tio̍h beh坚定in ê信心，hō͘ in bē致使「kiu-kiu」。Chit-ê「kiu-kiu」，mā是teh指「摇动」ê意思。Chit-ê词tī当时通常lóng是用来形容狗尾溜摇来摇去ê状态。使徒保罗真清楚知影，tī伊离开帖撒罗尼迦教会了后，随时有犹太人前去捣乱信徒ê信仰，并且因为面临迫害，若是放弃信仰马上就thang解除受迫害ê威胁，因为án-ne有kóa信徒开始对信仰ê态度开始摇pái不定。伊kā大家讲，经历迫害，乃是信仰成长过程中必定会tú-tio̍h ê事。因为án-ne，伊表示对帖撒罗尼迦教会ê信徒有非常高ê期待kah信心，m̄相信伊kah西拉等人Tī该教会ê事工会经不起迫害ê考验。使徒保罗会有chit种讲法，当然是kah伊拚命传福音ê态度有关。

第6到9节，chit段经文thang看出提摩太带帖撒罗尼迦教会信徒三项好消息tńg来：包括in有「信心kah疼心」，以及对使徒保罗ê想念，这三点hō͘使徒保罗感觉非常安慰。可能因为迫害jú来jú严重，而且捣乱ê事件不断，使徒保罗形容伊差不多teh要喘不过气来。chit-má因为提摩太带来正面ê消息，因为án-ne，chiah hō͘伊大大松了做一困。为tio̍h án-ne，使徒保罗讲事(tāi)先tio̍h感谢上帝。因为面对苦难ê冲击、迫害ê来临，若m̄是有上帝ê带领，beh行过hiah-ni̍h艰辛ê路段确实无容易。

	第10节，使徒保罗koh一pái表示真希望去帖撒罗尼迦探望in，并且日夜为tio̍h án-ne事献上祈祷，可见使徒保罗对该教会有一份真深ê感情。伊讲想beh去帖撒罗尼迦教会，是beh去「补足」in ê信心。所讲ê「补足」是teh指tio̍h提升、加强。

第11到13节，chit段经文读起来，随时会想tio̍h这是一封书信ê结束chiah有ê句型。Án-ne，真可能这第一封书信就是到chia结束。Tùi第四章开始，kah-ná又koh接了另外一封书信。Chit种类型ê书信mā出现tī伊写hō͘哥林多教会ê书信中（参考哥林多前书九：15）。Tī chia使徒保罗特别祝福帖撒罗尼迦教会tī疼心上会koh khah成长，m̄-nā是tī彼此相疼ê信仰功课上，koh khah teh疼人类ê心。Tùi第四章9到10节就thang到该教会m̄-nā信徒彼此之间会互相帮助，而且iáu会帮助马其顿ê其他教会之需要，这就是使徒保罗所o-ló in ê所在。

第13节chia有几点ài beh特别注意ê：
一是提起「主耶稣kah伊ê众信徒来临」，kah其它地方只提起「主耶稣koh再临」，chia是加出了「kah伊ê众信徒」。真显然ê，chit句话ê观念kah犹太人对末日来临ê观念真类似，he就是tī末日审判时刻一到，上帝会kah他身边ê众天使同齐降临审判世界。Tī帖撒罗尼迦后书第一章7节写ê：「伊beh hō͘ lín chiah-ê受苦ê人kah咱同齐得tio̍h tháu放。主耶稣kah伊大能ê天使tùi天顶显chit-má火焰中ê时chūn，上帝就beh执行chit件事。」Án-ne，thang明白chia提起耶稣基督ê信徒死后就是kah耶稣基督同koh活、同在同齐。因为án-ne，当主耶稣koh再临ê时chūn，in mā会跟tòe耶稣基督同齐来临。

二是真正有信心ê人，会成做圣洁、无缺点ê人。Chia所讲ê「圣洁、无缺点」，并m̄是讲一个人成做「圣人」一般，lóng bē犯错，á是无任何罪恶。却是讲hō͘家己远离罪恶，无koh过犯罪ê生活，kah无信耶稣基督ê人，tī性命ê价值观kah态度上有所区别。

三是ē-tàng khiā tī上帝面前。圣经真清楚说明末日审判者就是上帝。无论是甚么人，每一个人lóng tio̍h接受上帝ê审判，无任何一个人ē-tàng例外。

帖撒罗尼迦前书 4:1-4:18

注释:

Ná亲像头前已经提起过ê，chit章kah-ná是一个新ê段落，mā ē-sái讲是另外一封书信。

	如果注意使徒保罗所写ê书信，lóng会发见一个共同ê特点，就是会劝勉收phoe ê教会众信徒，tī信仰kah生活之间一定tio̍h有亲密ê连结。Tī chit段经文中，伊强调「努力工作」kah「火热ê心事奉主」是同等ê。Mā就是讲一个人如果认真工作，kah热心事奉上帝lóng仝款重要。如果一个人tī工作职场上随便、应付、偷工减料，chit种人无论怎样热心教会ê事工，lóng是无正确ê，mā无算有好见证。因为好ê信仰，并无只是tī教会，mā tio̍h tī工作场合中见证出来。

    第1到2节，类似tī第二章到6节所讲ê，基督徒并m̄是tio̍h讨人欢喜，却是ài面对上帝。因为án-ne，tī生活上就一定tio̍h活出上帝所欢喜ê模样。

第3到6节，chit段经文讲出帖撒罗尼迦教会信徒ê信仰生活出了问题。Tùi第3节chit句「绝对无淫乱ê事」，就thang看出tī帖撒罗尼迦教会ê信徒出现淫乱ê行为，这就kah哥林多教会所发生ê状况仝款了（参考哥林多前书五：1）。因为án-ne，使徒保罗ài in知影「控制家己ê身躯」，chit句话mā thang当做「kah家己ê bó͘相处」，chit句话真清楚，就是bē-tàng有「婚外情」ê行为。第6节所讲ê「bē-tàng有失礼同道á是占伊sio̍k ê行为」，意思是teh指有关性方面ê事，mā就是「通奸」ê行为。因为chit款tāi-chì m̄-nā伤害家己，同时mā伤害了别人，koh khah严重ê是，致使kui个信仰团契ê分裂、不和谐。

注意chia ê「身躯」一词所用ê希腊文是「skeuos」，指ê是「器皿」ê意思。使徒保罗ê意思是，咱ê身躯乃是上帝ê「器皿」，一定tio̍h洁净，bē-tàng有污秽，因为基督徒ná亲像beh做为献祭hō͘上帝ê「器皿」仝款。这ná亲像伊写hō͘罗马教会提起ê，基督徒tio̍h亲像一个「活活ê祭物献hō͘上帝」（参考罗马书十二：1）。

使徒保罗tī chia真清楚讲tio̍h，上帝对犯淫乱行为ê人是bē原谅ê，一定会惩罚。使徒保罗会án-ne强调，主要是beh hō͘帖撒罗尼迦教会ê信徒知影，无论是甚么理由，保持洁净ê婚姻关系是非常重要ê信仰功课，因为婚姻是性命ê约ê记号，ná亲像洗礼仝款，lóng有上帝kah咱性命立约ê记号，因为án-ne，一定tio̍h用纯洁ê心来遵守。

第7到8节，chia所提起ê「选召」chit-ê字眼。Chit-ê字ê意思并m̄是随便挑出来，却是经过深思熟虑确定了后，所做ê决定。有含「愿意付出」代价ê意思。这表示上帝拣选以色列民族做他ê选民，是经过精挑细选ê结果，而上帝拣选in，并m̄是因为in有甚么好条件，反tńg是因为上帝ê怜悯kah慈爱。因为án-ne，伊劝勉帖撒罗尼迦教会ê信徒应该就tio̍h tùi被拣选ê观念来圣洁家己，hō͘家己感觉身为基督徒kah一般人有无仝ê所在， tio̍h比一般人对家己有koh khah高ê道德要求，有koh khah高ê生活规律准则，有koh khah顶真ê工作态度等。伊讲拒绝chit份拣选，m̄是拒绝人，却是拒绝上帝。请注意chia所讲ê「拒绝」chit-ê词，使徒保罗所用ê希腊文是「ah teteo」，chit-ê词ê意思thang当做「遗弃」，mā有含「m̄看tī眼内」ê意思。Mā就是无愿意tùi败坏ê中间改变过来，m̄ kā chiah-ê败坏ê道德行为遗弃掉，这就是拒绝上帝拣选ê恩典，等于是m̄ kā上帝ê拣选之爱当做一回事，m̄看tī眼内。

第9到12节，chia讲beh「彼此相疼」，使徒保罗tī chia所用ê是「philadelphia」这字，chit-ê意思是teh指同为一个家庭ê亲兄弟姊妹之爱。使徒保罗会用chit-ê「philadelphia」chit-ê字来形容帖撒罗尼迦教会，有意思beh hō͘该教会信徒知影：in ná亲像一个大家庭中ê兄弟姊妹仝款，lóng有仝款ê天父、仝款ê救主。伊勉励in tio̍h tī chiah-ê爱人如己ê功课上继续进步。Á帖撒罗尼迦教会的确是一间真有疼心ê教会，in m̄-nā会亲像一个大家庭中ê兄弟姊妹一般彼此相疼，而且iáu会关心所有马其顿教会ê信徒，这确实m̄是一件简单ê事。Chia伊劝勉信徒tio̍h「安份守己」，chit-ê词tī《台语汉字本》圣经用「恬静」（中文《和合本》仝款，用「安静」），意思是teh指会冷静思考，不随便跟tòe别人ê意见起哄。

另外一方面，使徒保罗mā劝勉该教会信徒tio̍h「亲手做工来维持家己ê生活」，chit句话讲出一个重要ê社会晓背景；当时希腊文化ê社会，因为国势bat达tio̍h颠峰ê状态，人民富裕，差不多每人厝内lóng有畜养奴隶做工。因为án-ne，靠劳力做工饲家计ê人一直被希腊文化ê社会鄙视（siùⁿ），认为he是卑贱ê人从事ê工作。帖撒罗尼迦教会中，有kóa人就是chit-ê态度，in认为既然教会是一个大家庭，就beh彼此分享，因为án-ne，只等待别人提供给in lim食用，却m̄知家己mā tio̍h努力工作，以求自hō͘自足，并进一步帮助需要ê人，反tńg是游手好闲，欢喜答嘴鼓论地，评论别人ê态度，m̄-nā对教会团契生活无帮助，mā m̄是一个信徒应该有ê生活态度。

第13到18节，每一个时代ê信徒lóng会对耶稣基督koh再临ê时刻，á是景象提出问题，ná亲像哥林多教会ê信徒mā是án-ne，因为án-ne，使徒保罗tī哥林多前书第十五章用kui章ê篇幅论到有关koh活ê事。chit-má chia伊kah帖撒罗尼迦教会ê信徒讲起有关耶稣基督koh再临ê景象。早期教会有一个共同ê观点：主耶稣基督koh再临ê时chūn，mā是审判ê时刻，m̄-nā beh审判已经往生ê，mā tio̍h审判iáu活teh ê每一个人，因为he是末日ê时刻。另外一个观点是：信耶稣基督ê人，lóng会得tio̍h koh活ê耶稣基督ê拯救。真chē人因为等待耶稣基督ê koh再临，结果等到往生ê时iáu未出现，因为án-ne带忧伤离开世间。Á iáu活teh ê人却一再祈求hit-ê末日赶紧来临。因为án-ne，使徒保罗说明chit件事：即使已经往生，当耶稣基督koh再临ê时chūn，伊会hō͘ hiah-ê已经往生ê人，koh活起来，并且chhōa in到伊为大家安排ê所在（参考约翰福音十四：1—4）。

第15节提供一个重要ê观念：koh活，对所有信耶稣基督ê人来讲，无论是已经死去ê人，á是iáu未死去ê人，恩典lóng仝款，无前后之别。 第17节ê「云里」，通常lóng是teh指上帝显现ê时chūn（参考出埃及记十四：19、三十四：5、四十：34—38）。Á tī空中kah koh活ê主耶稣相会，乃是基督徒siōng大ê荣耀。

帖撒罗尼迦前书 5:1-5:28

注释:

会有等待耶稣基督koh再临ê信仰，tī早期教会看起来，he mā是世界末日ê时刻来到。因为án-ne，大家就聚集做伙，kā所有ê金钱、财产lóng the̍h-tio̍h聚会ê所在，这mā是早期教会信徒一个重要信仰告白。Tùi使徒行传第二到五章，thang看tio̍h甚至有ê信徒是为tio̍h beh等待耶稣基督ê koh再临，变卖所有ê家产，the̍h来教会hō͘大家同齐公用，因为in认为耶稣基督真紧to̍h会koh再临，伊一再临，就是世界末日来到。Chit-ê世界lóng会消失，一切lóng会变成新ê。世间chiah-ê财物等物件，lóng会变成无用ê物件。

M̄-koh，「等待」mā是对信心siōng严酷ê考验，一般thang等待一工、一礼拜á是一个月，m̄-koh，若得等待半年、一年了后，甚至teh等待一年、两年以上，恐惊就需要koh khah chē ê信心来支持。Á当有kóa信徒因为等不及就往生，信徒内面开始有人承受不了chit种失望，渐渐变kah失去信心，帖撒罗尼迦教会mā发生chit种问题。因为án-ne，使徒保罗写chit本书信，就是用讨论chit-ê问题做主题。

第1到3节，chit段经文thang参考马太福音第廿四章36到37节，耶稣基督真清楚讲，无人知影上帝ê审判甚么时chūn会来临。使徒保罗就是借用耶稣基督所讲ê教导来说明：主koh再临ê日子，ná亲像贼á tī暗时忽然来到仝款，mā像灾祸、像有娠ê妇女，忽然阵痛临盆来到仝款。伊用chit种方式来说明无任何人thang知影主耶稣koh再临ê日子ê真确时间。

第4到8节，使徒保罗用「乌暗」kah「白昼」来表明基督徒应该是属tī「白昼」ê人，mā就是有性命希望ê人。因为án-ne，m̄免担心m̄知koh活ê耶稣基督koh再临ê日子，因为信靠耶稣基督ê人，lóng会知影怎样准备，因为án-ne，随时随地lóng tī为迎接koh活主耶稣koh再临而活。伊特别强调基督徒应该是每工lóng真「警醒」，ná亲像tī日时仝款hit种清醒，无法度「沉睡」，却是需要「警醒戒备」。伊tī chia mā用「沉睡」，以及「酒狂」来说明，chit两个词lóng是teh指无信耶稣基督ê人，mā就是无真确信仰ê人，chit种人因为m̄知性命ê ǹg望何在，因为án-ne，bē有警醒ê生活态度。伊希望基督徒teh生活态度上是积极、认真正，而且会珍惜每一个时刻，因为伊知影所有ê准备，lóng是为tio̍h beh迎接主耶稣基督ê忽然koh再临。伊特别提起tio̍h「用信kah疼」做为「头盔、护胸甲」，表示亲像一个勇士准备ài上战场去相战一般发挥力量，án-ne就ē-tàng阻挡所有ê诱惑。

第9到11节，tī chit段经文中，使徒保罗提起基督教信仰一个基本ê认bat：所有信靠耶稣基督ê救恩ê人，lóng会因为耶稣基督ê缘故得tio̍h拯救。这mā是圣经所讲ê，上帝差遣耶稣基督到世界起来就是beh拯救所有信伊ê人（参考约翰福音三：16）。第10节ē-sái讲是chit本书信siōng重要ê一节经文，mā是伊写chit封书信ê主要原因之一，因为有真chē信徒来不及等到耶稣基督koh再临，就已经死去à。Ná亲像伊写hō͘罗马教会ê书信中所提起ê，kah耶稣基督同死ê人，必定mā会kah耶稣基督同koh活（参考罗马书五：8）。使徒保罗tī chia特别强调，一个信靠耶稣基督为救主ê信徒，无论是已经死去，á是iáu未死，lóng仝款，当koh活ê耶稣基督来临ê时，lóng bē有区别，大家lóng beh同时享受kah koh活ê耶稣基督同koh活ê欢喜kah福气。因为án-ne，伊tī chia mā讲出一个信仰团契siōng重要ê信仰态度，就是beh彼此鼓励、帮助。Chia所用ê「帮助」，是teh指「建造」，ná亲像起厝仝款，单独一个人无办法完成一间安全ê厝thang khiā起，而是beh真chē人同心协力chiah ē-tàng建造出一间安全ê厝。信仰团契mā是án-ne，如果单靠一个人ê努力，chit种厝是真脆弱ê，只有大家同齐来，仝款ê心志，仝款ê疼心，互相扶持，án-ne建造起来ê信仰团契tī根基上chiah会koh khah坚固。

第12到13节，chia提起tio̍h「尊重」chit-ê动词，其希腊文是「eidenai」，意思是teh指「认bat」、「了解」。Tī chia mā包含「体谅」ê意思。Ài beh特别注意ê是，使徒保罗tī chia所提起ê「尊重」，是因为chiah-ê被拣选出来ê福音同工是真正有认真「辛劳」工作，chiah会受「尊重」。Chia使徒保罗mā提起tio̍h用「疼心」对待chiah-ê被按立来传福音ê工作者，chit-ê「疼心」所用ê希腊文就是「agape」chit-ê字。Chit种「疼心」，是真实ê，m̄是表面ê。

第14到15节，使徒保罗劝勉帖撒罗尼迦教会ê信徒，tio̍h「警告pîn-tōaⁿ ê人」，chia「pîn-tōaⁿ」一词，希腊文是「ataktous」，这是借用军事用语ê词汇，指士兵不听从指示，不按照规矩行动。Mā就是脱队了，á是违抗命令仝款。这mā表示tī帖撒罗尼迦教会中，有人进入教会中，却偏偏不守教会规矩，认为家己ê见解siōng正确，bē合群，mā bē合作，无愿意遵守大家共同约定ê秩序。使徒保罗认为chit种人，m̄是只有传道者beh苦劝伊，所有ê信徒lóng有责任约束伊。
	
「灰心」kah「软弱」对照，这是teh指懔neh ê意思。Tī教会中，lóng是有kóa人真容易就对信仰失去信心，特别是teh指hiah-ê tú-tio̍h迫害就想beh放弃信仰ê信徒。Tī帖撒罗尼迦教会有tú-tio̍h chit种案例，使徒保罗鼓励大家面对chiah-ê迫害ê时，大家koh khah需要彼此互相鼓励，m̄-thang受tio̍h外力ê影响而放弃信仰。

「m̄-可恶报恶」，chit句话mā是伊写phoe hō͘罗马教会讲过ê话（参考罗马书十二：17）。使徒保罗认为伸冤ê主权tī上帝，上帝一定会「报应」。「为别人ê好处设想」chit句话，是比前一句ê「bē-tàng恶报恶」来得koh khah积极。

第16到18节，这短短三节，却讲出使徒保罗对一间有信仰见证ê基督教会ê期待kah ǹg望，mā ē-sái讲是伊为一间真正有美好信仰见证ê教会，拟出了一个准则，就是常常「喜乐、祈祷、感谢」chit三项ê心境。Chia ê「tio̍h常常喜乐」，指ê是tī受tio̍h迫害ê chit种恶质ê环境下，tio̍h凭对koh活性命ê ǹg望，心中有喜乐。因为受迫害是为tio̍h福音ê缘故。Á tio̍h「常常祈祷」，这mā是不时被引用来劝勉今á日ê信徒ê一节经文。祈祷乃是kah上帝对话，mā是基督徒性命力量ê来源。会祈祷ê人，就是teh表明伊ê心中有上帝。然后伊讲「tī任何环境中lóng tio̍h感谢」，chit句话koh khah清楚讲出基督教信仰ê特性，因为一个有真实基督教信仰ê人，伊真清楚知影有án-ne ê一工，性命会koh活tī上帝面前。因为án-ne，在世间所经历到ê各种境遇，lóng是为tio̍h将来koh活作准备。

使徒保罗强调以上三项lóng是tùi上帝来ê旨意，伊án-ne讲，是为tio̍h beh鼓励帖撒罗尼迦ê信徒努力以赴，m̄-thang听tio̍h伊án-ne讲，就认为无可能，因为信仰乃是一门性命ê功课，需要用心学习，mā需要学习克服所tú-tio̍h ê困难。

第19到22节，chia「抑制」一词，原本是teh指kā火消灭ê意思。圣神ná亲像一把火，会hō͘人ê性命火烧起来。有圣神充满ê人，就是性命充满活力ê人。仝款ê，有圣神充满ê教会，会充满tio̍h活力，hō͘人感受tio̍h教会积极tī福音ê事工上做见证。「m̄-thang轻视信息ê传讲」，chia所讲ê「信息」，是teh指上帝ê话。使徒保罗强调圣神siōng好ê恩赐，就是传讲起帝拯救ê信息。M̄-koh上帝ê话一定tio̍h忠实传达，chit点是非常重要ê。使徒保罗tī chia koh一pái说明等待耶稣基督koh再临ê要件，就是众信徒想beh保有siōng好ê心灵，就一定tio̍h弃绝邪恶，坚持保守美好ê见证，án-ne chiah ē-tàng谈得上准备siōng好ê心灵，thèng候主koh再临ê日子来到。Á「查验每一件事」，这对当时弥漫tio̍h真chē怪异论调诱惑人心ê传说，确实是一件真重要ê功课（参考歌罗西书二：4、20—23）。

第23到24节，使徒保罗写chit封书信hō͘帖撒罗尼迦教会一开始就用「平安」，这字原本表示ê意思是「无惊惶」、「无koh有死亡ê威胁」。紧接「平安」ê，就是「圣洁」，而且「完全圣洁」。「圣洁」所表示ê乃是「分别为圣」ê意思。Mā就是有无仝ê意思。伊tī chia特别提起「灵、魂、体」ê「完全圣洁」，意思是teh指一个全人格ê「圣洁」。使徒保罗强调上帝是「信实可靠」ê上帝。所谓上帝是「信实」上帝，就是teh指上帝会照他所答应ê事去完成。圣经ê作者一再kā咱讲，上帝是遵守约ê上帝。

第25到28节，chit段是本书信ê结尾。使徒保罗一再期待帖撒罗尼迦教会ê信徒为伊kah其他同工代祷。伊写hō͘歌罗西教会ê书信mā是án-ne， ài大家为伊kah其他众同工传福音ê事工祈祷（参考歌罗西书四：3）。使徒保罗写chit封书信，并m̄是只hō͘某某教会ê长老á是执事、代表看ê，而是beh hō͘全体信徒看ê。因为án-ne，伊要求chit封书信tio̍h公开朗读hō͘大家知影。Mā因为án-ne，chit-ê书信会流传落来，因为必定有真chē人听了后，iáu想koh再阅读一pái á是几pái。最后chia用「恩典」一词，表示ê就是koh活ê救恩ê意思。