重新查询
经文:

约翰一书 1:1-1:10

注释:

短短只有10节ê一章经文,却讲出chit本书信两个重要ê主题:一是性命之道,就是tī耶稣基督ê性命里。二是上帝是疼,这疼带来性命ê亮光,这光hō͘所有信耶稣基督ê人,lóng thang看见性命ê ǹg望。

第1节,作者开始就清楚写出伊会án-ne写chit-ê书信ê原因,就是beh kā伊所知影ê有关「性命之道」陈述hō͘大家明白。作者讲这「性命之道」是伊(mā可能iáu有其他做伙同伴)「听见」,而且「亲目看见」,又koh是「亲手摸过」ê。作者用chit种方式teh说明一件事:伊chit-má所讲ê lóng是事实。

Koh讲,chit封书信iáu有一个特别ê所在,就是无作者ê自我绍介。这kah第一世纪ê时代,写书信ê lóng是作者先自我绍介ê方式大无相仝。
Chia所提起ê「性命之道」中ê「道」,是teh指众使徒所beh见证ê信息,就是关系性命得tio̍h拯救ê好消息ê意思。因为án-ne作者用「阮」,这表示m̄是只有一个人ê见证,却是有大多数共同ê见证。

作者会强调所beh见证ê信息,lóng是经过「亲手摸过」,这是因为早期教会中有人认为耶稣基督并m̄是真实ê人存活tī chit世界上,却是一种虚幻、想像ê、m̄是真实ê。如果是虚幻ê、想像ê存在,就无可能摸会tio̍h。因为án-ne,当做者强调「亲手摸过」chit句话ê时,是teh说明chit件事确实是真正,m̄是虚幻想像ê,伊kah其他同工就是beh见证chit件in亲耳听见、亲目看见,并且iáu用in ê手摸过,chiah做出chit种见证。

第2节,tī chia作者强调chit-ê in听过、亲目看见、亲手摸过ê性命,就是「永恒ê性命」。Á这mā是约翰福音siōng中心ê一个主题,就是有关「永恒ê性命」问题。如果讲tio̍h「永恒性命」,就是teh表示这性命是过去就存在、chit-má mā存在,将来一直存在。换句话讲,性命无时间ê限制,却是超越时间ê。作者讲chit-ê「永恒性命」是kah上帝同在ê性命,而上帝乃是永恒ê上帝,因为án-ne,kah上帝连结做伙ê就是永恒ê性命。

第3节,chit节是续接第1节所讲ê,传扬耶稣基督福音ê人,siōng主要ê工作,就是beh kā「所看见」、「所听见」ê事实见证出来,并且「传hō͘」接受福音信息ê人。作者tī chia koh khah进一步kā上帝、耶稣基督kah所有相信ê人,三者之间连结做伙。Tī耶稣基督内面,信ê人会得tio̍h永恒ê性命,而这永恒ê性命就是kah上帝连结做伙ê。

作者tī chia用「团契」chit-ê字,chit-ê字ê希腊文是「koinonia」,意思就是紧tòe在身边、mā是「一部分」ê意思。换句话讲,tī耶稣基督ê人,就是kah耶稣基督分bē开,是交织相连tio̍h,mā同时kah上帝ê关系亲密做伙ê意思。

第4节,chit节讲出传福音ê人,kah听而相信ê人lóng会得tio̍h仝款ê结果—「喜乐满溢」。所谓「喜乐满溢」,thang参考诗篇第一三三篇所形容ê,兄弟姊妹和睦相处,自然就会散发出特别ê香气。

第5节,「上帝是光」,这mā是约翰福音作者非常重要ê见证,Tī该福音书中,作者就án-ne讲:「光照射乌暗,乌暗从来m̄-bat有赢过光。」(约翰福音一:5)然后koh讲:「he kan-taⁿ讲是真光,来到世间照亮全人类。」(约翰福音一:19)然后tī第八章12节,耶稣基督就án-ne对大家讲:「我是世界ê光;跟tòe我ê,会得tio̍h性命ê光,绝对bē tī黑暗里行。」而chit-má约翰一书ê作者讲「上帝是光」,并且讲这是tùi耶稣基督听tio̍h ê消息。因为án-ne,有可能就是作者听过耶稣讲「我是世界ê光」chit句话,并且确定耶稣基督就是tùi上帝来「道成肉身」tī人中间,因为án-ne,作者用「上帝是光」来替换耶稣基督所讲ê「我是世界ê光」,就是为tio̍h是beh表示一个重要ê信息:tī耶稣基督内面,就有性命ê ǹg望。

第6节,chit节真清楚说明一个真正信靠耶稣基督ê人,就是一个性命有ǹg望ê人,这ǹg望就是tī koh活kah永恒ê性命。作者tī chia讲信耶稣基督ê人,就是kah伊同属一个「团契」,mā就是交织做伙ê意思。因为án-ne,如果一个自称是基督徒ê人,必定是对koh活ê性命koh再存 chiok厚ê ǹg望,chit种人才是明白上帝救恩ê人。

Chit节提起「行为bē合真理」chit句话,意思是teh指行为无符合上帝ê旨意á是教示。这真清楚teh强调:行为kah信仰一定tio̍h相符合,若无,就是虚假、不实在,mā是自我欺骗。

	第7节,tú好kah第6节相对应;tī第6节讲tio̍h行为无符合上帝教示者,就ná亲像生活tī黑暗中ê人仝款,性命无甚么好ǹg望ê。M̄-koh相对ê,就是生活样式符合上帝旨意ê人,in就ná亲像生活tī光明中,这是kah上帝来往关系密切ê人。

	Chia特别强调一个人若是kah上帝和好,伊就是hō͘「耶稣ê血洗净」一切ê罪ê人。会án-ne讲,就是beh phah破当时流传tī教会中ê错误观念,认为耶稣基督并m̄是真实生活tī chiah-ê世界上。因为若是耶稣基督无真实存活tī chiah-ê世界上,就m̄免谈耶稣基督ê死;因为耶稣基督确实死tī十字架上,chiah会流血。Á幻影是无血肉之躯ê,会流血就表明是真实ê肉身。

	「耶稣ê血洗净咱一切ê罪」,这是teh说明信耶稣基督流ê血洗净人ê罪,hō͘人「圣洁」。因为上帝是圣洁ê,他希望他ê子民mā是圣洁ê(参考利未记十一:45、十九:1—2、二十:7、26)。

第8节,所谓「有罪」,tī基督教信仰中,并m̄是指hiah-ê律法上ê问题,却是teh表示kah上帝ê关系破坏、疏远à。Á是讲tùi上帝ê救恩中被隔离出来ê意思。

第9节,chit节提起一个人若是知影家己ê软弱、有限,就是等于承认家己是一个有罪ê人,chit种人,上帝必定会愿意「赦免」,因为上帝乃是「信实公义」ê。圣经teh讲上帝ê「公义」ê时,表现出来ê就是上帝ê怜悯kah慈爱。Á上帝ê怜悯kah慈爱,就是tī耶稣基督身上显现出来。使徒保罗tī罗马书第三章26节说明上帝ê公义,显明出来就是他拯救ê疼。

上帝是「信实公义」ê上帝,这是kui本圣经真重要ê信息。当圣经讲上帝是「信实」ê时,chit-ê信实kah「约」有关系,表明上帝是一个守「约」ê上帝(参考诗篇八十九:28、34)。

第10节,chia是第三pái用「如果阮讲」chit种词句(参考第6节、第8节),这是作者想beh戳破当时hiah-ê乱传信息者所用ê语句之方式。因为án-ne真清楚ê kah听讲「如果阮讲」chit种语词。作者讲一个人若是m̄承认家己「犯过罪」,这kah拒绝上帝tī耶稣基督内面ê疼仝款,chit种人无办法见证上帝是疼。因为上帝ê疼就是tī耶稣基督内面显现出来ê。Mā因为耶稣基督ê疼,chiah hō͘人ē-tàng kah上帝和好。

经文:

约翰一书 2:1-2:29

注释:

一个基督徒既然领受了新ê祝福而拥有新ê性命,必定会有新ê命令ài伊去遵行。约翰一书ê作者tī chit方面写了真chē,这mā是第二章重要内涵之一。Tī这章,作者几个重要观点:一是耶稣基督ê疼,hō͘人ê罪因为án-ne得tio̍h赎回。二是人tī耶稣基督ê救恩里,真自然tek会kā耶稣基督ê疼表现tī生活中,chit种性命,ná亲像看见亮光仝款,充满ǹg望。M̄-koh相对ê,就是犹原活tī黑暗中。三是作者提醒所有ê信徒,tio̍h注意chit-ê世界ê诱惑,小khóa不慎就会掉落tī陷阱中。Chiah-ê诱惑包括肉体、眼目的欲望,kah人ê虚荣心。四是作者提醒大家tio̍h谨守起初所听tio̍h ê福音信息,mā就是tī tāi先感动人心ê信息。

第1节,tī约翰ê书信中用「众细kiáⁿ」chit句话相当chē,亲像除了chit节外,iáu有第二章12节、18节、28节、第三章7节、18节、第四章4节、第五章21节等等。作者用chit种称呼只有一个目的,就是beh hō͘读者感觉作者看待读者ná亲像家己ê kiáⁿ一般hit种ê亲密。

Chit节提起讲写phoe ê目的是beh hō͘受信ê读者「不犯罪」,这包含两种意义,其一就是teh指对耶稣基督有明确ê信心,m̄-thang弃sak原来所持有对耶稣基督ê信仰。其二是teh指生活规律上bē有违法乱纪ê行为,mā就是一般所讲ê,信耶稣基督ê人应该活出信仰ê好模样,hō͘人看出耶稣基督ê信徒kah一般人无仝款。因为án-ne,chia所讲ê「不犯罪」,是有含警戒作用,是预防在先,因为已经有过去ê经验。

第2节,chia提起tī耶稣基督内面显现出来ê就是上帝丰富ê疼。作者提起耶稣基督ê赦免有三个特点:

一是伊ê赦免是「公义ê」。Chia所讲ê公义,就是怜悯、赦免ê疼。

二是耶稣基督「牺牲家己」。Chia ê牺牲是一种奉献性命ê疼。因为耶稣基督死tī十字架上,是ná亲像为tio̍h赎罪而献tī祭坛上ê祭物,chit种献祭是一种「赎回祭」,mā称做「赎罪祭」。耶稣基督ná亲像chit种赎罪ê牲祭仝款,kā性命献祭tī十字架上。

三是耶稣基督ê赎罪是为tio̍h「全人类ê罪」,却m̄是只为tio̍h犹太人而已。Chit点非常重要,mā是kui本新约圣经所beh宣扬ê见证。

第3节,chia所用ê「认bat」,希腊文是「ginoskomen」chit-ê词,mā是约翰chit本书信ê作者siōng ài用ê一个词,tī chit本书信中则了二十六pái。Chit-ê词ê意思是teh指:经过直接ê接触而认bat。Án-ne讲起来,一个人认bat上帝,是因为kah上帝有直接接触过。M̄是凭空想像,mā m̄是单单tùi别人听tio̍h。Ná亲像作者tī第一章特别强调「亲手摸过」(参考一:1)仝款,chit-má是讲因为有过接触而「认bat」。换句话讲,chit-ê「认bat」是确确实实ê,m̄是捏造ê。

第4节,作者强调一个信徒一定tio̍h有一个基本原则,就是信仰kah行为是分bē开ê。当基督徒讲伊「认bat」上帝ê时,却m̄听上帝ê话,á是m̄遵守上帝Tī圣经中ê教示,án-ne beh对人讲「认bat」上帝,是真讽刺mā是「讲白贼」ê话。雅各书ê作者就是án-ne强调ê,认为一个人若是beh讲家己有信心,就一定tio̍h tī行为上见证出来,若无,hit-ê人ê信心就是死ê(参考雅各书二:17)。

第5到6节,chit两节是继续teh解释第4节所提起ê,一个真正认bat上帝ê人,一定tio̍h tī行为上显明伊有确实遵行上帝ê道,就是性命之道(参考一:1)。作者tī chia指出ê「上帝ê道」,是比第3节所提起ê「上帝ê命令」iáu koh khah阔;上帝ê命令,指ê是诫命、典章、规例等。M̄-koh「上帝ê道」则包括所有ê教示、劝勉、指引,mā就是上帝指示ê一切旨意。
Tī chia,约翰书信ê作者强调真正疼上帝,就是会遵照「耶稣基督ê言行生活」去行。Á án-ne行,就是teh表明kah耶稣基督连结做伙。Thang用一句话来表明耶稣基督ê言行kah生活,就是一个「疼」字。因为「疼」就是「完全」上帝ê旨意,mā是实践了上帝ê道。

第7到8节,tī第3到4节提起基督徒应该遵守上帝ê命令,chit-má chia提起「旧ê命令」是tùi「一开始就领受」,而且「已经听过了ê信息」,这thang tùi两个方面来了解:

其一是teh指摩西律法ê教导,就是beh全心、全情、全力疼上帝(参考申命记六:5),mā tio̍h疼厝边ná亲像家己(参考利未记十九:18,路加福音十:26—28)。作者讲这m̄是新ê,却是旧ê。

其二是当加入基督徒信仰团契ê时,听tio̍h耶稣基督ê教导是beh彼此相疼(参考约翰福音十三:34—35)。Chia虽然所讲ê是「新ê」,其实,mā是「旧ê」,这ná亲像第7节开始所提起ê,「m̄是新ê命令」。因为耶稣基督已经教导过,只不过是koh一pái提起而已。

耶稣基督ài所有跟tòe伊ê人lóng kā chit「彼此相疼」ê教示列入tī团契生活,因为只有疼chiah ē-tàng hō͘一个团契亲密地结合做伙,ná亲像耶稣基督kah上帝连结,成做一体ê样式(参考约翰福音十七:11b、21—23)。

	第9节,chia作者用「光明」kah「乌暗」做譬喻,主要是希望读者一看就清楚明白,光明kah乌暗是无法度并存ê。Ná亲像tī一个人若是有疼,就bē有恨。Ná亲像tī一间房厝内,若是有光照耀ê所在,乌暗一定会消失仝款。作者án-ne讲,就是tī进一步解释第5节所提起ê「hiah-ê讲伊有上帝ê性命ê,应该照耶稣基督ê言行生活」chit句话,就是hō͘生活见证出信仰ê内涵,m̄是只停留teh讲讲而已。

	第10节,疼,如果是用「光」来代表,án-ne,「光」就是引chhōa性命ê路径。有「光」teh引chhōa ê人,当然就bē「失足犯罪」,koh khah bē成做别人跋倒ê绊脚石。

	第11节,chia讲「hiah-ê恨兄弟á是姊妹ê,就是tī黑暗中」,chit种人是ná亲像「目睭chheⁿ-mê了」ê人仝款,性命失迷方向。Án-ne,thang了解作者tī chia所beh说明ê就是:hō͘人弃sak上帝救恩ê,就是绊脚石。这mā讲出初代教会hiah-ê传说耶稣基督无真正生活tī chit世界上ê人,就是chit种人,in hō͘人离开koh活ê耶稣基督ê救恩,chhōe bē-tio̍h性命koh活ê方向,ná亲像chheⁿ-mê人仝款。

第12到14节,细注意一下短短三节经文中,一再出现ê一句话,就是「我写phoe hō͘ lín」,chit句话共计出现六pái,其中有三pái出现tī第14节中。Thang kā chit段经文分做两组,其一就是第12到13节,其二就是第14节。Á这两组ê对象程序lóng仝款,先tùi「众细kiáⁿ」,然后是「众父老」,koh来就是「众青年」。

Tùi作者用「众细kiáⁿ、众父老、众青年」等chit种词句来看,kah-ná读者分做三种无仝ê年龄层,其实,并m̄是指年龄,却是用信仰ê内涵来区分。Mā就是有人tī信仰上真坚定,m̄-koh有ê人却是初信者。

M̄-koh有另外一种看法,认为chia只有两种对象,其一就是tī信仰上比较有资深经验者,另外一种则初信者,ná亲像婴á仝款,而所谓「众细kiáⁿ」,是包括所有ê读者在内。对hiah-ê tī信仰上有过历练、成熟ê长者,作者tī chia提起in认bat「hit位tùi太初就已经存在ê」,chit句话m̄-nā teh讲万物ê起源tùi上帝来,mā同时teh讲上帝早就已经存在了(参考出埃及记三:14)。
第三个对象就是hiah-ê「众青年」,是teh指hiah-ê tī信仰上算是tú入门ê,á是tú加入基督徒信仰团契ê人。作者tī chia提起两件重要ê事,其一就是tī第13节讲chiah-ê「少年人」已经「赢过hit-ê邪恶者」,其二是讲in「强壮」,因为有「上帝ê道」活tī in ê性命中。

所谓「赢过hit-ê邪恶者」,指ê就是第三章8节、10节所提起ê「魔鬼」(参考约翰福音八:44)。魔鬼,这是teh指诱惑人弃sak上帝ê话ê气力,因为án-ne,chia指ê就是chiah-ê少年人已经赢过chit种诱惑。如果「少年人」指ê是hiah-ê初信ê信徒,á是用现代teh描述信徒ê话语,指ê就是「第一代」信徒来讲。

Koh讲,作者mā提起因为有上帝ê话tī in ê性命中,hō͘ in tī信仰上mā真强ê意志力,不受tio̍h魔鬼ê诱惑,并且赢过hit-ê邪恶者。Chit点mā往往是第一代信徒siōng美好ê见证。

第15到16节,chia所提起ê「世界」,指ê就是第16节所讲ê「肉体ê欲望、眼目的欲望、人ê一切虚荣」等等chiah-ê领域讲ê。却m̄是上帝创造hō͘人类kah所有万物所生存ê chit-ê世界。作者会án-ne讲,是希望读者千万m̄-thang kā疼ê对象弄错,而是beh先弄清楚。作者kā「疼上帝」kah「疼世界」作一个对比,ài读者一定tio̍h kā二者分清楚,并tī其中选一。Chit种写作ê方式,mā是chit本书信作者siōng欢喜使用ê笔法,伊用「光明」kah「乌暗」譬喻做「性命」kah「死亡」,然后tī chia用「疼上帝」kah「疼世界」譬喻「永远生存」kah「消失去」。

Chit种鲜明ê对比就是beh hō͘读者容易明白其中ê差别,tī选择ê时chūn就bē有混淆,á是憢疑。作者beh kā所有ê读者讲,tī chiah-ê世界上有真chē诱惑充满teh生活ê每一个角落,chiah-ê lóng是hō͘人离开上帝ê教示。

第17节,chia提起「疼上帝」kah「疼世界」对比ê结果,就是chit-ê世界所带hō͘人ê欲望,lóng「当teh消失去」,而「疼上帝」而且去遵行上帝旨意ê人「会永远生存」,这是teh指得tio̍h永恒性命,mā是teh指拥有「疼」ê性命。使徒保罗讲过「疼是永恒ê」(参考哥林多前书十三:8a),其它ê一切lóng会跟tòe时间ê消失去,á是跟tòe世间ê转变有变化,甚至消失殆尽。

Chia强调「实行上帝旨意ê人」chit句话,tú好回应了耶稣基督所讲ê教导(参考马可福音三:35)。Chit句「实行上帝旨意ê人」,表示出来ê意义,就是kah耶稣基督建立「亲属」ê人,而耶稣基督kah上帝是成做一体ê(参考约翰福音十七:11),因为án-ne这确实去实践了上帝旨意ê人,是kah上帝有bē-tàng分ê关系。

第18节,作者讲「世界ê终局就beh到à」,表示上帝审判ê时刻teh beh跟tòe来到。Chit时「对敌基督者beh来」,其实,thang理解世界末日会án-ne来临,是因为chiah-ê对敌基督ê势力嚣张大胆,甚至m̄ kā上帝khǹg tī眼内。因为án-ne,引起上帝ê忿怒,决定严厉惩罚chiah-ê对敌基督者。

「对敌基督」chit-ê词只出现tī约翰ê书信中,tī本册第二章22节、第四章3节、约翰二书7节等等lóng有。Tī chiah-ê经文中,作者提起几种「对敌基督」者ê特性:一是in否认耶稣基督真正降生tī chiah-ê世界上(参考四:1—3,约翰二书7节),mā同时否认耶稣是性命ê救主(参考二:22)。二是in拒绝圣父上帝就是万物性命ê创造者kah主宰(参考二:22)。三是in无愿意公开承认圣父、圣Kiáⁿ(参考二:23)。四是in欢喜讲白贼(参考二:22),因为chit种人就是心内m̄信有上帝ê人。Tī chiah-ê经文中thang明显看出作者用「对敌基督」chit-ê词句ê时,所beh讲ê就是:只要是拒绝承认耶稣基督是真正活tī chiah-ê世界上,而且m̄承认chit-ê世界万物lóng是tùi上帝来创造ê人,就是「对敌基督者」。

第19节,chit节说明基督徒所建立ê信仰团契—教会,就是承认耶稣基督就是性命ê主;伊真正活tī chiah-ê世界上,bat kah人仝款生活tī chiah-ê世界。Tùi chia thang看tio̍h早期教会内部发生ê问题之一,就是有人因为m̄承认耶稣基督是一个真正人,而离开教会。

第20节,chia ê「圣者」,是teh指耶稣基督。注意,这m̄是只表示尊敬ê称呼,却是含带有「赐永生话语」ê意思。因为án-ne,「圣者」mā teh表明是ē-tàng hō͘人得tio̍h永恒性命ê气力,mā是有含洁净人心灵ê气力(参考马可福音一:24)。

「恩膏」,chia tī希腊文并无「恩膏」chit-ê字,只有「膏」而已。这有两方面ê意思,其一是teh指贵重物件,古代用香油来抹tī君王á是特定ê对象身上,hō͘ chit-ê受膏者得tio̍h人民ê尊崇,mā同时表示上帝会赐hō͘这受膏者有「一粒新ê心」,而且被圣神充满tio̍h(参考撒母耳记上十:9—10)。

其二,chit-ê「膏」iáu有另外一个意思,是teh指对上帝有明确ê认bat。这mā是讲做一个人hō͘ 上帝ê恩典充满ê时,chit-ê人是对上帝有清楚认bat ê人,bē受tio̍h迷惑á是诱惑而离开上帝ê救恩。

第21节,chia指出「真理」kah「虚谎」是相对立ê;真理,所表示出来ê,就是实在。虚谎,意思就是不诚实ê。作者讲只有确信耶稣基督就是真实活tī chiah-ê世界,而且性命ê救主,chiah会看chit-ê书信,mā是伊写chit-ê书信ê主要目的,为tio̍h是beh帮助大家koh khah清楚信仰。

第22到23节,chit两节进一步teh解释甚么人是对敌基督ê人。Tī chia作者讲hiah-ê专门teh教会中讲白贼ê人就是。Kā第22节对照第二章4节来看,就会koh khah清楚作者ê用心。「讲白贼」所指ê,就是既然讲「认bat上帝」,就应该tio̍h清楚知影上帝kah他ê独生kiáⁿ耶稣基督是无法度分开ê,既然承认上帝是圣父,án-ne就应该承认上帝ê kiáⁿ耶稣基督就是圣Kiáⁿ。因为án-ne,作者tī第23节用相对性ê句话,讲出真正信徒就是承认上帝是疼,而他ê疼是透过耶稣基督ê救赎恩典显明出来。相对ê,若是m̄是认chit件事,等于否认上帝是疼仝款。

第24到25节,「谨守当初所听tio̍h ê信息」,这是teh指一个基督徒怎样接触tio̍h福音ê信息,并且感动soah决定接受,这是非常珍贵ê信仰,m̄-thang放弃。「当初所听ê信息」,mā是teh指siōng单纯ê信仰内容kah认知。作者讲án-ne就会「常常活tī圣Kiáⁿ kah圣父ê性命里」,chit句话讲出一个纯洁信仰者siōng珍贵ê所在,ná亲像耶稣基督所讲ê:「心地纯洁ê人jōa-ni̍h-á有福ah;in ài beh看见上帝!」(马太福音五:8)所讲ê「活tī圣Kiáⁿ kah圣父ê性命里」,这表示chit种人必定kah上帝,以及耶稣基督分bē开。
「永恒ê性命」,这是有含祝福ê「应允」。只要是kā当初所听ê信息护守tiâu,无放弃,mā无遗失,chit种人lóng会因为án-ne得tio̍h耶稣基督所应允「永恒ê性命」之福气。

	第26到27节,作者讲伊写chiah-ê有关永恒性命ê事,主要是teh拆破hiah-ê混入教会「欺骗」信徒ê人。因为in一再强调耶稣基督并无真实地活tī chit世界上。M̄-koh这真清楚:如果无耶稣基督真正活tī chiah-ê世界上,就bē有伊死tī十字架上ê事件,mā就bē有koh活ê神迹显chit-má众人面前。

	Chia ê「伊ê灵」,这tī中文《和合本版本》用「恩膏」,tī《台语汉字本》圣经用「抹油」,《吕振中教授版本》用「膏沐」,天主教《思高学会晓版本》用「膏傅」,这是因为古人认为做一个人被油膏抹ê时,表示chit-ê人拥有特别ê权力、地位。Tī chia mā有含chit种意思,表示当耶稣基督kā伊ê灵充满tī甚么人ê身上ê时,这就kah-ná耶稣基督以贵重ê香膏油倾倒tī chiah-ê人ê身上仝款,ē-sái chit-ê人充满力量。因为án-ne,tī chia所讲ê「恩膏」、「抹油」等,lóng是teh说明来自耶稣基督ê灵充满、灌ak仝款ê意思。Chit种人已经领受耶稣基督ê教导,就「无需要别人ê教导」,作者ê意思就是teh指hiah-ê用真深奥ê话语,并无一定就是tī信仰上有帮助ê教导。因为真正教导是来自耶稣基督ê灵,伊ê教导chiah是真实ê。使徒保罗就bat表示伊除了讲耶稣基督ê受难tī十字架顶之疼以外,m̄免「甚么华丽ê词藻á是高深ê学问」来宣讲上帝ê奥秘(参考哥林多前书二:1)。

	「Lín tio̍h顺从圣神ê教导」,chit句话ē-sái讲是作者诚心ê建议。圣神chiah是带领人认bat上帝救恩ê气力,m̄是人ē-tàng做甚么大事,特别是关系拯救性命ê事,绝对m̄是人用家己ê气力ē-tàng达成,chit点tī基督教信仰来讲是非常重要ê认bat。因为án-ne「顺从圣神ê教导」,mā是hō͘信徒谦卑tńg来到上帝面前ê siōng好途径。

	第28节,tùi chit节开始,直到第四章6节止,chit段经文中,作者kā重点khǹg tī「怎样chiah ē-tàng成做上帝ê kiáⁿ」chit-ê主题上。作者khah强调一个基本ê信仰观念:信仰,是一定tio̍h用实际ê行动表现出来,若无,信仰就无甚么意义thang讲。

「头尾活tī基督ê性命里」,chit句话ê意思真清楚,就是teh指出一个耶稣基督ê信徒,一定tio̍h kah耶稣基督相连结做伙,án-ne chiah会kah上帝相连。因为耶稣基督就是性命ê源头,tī伊ê内面,chiah有性命ê果子。当有一工伊「koh来ê日子」,有结果子ê信徒就ē-tàng「坦然无惊惶」面对tio̍h主耶稣ê审判。

第29节,当圣经讲「公义」ê时chūn,指ê就是上帝ê怜悯、赦免、慈悲、公正无私等。Kui本圣经lóng teh强调上帝是公义ê,m̄-nā án-ne,公义ê上帝mā喜爱他ê子民行公义(参考阿摩司书五:24,弥迦书六:8)。

	作者讲「遵行公义ê人就是上帝ê kiáⁿ」chit句话,说明上帝ê公义kah上帝ê疼是仝款ê,因为无疼ê所在,对人ê苦难就bē有怜悯、同情ê心。只有建立公义chiah会hō͘人看tio̍h伊ê性命有上帝同在。


经文:

约翰一书 3:1-3:24

注释:

Tī chit章经文中,作者koh一pái强调上帝ê kiáⁿ应该表现出上帝ê疼。有真实ê疼,绝对bē去为非作pháiⁿ。作者koh一pái说明tī教会chit-ê信仰团契里,siōng重要ê见证,就是知影彼此相疼。只有疼,chiah ē-tàng见证耶稣基督ê救恩,mā是上帝ê kiáⁿ。Á chit种疼,是实际ê行动,并m̄是停止tī口头壳顶ê疼并且实际kā疼实践出来ê人,chiah会tī审判来临ê时,坦然无惊惶地面对性命ê主。

第1节,chia继续提起「上帝ê kiáⁿ」chit-ê观点,强调这是上帝hō͘ in信靠耶稣基督ê人ê特权。Chit-ê「kiáⁿ」一词ê希腊文「tekna」,是tùi「生产」(tekein)一字转换而来ê。Án-ne就真有意思了,因为作者有意思beh表明一件事:一个信靠耶稣基督ê人,虽然是tùi人所生ê,m̄-koh上帝却kā伊视同己出。当上帝kā信徒看做ná亲像他亲生ê kiáⁿ ê时,一定tio̍h会记得上帝是神圣ê,所有ê信徒一定tio̍h有过圣洁ê生活来对称。因为若是无保持圣洁ê生活,就有污辱上帝圣名ê危险(参考利未记廿二:31)。

第2到3节,chit两节是带有应允ê经文,作者讲现今在世间成做上帝ê kiáⁿ,将来一定会享受看tio̍h耶稣基督显现ê福气。使徒保罗认为性命中siōng大ê恩典,就是tī大马士革ê旅途中tú-tio̍h koh活ê耶稣基督,这mā ē-sái讲是影响使徒保罗一生ê关键事件(参考哥林多前书十五:8—10)。因为看见koh活ê耶稣基督显现,改变了伊对性命ê态度,mā成做伊性命siōng大ê恩典,chit种恩典就是kah上帝同工,这mā是基督徒siōng大ê期待,成做上帝ê同工得tio̍h ê赏赐就是看见koh活ê耶稣基督。Ná亲像án-ne,作者讲每一个心存án-ne ǹg望ê信徒,lóng会知影保持家己「纯洁」ê心灵,因为这是准备ài kah koh活ê耶稣基督见面siōng重要功课。

第4节,chia提起「上帝ê律法」,chit方面是teh指摩西律法讲ê,另外一方面则是teh指上帝ê旨意。换句话讲,罪ê特色,就是hō͘人脱离上帝ê旨意,m̄ kā上帝ê教示、诫命当做一回事。

第5节,chia thang看tio̍h一个清楚ê信息:耶稣基督之所以降生到chit世界上,就是beh除往生人ê罪。希伯来书ê作者讲耶稣基督来到世间就是为tio̍h beh「洁净罪」(参考希伯来书九:26),hō͘人ē-tàng因为án-ne而圣洁tńg来到上帝面前。

第6节,作者tī chia指出只有一种人会藐视上帝拯救ê恩典,甚至会以自高ê态度看待上帝ê救恩,chit种人就是无tú-tio̍h过耶稣基督ê人,á是根本m̄-bat耶稣基督ê人,chit种人会「继续犯罪」,in对罪恶有喜好。

另外一方面,作者除了用光kah暗、好kah pháiⁿ ê对比之外,tī chia则用「犯罪」kah「不犯罪」两种对比ê词句,hō͘读者一看就清楚知影伊所beh传达ê信息。伊讲tī耶稣基督内面ê人,会知影珍惜上帝ê救恩,bē koh再继续「犯罪」;相对ê,一个不认耶稣基督是伊性命救赎ê人,就是继续生活tī罪恶ê内面,因为chit种人会藐视上帝,mā拒绝上帝ê救恩。

	第7到9节,tùichit三节经文thang看出是kah头前第4到6节是仝款ê,作者koh一pái说明信靠耶稣基督救恩ê人,kah m̄信者之间ê差别:

第4节:「hiah-ê犯罪ê」	第8节:「继续犯罪ê」
第4节:「违背上帝ê律法」	第8节:「是属tī魔鬼」
第5节:「基督显现ê目的是beh除罪」	第8节:「上帝ê kiáⁿ显现了,目的是beh毁灭魔鬼ê工作」
第6节:「活tī基督性命里ê人lóng m̄犯罪」	第9节:「上帝ê kiáⁿ lóng m̄继续犯罪」

	「m̄-thang hō͘别人欺骗」,意思就是m̄-thang hō͘别人「诱惑」。会诱惑人ê是撒旦、魔鬼。in诱惑人ê主要目的,就是beh hō͘人离开上帝ê法则。作者讲beh「遵行公义」,chit种人才是「义人」。所谓义人,意思是teh指kah上帝关系和好ê人。Kui本圣经lóng teh强调上帝是公义ê,因为án-ne,做上帝ê kiáⁿ,siōng重要ê,就是beh hō͘上帝ê公义显明出来。Á显明上帝ê公义,siōng简单ê方式就是「bē继续犯罪」。

「魔鬼tùi起初就犯罪」,chit句话thang参考创世记第三章诱惑人犯罪ê「蛇」,它teh代表撒旦、魔鬼。约翰福音第八章44节án-ne讲:
「Lín原是魔鬼ê kiáⁿ,kan-taⁿ想beh随从老父ê欲念做tāi-chì。Tùi起初伊就是谋刣者,从来m̄-bat khiā tī真理一边,因为伊根本无真理。伊讲白贼是出tī本性;因为伊本是讲白贼者,mā是一切虚谎ê根源。」

Tùi chit节经文thang看tio̍h魔鬼siōng大ê特色界是讲白贼,目的就是beh hō͘人离开上帝,去做犯罪ê勾当。Á上帝差遣他ê独生kiáⁿ耶稣基督到世界起来ê主要目的,就是beh毁灭魔鬼,hō͘人知影悔改、认罪,tńg来到上帝ê面前。一个属tī上帝kiáⁿ ê人,就bē koh再继续犯罪,因为上帝ê kiáⁿ已经真清楚知影耶稣基督为tio̍h伊tī十字架上献上珍贵ê性命,因为án-ne人无应该koh再继续犯罪,若继续犯罪是无法度面对上帝ê。除了耶稣基督ê救恩之外,人无法度chhōe-tio̍h另外一个机会thang赎罪,这mā是早期使徒彼得kah约翰共同ê见证(参考使徒行传四:12)。

Koh讲,上帝ê kiáⁿ是有「上帝ê性命tī in内面」,ná亲像头前所讲ê:上帝甚至是kā归向他ê人看做ná亲像他亲生ê kiáⁿ仝款。

    第10节,作者讲伊写chit本书信ê另外一个主题,就是beh讲tio̍h上帝ê疼(公义),这疼就tī每一个归向他ê人身上显明出来。作者用明显ê句型表明出来,就是「上帝ê kiáⁿ kah魔鬼ê kiáⁿ有真明显ê区别」;因为上帝ê kiáⁿ有疼,相对ê,魔鬼ê kiáⁿ无疼。作者无用真深奥ê哲理谈疼,伊kan-taⁿ用siōng简单ê、mā是siōng容易ê方式来要求信徒:tio̍h疼家己身边ê兄弟姊妹(参考约翰一书四:20—21)

第11节,chia koh一pái提起:「Lín tùi起初所听tio̍h ê信息就是:咱tio̍h彼此相疼。」作者tī第二章7节所提起,讲这并m̄是新ê道理,却是「旧ê命令」,而且大家lóng熟悉ê信息,就是「彼此相疼」。这mā是耶稣基督出来传福音ê时chūn,教导门徒一定会确实遵行ê道理,伊认为只有án-ne chiah ē-tàng证明in就是耶稣基督ê门徒。

第12节,chit节作者就举出实例来说明甚么是「彼此相疼」ê道理。作者tùi大家所熟悉ê该隐刣死小弟亚伯ê事件讲起,记载tī创世记第四章8节,mā是圣经中第一件谋刣案件。Ài beh特别注意ê所在,就是约翰一书ê作者tī chia指出:该隐杀害小弟亚伯ê chit种行为是「属tī邪恶者」。伊「刣死了家己ê小弟」,chia ê「刣」字,mā thang当做「屠杀」ê意思解释。Mā就是讲,该隐tī杀害伊ê小弟亚伯ê时,手段是非常残忍ê,非人性ê,差不多是kā亚伯当做动物一般。

作者mā Tī chit节经文中说明该隐会刣死小弟亚伯,是因为「伊ê行为邪恶」,相对ê是伊小弟「行为正直」。邪恶,意思就是偏离了上帝ê教示,而正直,是teh指掠tiâu了中心目标,这目标是teh指上帝ê旨意,因为án-ne,「正直」就是顺tio̍h上帝ê教示做tāi-chì。

第13节,作者讲一个敬虔ê基督徒,被chit-ê世界所「恨」,因为基督徒ê行为就是beh朝ǹg上帝ê教示行,而上帝ê教示就是疼,而且是beh人彼此相疼。M̄-koh chit-ê世界就是邪恶ê(参考创世记六:5、11—12、八:21),因为án-ne,如果基督徒遭遇像亚伯被兄哥该隐谋刣ê情况,mā m̄免惊奇,作者ê意思是这tùi án-ne一定会发生ê事。

第13节,「咱」kah「in」之间ê差别;「咱」,这是teh指信靠耶稣基督ê人,知影tio̍h kah兄弟姊妹彼此相疼,因为知影耶稣基督就是为tio̍h疼人类chiah来到世界上,并且mā是为tio̍h beh疼人类ê缘故而被钉死tī十字架上ê。明白耶稣基督ê疼,便晓得学习去疼别人。相对ê,一个无疼心ê人就是m̄-bat耶稣基督,因为tī chit种人ê身上看bē-tio̍h上帝ê疼。

第14节,「出死入活」,意思就是teh指基督徒已经因为耶稣基督拯救ê缘故,有koh活ê恩典。「koh活」,这就是超越死亡ê性命,mā就是永恒ê性命。Chia所讲ê「死」,是teh指罪恶ê意思(参考以弗所书二:、5,歌罗西书二:13)。耶稣基督讲一个人若听从伊ê话,就是一个「出死入活」ê人,是拥有「永恒ê性命」ê人(参考约翰福音五:24),意思就是teh指一个听从伊ê人,就会kah跟tòe伊ê教示去行,并ē-tàng脱离罪恶ê捆绑。

第15节,chit节kah前一节有相对ê意涵tī内面;tī前一节讲tio̍h有疼ê人,就有永恒ê性命。Á chit节soah讲有恨ê人,就无永恒ê性命。原因tùi该隐刣死亚伯ê事件来讲,该隐因为亚伯ê祭物hō͘ 上帝欢喜接纳,而伊ê祭物并无受tio̍h上帝ê欢喜(参考创世记四:4—5)而怀「恨」亚伯,并且设法kā亚伯刣死。约翰一书ê作者tùi chia讲tio̍h一个人若是会「恨」家己ê兄弟姊妹,就会亲像该隐刣死「刣人」仝款。有恨ê所在,就bē有疼。

第16节,chit节为第四章10节ê伏笔,主要就是tī说明因为有耶稣基督ê疼,人chiah会认bat上帝ê疼。另外一方面,作者mā tī chia强调疼ê本质就是牺牲性命,chit种牺牲m̄是为tio̍h求任何代价,而且心甘情愿ê牺牲之疼(参考腓立比书二:8)。因为án-ne,当耶稣基督teh劝勉他ê门徒tio̍h「彼此相疼」,ná亲像伊疼in ê样式ê时,就是希望in学习伊为人牺牲ê疼(参考约翰福音十五:12),伊甚至讲:「人为tio̍h朋友牺牲性命,无koh 有比这khah 大ê疼。」(约翰福音十五:13)

第17到18节,chit两节thang看出作者beh kā所有ê基督徒讲,kā耶稣基督ê疼用tī生活中,án-ne chiah是siōng重要而且有力ê信仰见证。若是一个「富有ê人」看见ê家己兄弟姊妹sàn-chhiah「缺乏」,却lóng bē想beh去救助,就无可能kah有人讲伊疼上帝。换句话讲,疼并m̄是嘴巴讲讲就算数,作者所强调ê疼是一种具体ê行动,却m̄是停止tī「口头壳顶ê疼」。

第19节,thang kā chit节对照约翰福音第十八章37节所记载ê,谈及耶稣基督回答彼拉多问伊是m̄是「犹太人ê王」ê时所讲ê话:「我是王,这是你讲ê。我ê使命是为真理做证,我为tio̍h án-ne而生,mā为tio̍h án-ne来到世间。凡是属tī真理ê人一定听我ê话。」基督徒就是属tī耶稣基督ê人,而耶稣基督就是为真理做证ê,因为án-ne,基督徒mā是teh为真理做证,是属tī真理ê子民。另外一方面,所谓属tī「真理」iáu有另外一个意义,就是属tī上帝ê。Tī第三章1节作者讲上帝「jōa-ni̍h-á疼咱!甚至称咱做上帝ê kiáⁿ」,上帝亲自kā所有信徒看做是ná亲像他亲自所生ê子女仝款。上帝是真理,是一切性命ê来源。Mā因为án-ne,真正属tī上帝ê kiáⁿ ê人,会按照上帝ê教导去行,因为án-ne就ē-tàng「tī上帝面前心安理得」。注意,chia特别强调是「tī上帝面前」,却m̄是tī人ê面前。

第20节,chit节提起上帝「洞察」人ê一切行为kah心思意念。只有上帝chiah有chit种能力,他m̄看人ê外表,却是看人ê心内(参考撒母耳记上十六:7,诗篇一三九:1—2,箴言廿四:12,路加福音十六:15)。

「上帝比咱ê心khah大」,chit句话是teh指上帝有够额ê宽容,会怜悯人ê软弱kah有限,因为án-ne,人虽然赤the̍h-the̍htī上帝面前,却mā因为人ê有限kah软弱,上帝并无会用真严厉ê惩罚对付人ê罪,却是会亲像诗篇ê诗人所讲ê:「因为他知咱ê 体质,数念咱是土沙粉。。(全民版)」(诗篇一○三:14)。

第21到22节,遵从上帝ê命令,听从他ê话去行,就是属tī真理,是上帝ê kiáⁿ,chit种人自然tek就bē有心理不安ê事出现。因为遵照上帝ê旨意去行,遵守他ê诫命、旨意ê人,就是上帝所kah意ê子民,上帝必定会应允chit种子民ê祈求,伊向上帝祈祷,必定会回应。

第23节,头前讲beh遵从上帝ê命令,chia则进一步解释上帝ê命令就是:一定tio̍h「信伊ê kiáⁿ耶稣基督」,以及照耶稣基督ê命令「彼此相疼」。表面上看起来kah-ná是两件事,其实只有一件就是相信耶稣基督。一个真正相信耶稣基督ê人,就会遵行伊ê命令。Á耶稣基督ê命令就是beh众信徒彼此相疼,因为án-ne chiah ē-tàng显示出kah伊之间ê亲密关系。

第24节,约翰一书kah约翰福音有一个共同观点,就是teh强调上帝ê kiáⁿ kah上帝之间ê bē-tàng分之关系。Chit种bē-tàng分ê关系,约翰一书ê作者用「活tī上帝ê性命里」kah上帝「mā tī人ê性命」chit种论点来表示。Tī约翰福音则用「成做一体」来说明(参考约翰福音十七:23)。其实,chit种观念是来自旧约圣经中,每pái提起以色列人民kah上帝之间ê关系ê时,就会用类似chit种句话:「我是你ê上帝;你是我ê子民。」(参考出埃及记六:7)而chit种ná亲像夫妻间誓约ê讲法,一再出现tī先知ê文献中,亲像:以赛亚书第四十六章4节、第五十一章16节;耶利米书第三十一章34节;以西结书第十一章20节、第三十四章31节、第三十六章28节。

经文:

约翰一书 4:1-4:21

注释:

Chit章ê kui个主题就是khǹg tī「上帝是疼」之主轴上。作者非常强调tio̍h用实际ê行动,见证上帝对人ê疼。因为疼就是上帝赏赐性命ê气力,因为án-ne,只要有真实之疼ê所在,就bē有惊惶。

另外一方面,作者mā强调,人会知影疼,是因为先体会tio̍h上帝ê疼,chiah想beh kā上帝ê疼分享hō͘其他人,chit种分享,thang先tùi疼家己ê兄弟姊妹开始。

	约翰一书作者beh kā所有ê信徒讲:就是因为有上帝ê疼,chiah hō͘人活着有性命ê ǹg望。Á这疼就是tī耶稣基督身上显明出来。

第1到3节,tùi chit段经文thang看tio̍h早期教会内部发生ê问题就是有人散布关系圣神ê错误信仰观念。哥林多教会mā是发生类似ê问题,而且非常严重,chiah会逼kah使徒保罗一定tio̍h用哥林多前书第十二到十四章等长到三章ê篇幅来解释圣神ê意义。约翰一书ê作者提起早期教会内「有人自称有圣神」,伊认为m̄-thang siuⁿ紧相信chit种话,因为圣神并m̄是用人ê嘴巴讲就是真正。因为án-ne,作者提醒读者tio̍h注意先了解一下,看māi hiah-ê自称有圣神ê人,真可能有ê并m̄是圣神却是邪灵。原因是早期教会中出现「假先知」,chit种人siōng欢喜假借讲有「圣神」充满tī伊ê身上,来迷惑信徒ê心。因为án-ne,m̄-thang马上就相信一个自称有圣神充满ê人, tio̍h先学会晓分辨比较好。伊认为辨认是m̄是属tī上帝ê灵ê方式,就是:「所以,我ài lín 明白,受上帝ê 圣神感动ê 人bē 讲「耶稣tio̍h 受咒诅」;无受圣神感动ê 人mā bē讲「耶稣是主」。(全民版)」(哥林多前书十二:3)

Ná亲像头前已经kúi-nā pái提过,早期教会中有人散布一种错误ê看法,认为耶稣基督并无真正活tī chiah-ê世界上,因为án-ne,约翰一书ê作者就以chit-ê做基准点,教导信徒判断一个人ê性命里有无tùi上帝来ê灵ê恩赐,伊讲若一个人愿意在公开ê场合中宣告讲「耶稣基督降世为人」chit种人所讲ê就是有圣神充满;相对ê,若是m̄敢承认耶稣基督确实降生在世间,就是虚假ê。

第4节,chit节提起「内面ê灵」,这是teh指圣神ê意思。Mā就是讲ē-tàng感动人认bat上帝ê救恩,而这救恩就是tī第2节所讲ê,承认耶稣就是基督、救主。因为邪灵á是撒旦siōng主要ê用意,就是beh带领人离开耶稣基督ê救恩,beh诱惑人m̄-thang承认耶稣是性命ê救主。作者tī chia讲「属tī世界ê内面ê灵」,意思就是teh指邪恶ê魔鬼。

第5到6节,chit两节是相对句,作者tī chia用相对ê句型讲出一个属上帝ê人会听从上帝ê话去行,chit种人一定会明白辨别甚么是真理ê信息,甚么是骗人ê白贼。

	第7到8节,作者koh一pái kā主题拉tńg来到「彼此相疼」来,kui本约翰一书ê中心主题就是Tī chit段tùi第四章七节开始,一直到第五章十二节止,lóng是teh讨论「彼此相疼」chit-ê主题。Tī第三章23节,作者已经真清楚说明作上帝所欢喜ê事,就是beh遵守上帝ê命令,而这命令就是beh「彼此相疼」。chit-má是第三pái提起,第一pái是tī第二章7到11节,第二pái tī第三章11到18节。作者tī chia kā人kah人之间需要ê「彼此相疼」,结构tī「上帝是疼」chit-ê基础上。换句话讲,若是无「彼此相疼」ê行为出来,就无法度见证「上帝是疼」ê信息,chit点就是约翰一书作者khah强调ê重点。

	Tio̍h注意作者tī chia ê「彼此相疼」,就是beh以上帝ê「疼」(agape),来「相疼」(agapomen)。换句话讲,彼此之间ê疼,就beh像上帝疼咱仝款,用chit种纯洁ê疼来彼此相疼,用无私ê疼来建构彼此相疼ê基础。只有chit种ê疼,chiah是表明咱真正「认bat上帝」,而án-ne chiah ē-tàng kah别人讲咱是上帝ê kiáⁿ。

	第9节,thang参考约翰福音第三章16节上帝对人类至koân ê疼。「上帝差他ê独生kiáⁿ」耶稣基督降生「到世间来」。Á tī罗马书第五章8节,使徒保罗讲耶稣基督就是上帝teh对人类显示「无比ê疼」ê方式。确实,上帝是hiah-ni̍h-á疼人类,chiah会差遣耶稣基督到世间来。

「独生kiáⁿ」,所表示ê意义真特别,表明珍贵、无法度比并ê价值,mā是人看做siōng宝贵ê性命。上帝就是kā人看做siōng-kài宝贵ê性命—耶稣基督赏赐hō͘人类世界,就是为tio̍h beh拯救人脱离罪ê束缚所带来ê死亡。约翰一书ê作者讲,chit种举动表明ê只有一点:上帝就是疼。作者是beh kā所有ê读者讲,认bat上帝ê本质是疼,因为án-ne,若是kā上帝形容为一位「恐怖」、「恨」、「惩罚」、「严厉」ê上帝,是真大ê错误,chit点一定tio̍h清楚。

第10节,chit节ē-sái讲是约翰一书ê中心主题,beh hō͘读者知影上帝差遣他ê独生kiáⁿ耶稣基督降生到世界上,就是为tio̍h beh救赎人类ê罪,mā因为án-ne,耶稣基督「牺牲」à。Chit种为有罪ê人类牺牲性命所beh表达ê,就是上帝ê疼。值得注意ê,作者强调讲「m̄是咱疼上帝,却是上帝疼咱」,并且tī第16节koh进一步讲:「咱疼,是因为上帝先疼咱。」
第11到12节,「亲爱ê众朋友」,chit句是最后一pái出现tī chit本书信中,作者共计用过六pái(参考二:7、三:2、三:21、四:1、四:7)。Chit句话mā表明作者kā读者当做是心目中siōng亲近ê朋友一般看待,作者用án-ne亲昵ê称呼,主要是teh beh表示作者jōa-ni̍h-á ǹg望所有ê读者ē-tàng明白伊写chit本书信ê用心。

「上帝hiah-ni̍h疼咱」,chit句话是teh说明第9到10节所讲过ê上帝之疼,就是上帝差遣他ê独生kiáⁿ耶稣基督来到世界上,hō͘所有ê人lóng ē-tàng藉tio̍h耶稣基督而得tio̍h性命。耶稣基督为tio̍h beh拯救人脱离罪ê束缚,牺牲性命。因为án-ne,作者讲信耶稣基督ê人,就是beh学习耶稣基督chit种ê疼,并kā chit种ê疼发挥出来。

「无人看过上帝」,chit句话thang对照第一章18节「无人见过上帝」,mā thang参考提摩太前书第六章15到16节,lóng是teh强调从来无人看过上帝。约翰一书作者强调只有tī疼ê内面,人chiah会看tio̍h上帝。因为疼就是性命ê气力。有疼ê所在chiah有性命ê气力。

第13节,作者提起信了耶稣基督ê人,m̄-nā是上帝会tòa tī chit种人ê心内,chit种人mā会tòa tī上帝ê内面。Chit-ê意思就是讲:做一个人信了耶稣基督了后,上帝ê圣神就会kah伊同在,指引伊行上帝旨意ê道路。一个人若是有上帝ê灵同在,伊ê性命就是kah上帝交融做伙,无法度分开。

因为án-ne,咱mā thang án-ne讲:有疼ê所在,就有上帝ê灵。这mā是使徒保罗tī哥林多前书第十三章所提起ê,若是无疼,讲圣神ê话会成做无意义ê事,因为hiah-ê kan-taⁿ会ná亲像敲得真大声ê噪音。因为án-ne,真正疼,就是圣神ê工作之一。Mā因为有疼,所以chiah ē-tàng kah上帝交融做伙。

第14节,chit节mā ē-sái讲是基督教信仰ê内容主轴—耶稣基督降生在世界上,作「世界ê救主」。因为án-ne,耶稣基督降生并m̄是只要救基督徒而已,而是beh拯救世界所有ê人。

第15节,chit节koh一pái提起「公开承认耶稣是上帝ê kiáⁿ」,chit句话tī第四章2节讲过。之所以强调「公开承认」ê重要,是因为信仰就是性命ê见证,m̄是停留tī口头宣告。作者koh一pái讲án-ne公开承认信仰告白ê人,「上帝就tī伊ê性命里」,而「伊mā有上帝ê性命」,二者交织做伙。

第十六节,作者用真有力ê语句kā读者讲,一定tio̍h知影而且相信上帝teh疼所有ê人。Chia ê「咱」ē-sái讲是对读者á是早期教会ê信徒讲ê。M̄-koh chit-ê「咱」thang讲是teh指所有ê人类讲ê,因为耶稣基督真清楚讲上帝m̄-nā kah意人,mā疼pháiⁿ人;疼行善ê人,mā疼作恶ê人(参考马太福音五:45)。这mā是约翰福音第三章16节所讲ê「上帝hiah-ni̍h疼世人」,却m̄是讲「上帝疼基督徒」。

    「上帝是疼」,chit句话tī chia重述第8节所讲过ê。Chit句话ē-sái讲是kui本圣经ê基础,mā是圣经所beh见证ê中心信息。

	第17节,chit节看tio̍h一个重要ê使命,就是每一个信耶稣基督ê人,lóng是上帝ê同工。基督徒就是上帝拣选ê同工,beh参与他拯救世人ê工作,hō͘ koh khah chē人认bat耶稣基督。Á耶稣基督就是上帝赏赐hō͘人类siōng大ê福音,而chit-ê福音m̄是hō͘基督徒用来图谋家己ê享受,是beh传扬出去,分享hō͘众人ê。因为án-ne,约翰一书ê作者tī chia提起,当人知影上帝ê疼后,回报上帝这奇妙恩典ê siōng好方式,就是kā上帝ê疼分享hō͘所有接触ê人。

	第18节,作者tī chit本书信中用了四pái「坦然无惊惶」chit-ê词(参考二:28、三:21、四:17、五:14)。人只有tī疼ê内面ē-tàng「坦然无惊惶」,mā就是分享疼ê时chūn chiah会无惊惶。因为真正疼,kan-taⁿ会带hō͘性命快乐。相对ê,虚假ê疼、不真实ê疼,chiah会hō͘性命惊惶kah不安。这就是此节所提起ê「有疼就无惊惶」ê原因。

	Chia ê「惊惶」,tī希腊文是「phobos」,chit-ê字mā有「敬畏」ê意思。Án-ne,thang理解chit句话ê意思,指ê是:一个人无可能疼一个人ê时chūn,koh惊惶看tio̍h hit-ê个人,á是惊kah hit-ê人做伙。因为疼kah惊惶,是无法度同时存在ê。

	另外一方面,这「惊惶」一词,mā kah奴隶有关系。古早时,有奴隶ê制度,身为奴隶ê人,一直生活tī惊惶中,因为惊惶主人kā它转卖到koh khah恶质ê生活环境中,mā同时惊惶主人对伊受气,性命会不保。

第19节,作者讲所有ê疼ê根源tùi上帝来。人ê性命中有疼,是因为上帝先kā疼赏赐hō͘人。Chit种认bat一定tio̍h先tńg来到创世记第一章所提起ê上帝ê形像;当上帝创造人类ê时chūn,就是用他ê形像来造人,chit-ê形像所表示ê就是他ê疼。

第20到21节,作者tī chia为疼做真好ê诠释—疼kah恨不相容。这ná亲像疼kah惊惶无法度同时并存仝款。恨只会kah惩罚、报仇、惊惶相连接。
作者tī chia强调疼上帝kah疼兄弟姊妹是仝款重要ê,无讲疼上帝比较重要,疼兄弟姊妹不重要,mā无法度kā chit二者分开来看。这mā是路加福音第十章25到37节,耶稣基督tī譬喻中所beh表达ê信息是:「你tio̍h全心、全情、全力、全意疼主—你ê上帝,tio̍h疼厝边,亲像疼家己仝款。」约翰一书ê作者mā清楚chit种观点,因为án-ne,tī第21节作者做一个明确ê结论,讲这就是耶稣基督ê「命令」。

经文:

约翰一书 5:1-5:21

注释:

如果咱tio̍h用一句话来形容约翰一书ê主题,ná亲像头前已经叙述过ê,就是「彼此相疼」。Chit-ê主题有一个真基本ê认bat,就是只有「彼此相疼」chiah ē-tàng表明人kah上帝之间ê关系是相连结做伙ê。因为「上帝是疼」,因为án-ne上帝希望所有他ê子民lóng知影彼此相疼,因为上帝kā疼hō͘他所拣选ê子民,就是为tio̍h beh他ê子民去传达chit份疼。

	M̄-koh一定tio̍h注意一点,就是讲tio̍h上帝ê疼ê时,应该tio̍h清楚上帝ê疼是包含tio̍h他ê公义、赦免、赦免、怜悯。公义ê疼,teh表示上帝ê审判kah忿怒,chit点一定tio̍h ài会记得ê,m̄-thang认为上帝ê疼lóng是thang随便chhut-chāi人舞,甚至是lóng无节制ê乱使用,这是严重ê错误。

	约翰一书ê作者tī前一章论述到真实ê疼无惊惶,chit点mā是chit本书信中非常有意思ê信息。因为真实ê疼中是bē有恨ê,原因是疼kah恨是两个完全不相容ê状况,若是tī疼中有恨,án-ne就表示疼ê无够完全,chiah会tī内面有惊惶。

    约翰一书作者Tī chit章强调遵守上帝ê命令,就是疼上帝。而且强调这并m̄是困难ê事。作者讲基督徒ê使命,就是kā上帝ê疼见证出来。
第1节,「凡信耶稣是基督ê lóng是上帝ê kiáⁿ」,虽然是chiah-ni̍h简单ê一句话,却真清楚说明早期教会有人m̄相信耶稣就是上帝差遣到chit世界上救主,这是因为教会内部有出现假先知、假使徒ê缘故,ná亲像第二章18节,以及第四章1节所提起ê,chiah-ê人常常搅乱了信徒ê信仰认知。

因为án-ne,chia讲「凡信耶稣是基督ê lóng是上帝ê kiáⁿ」,意思就是讲:只要相信耶稣就是死tī十字架上ê救主,chit种人,就是上帝ê kiáⁿ。当基督徒讲伊疼上帝ê时,mā必定会疼上帝ê kiáⁿ。耶稣基督就是上帝ê独生kiáⁿ,如果讲疼上帝,必定会疼耶稣基督。

另外一方面,如果所有ê信徒lóng是上帝ê kiáⁿ,án-ne,讲疼上帝ê人,mā必定会疼上帝ê kiáⁿ,mā就是所有ê信徒,就是tùi彼此相疼着手就对à。

第2到3节,约翰一书ê作者一再强调信仰ê一个基本观念,就是kā疼上帝ê信仰付诸行动,chit种行动就是tùi疼咱身边ê兄弟姊妹开始。因为án-ne,伊tī chia koh讲一个真正疼上帝ê人,就会遵行上帝ê命令,听从上帝ê旨意去做tāi-chì。作者讲上帝ê命令「并无困难遵守」,是ē-tàng实践出来ê。Ná亲像头前已经叙述过ê,tùi身边ê兄弟姊妹身上开始做起。

第4到5节,作者讲凡是上帝ê kiáⁿ lóng必ē-tàng因为信心而「赢过世界」。Chit句话确实bē-bái,无论是tùi基督教会历史来看,á是tùi信徒ê信仰经验起来检验,lóng会看tio̍h chit种见证。会有chit种经验,就是因为耶稣基督koh活所带来ê性命力量,chit种超越死亡而koh活ê气力,绝对m̄是人类社会任何力量thang阻止ê。作者讲这是因为「信心」ê缘故,而这信心是来自耶稣基督ê koh活。

「只有信耶稣是上帝ê kiáⁿ ê人chiah ē-tàng赢过chit世界」,原因是耶稣tùi án-ne上帝差遣到chit世界起来ê救主,伊用死tī十字架上ê疼来赢过邪恶ê权柄。

Tī chiah-ê世界上,siōng伟大ê气力m̄是刣人ê军事武器,却是疼。只有疼,chiah ē-tàng改变chit-ê世界,mā只有疼,chiah ē-tàng hō͘人kā尖锐、刣伤力极强ê武器收起来。这ná亲像先知弥迦所讲ê,上帝ê疼会「排解列强ê争端」,ài kā「刀剑phah成镰刀」(参考弥迦书四:3)。人类之间若真正照耶稣基督ê教示去遵行,就ē-sái战争消失,ē-sái所有相战ê武器lóng成做生活ê工具。Chit-ê世界,是因为相战而分裂,却thang因为彼此相疼而连结。

第6节,chit节thang参考马可福音第一章8节。洗礼是用水,因为án-ne,「水」,已经m̄-nā kan-taⁿ是一般用来洁净ê一种材料,却是tī基督教信仰上成做「分别为圣」ê一个记号。

「血」,这Tī圣经中真清楚ê是teh代表性命ê记号,thang用来做赎罪(参考利未记十七:11)。Chia讲耶稣基督是「藉tio̍h水kah血」,这已经真清楚表明伊m̄-nā kā信靠伊ê人「分别为圣」出来,而且为tio̍h所有信靠伊ê人,耶稣基督是用伊ê性命来做赎罪祭,而这赎罪ê方式,就是死tī十字架上。所以约翰一书ê作者特别指出这血乃是「牺牲ê血」,m̄是一般ê血,却是耶稣基督献出了伊ê性命所流出来之血,做救赎ê记号,án-ne chiah成就了救赎ê功效。

「圣神mā亲自见证这是真实ê,因为圣神就是真理」,这表示圣神参与了洗礼ê行列,因为án-ne,圣神thang为洗礼chit件事做见证。因为ē-tàng感动一个人认bat耶稣为性命ê救主,m̄是人ê能力,真正ē-tàng启开人ê心灵认bat上帝tī耶稣基督内面ê救恩,是上帝ê圣神亲自做工ê结果。
约翰一书ê作者tī chia讲「圣神就是真理」,chit句话已经清楚表明圣神kah真理是仝一个ê。圣神乃是上帝本身,而上帝就是真理。

第7到8节,chia进一步解释就连洗礼用ê水,以及耶稣基督ê宝血mā lóng会kah圣神同时做见证。见证受洗ê人归属tī耶稣基督,是上帝ê kiáⁿ。约翰一书ê作者强调「圣神、血kah水」等chit三项lóng是一致地ê,意思就是无轻重之分。换句话讲,一个基督徒tī chit世间接受洗礼,就ná亲像接受耶稣基督ê救恩,而chit-ê人就因为透过受洗而蒙圣神ê感动、洁净伊ê性命,chiah-ê lóng是一气呵成,连做伙,无分开ê。

第9节,做一个人因为听tio̍h有人传福音信息hō͘伊,受tio̍h感动soah决定接受耶稣基督做伊性命ê主,因为án-ne,接受洗礼,就是chia所讲ê「人ê见证」。既然人ê见证咱thang接受,若是上帝亲自见证当然大大超过人ê见证。耶稣基督tī传福音ê时chūn,不时tú-tio̍h有犹太人ài伊koh再用神迹来证明家己ê身分,耶稣基督真清楚kā chiah-ê走chhōe证明ê犹太人讲,上帝就是siōng好ê证明(参考约翰福音八:17—18)。因为伊是teh为上帝工作,而且照上帝ê旨意去行(参考约翰福音六:38、八:38)。
第10节,chit节真清楚说明信耶稣基督ê人,kah m̄信者之间是有差别ê;作者真清楚提起信耶稣基督ê人必定会为所信ê做见证。

第11节,chia提起只要是信耶稣基督ê人,必定会得tio̍h上帝赏赐ê恩典,就是得tio̍h「永恒ê性命」。相对ê,m̄信耶稣基督ê人就是对敌上帝者,chit种人否定了上帝ê见证,无认为上帝ê所做ê见证是真实ê。
第12节,chit节为头前所讲ê做简洁ê结语:甚么人有耶稣基督同在,甚么人就会得tio̍h永恒ê性命。相对ê,就无。

第13节,koh一pái强调会有「永恒ê性命」赏赐hō͘「信奉上帝ê kiáⁿ ê人」。这是一个带有应允ê约,mā是基督教信仰最终极ê目标。约翰福音ê作者就一再kā咱讲,凡是信靠耶稣基督ê人lóng会得tio̍h上帝赏赐hō͘ in「永恒ê性命」(参考约翰福音三:15、16、36、十二:50、十七:2、3),耶稣基督mā亲自án-ne kā所有信靠伊ê人讲(参考约翰福音五:24、六:40、47、54、十:28)。

第14到15节,这是有含应允ê经文,Tī chit两节中,作者讲身为耶稣基督ê信徒有两件真好ê福气,其一就是thang藉tio̍h耶稣基督tī上帝面前坦然无惊惶。其二是上帝会垂听信耶稣基督ê人ê祈祷。

Ē-tàng tī上帝面前坦然无惊惶,乃是因为有耶稣基督为伊做见证,证明众信徒知影彼此相疼。因为只有tī真实ê疼内面,人面对上帝ê审判chiah bē惊惶(参考约翰一书四:17)。

上帝一定会垂听伊ê子民祈祷,这是kui本圣经ê信息。M̄-koh m̄-thang bē记得,祈求主要ê目的,就是学习明白上帝ê旨意,chit点是非常重要ê。

第16节,就是相对句型,tī第16节ê上半句讲「bē致使死ê罪」,下半句soah讲「有kóa罪致使死亡」。照摩西ê律法,siōng严重而bē-tàng原谅ê,就是teh指亵渎圣神ê罪(参考利未记廿四:16)。耶稣基督讲:「我实在kā lín 讲,世间人无论犯甚么罪,讲甚么毁谤ê 话,lóng 会得tio̍h赦免。独独无论啥人亵渎圣神,伊绝对bē-tàng 得tio̍h 赦免,因为伊是犯tio̍h 永远bē-tàng 赦免ê 罪。」。(全民版)」(马可福音三:28—29)thang án-ne了解:一般ê错误行为是thang被原谅ê,因为人无完全,不时会犯错,特别是人ê心思意念中不时会有罪出现,就ná亲像使徒保罗teh描述人性命ê软弱所讲ê,应该做ê事,无去做,反tńg去做he无应该做ê事(参考罗马书七:19—24)。伊强调chit种人tī无法度自主ê情况下,往往做出致使性命死亡ê罪恶,chit种罪恶就是弃sak了上帝(参考罗马书六:36)。

第17节,「不义」,这是teh指kah上帝ê关系已经破坏à。M̄-koh作者讲chiah-ê mā有thang修补ê可能,就是透过耶稣基督救赎ê疼来重新调kah。Chit种方式就是用祈祷来走chhōe上帝ê赦免。

M̄-koh若是故意侮辱上帝ê神圣,就是teh指明明知影bē-tàng拜偶像,却故意án-ne做。Á是明明知影tī教会中bē-tàng欺骗,soah koh án-ne行,这便是藐视上帝ê尊严。Chit种罪是「会致使死亡」。

	第18节,chit节讲tio̍h「上帝ê kiáⁿ bē继续犯罪」,chit句话并m̄是讲基督徒lóng bē犯罪,却是讲信耶稣基督ê人会知影上帝无欢喜人犯罪,mā知影上帝会垂听信徒ê祈祷,因为án-ne tī知影家己犯罪了后,就会赶紧悔改认罪。基督徒信仰生活中siōng大ê美德,就是知影悔改认罪,而悔改认罪乃是上帝所欢喜ê事。这就是此节所提起ê「bē继续犯罪」。Chit种「bē继续犯罪」,是因为有上帝ê圣神teh带领、保守,hō͘伊知影保守家己纯洁ê心灵好面对上帝ê审判。

	第19节,thang看tio̍h基督徒tī每一个时代lóng是真孤独ê,因为chit-ê世界lóng是「处tī hit-ê邪恶者ê辖制下」,m̄-koh基督徒却是「属tī上帝」ê,这是因为有耶稣基督救恩ê缘故。

	第20节,chit节thang讲chit本书信ê结尾,mā是chit本书信siōng中心ê信息beh kā所有读者讲:耶稣基督就是上帝ê kiáⁿ,伊来到chit-ê世界上,藉tio̍h他认bat信实ê上帝来得tio̍h「永恒ê性命」。
	第21节,所提起ê「假神」,tú好第20节ê「真神」相对照;真神,带hō͘人「永恒ê性命」,相对ê,「假神」所带来ê是性命ê死亡。作者希望所有ê读者、信徒lóng ē-tàng远远躲避这会带hō͘性命永远死亡ê假神。


重新查询