撒迦利亚书 5章1节 到 5章11节   背景资料  上一笔  下一笔
Tī chit章中记载ê是先知撒迦利亚看见第六个kah第七个异象。先知撒迦利亚确实有真特殊ê经历,伊连连看见异象,而且chiah-ê lóng真清楚指出主要内容是甚么。亲像tī第一个异象,讲tio̍h上帝已经赦免以色列人民,然后接落去ê第二个异象就提起上帝beh惩罚hiah-ê欺负弱小贫困者ê恶霸。Tī第三个kah第五异象,lóng是谈起有关重新建造耶路撒冷圣殿ê事,并且真清楚hō͘先知撒迦利亚知影,上帝一定会藉tio̍h大祭司约书亚,kah政治领袖犹大省长所罗巴伯两人来完成重建耶路撒冷—包括hit-ê城kah圣殿ê工程。Á tī第四个异象则讲tio̍h上帝beh hō͘原本已经污秽ê以色列子民,成做洁净ê人民。Chit项洁净ê工作就是用大祭司约书亚身上ê衫裤,全部lóng换做新ê,而且koh戴上了新ê礼冠,koh khah可贵ê是,上帝清楚应允,透过大祭司约书亚ê祈祷,上帝一定会垂听。

表面上看起来,chiah-ê异样kah-ná lóng是针对两千五百多年前发生tī以色列耶路撒冷ê事,其实,咱若是详细思考chiah-ê异象所启示出来ê意义,就会发见圣经siōng珍贵ê所在,就是chiah-ê异象就是tī对咱今á日ê时代发出声音。Chiah-ê异象真清楚kā先知撒迦利亚讲,虽然重建耶路撒冷城kah圣殿,是beh藉tio̍h大祭司约书亚kah政治领袖所罗巴伯,m̄-koh,真正hō͘ chiah-ê重建工程ē-tàng顺利完成ê,乃是上帝ê灵,m̄是óa靠人ê才能,koh khah m̄是óa靠军事武力,á是政治势力ê强盛(参考撒迦利亚书四:6)。Chit种信息对今á日ê基督徒来讲,实在非常珍贵。

第1节,「koh再观看」,这真清楚讲先知撒迦利亚所看见ê异象,并m̄是隔一段时间了后chiah出现一个新ê,却是一个连连一个地出现,异象是连续不断来出现tī伊ê目睭前。所以作者chiah会「koh再」á是「koh」chit-ê字。Beh表明ê是,chit-ê新ê异象是紧跟tòe头前ê异象了后出现ê。

先知撒迦利亚讲伊看见「一卷册卷飞过天空」,这是非常奇特ê异象,竟然有会飞ê册。Koh讲,古代ê册,lóng是用羊皮á是蒲草制成ê。浦草是一张张ê,而羊皮则thang卷起来保存。

第2节,chit卷会飞ê册卷竟然是非常长kah阔。长有九公尺、阔四公尺半。会有chiah-ni̍h大ê册卷?确实真oh理解。

第3到4节,chit两节讲出chit本大册卷内面所写ê信息,而chit-ê信息lóng是属tī无好ê,所以第3节chia讲信息是「诅咒」ê话语。Chia提起诅咒ê内容包括两方面;一面是beh惩罚hiah-ê手无清气ê人,就是「盗贼」。另外一方面则beh惩罚hiah-ê不诚实ê人。

盗贼,这mā是犹太人列为「罪人」ê三种人中之一。犹太人讲「罪人」ê时,通常是teh指「抽税ê人」、「妓女」,kah「盗贼」等chit三种人。Koh来就是针对hiah-ê「发假誓ê人」,mā ài beh进行「清除」工作。发假誓,这是违背十诫ê第九诫:「M̄-thang 做假ê 见证,陷害你ê厝边。(全民版)」(出埃及记二十:16)特别tio̍h注意ê是,chia所讲ê「发假誓」,意思是teh指用上帝ê名来chiù-chōa。这mā是乱用上帝ê名ê一种错误行为。Án-ne,乱使用上帝ê名发假誓,等于违背两条诫命,第三诫讲bē-tàng乱使用上帝ê名(参考出埃及记二十:7),然后就是第九诫:「bē-tàng做假证陷害人。」(出埃及记二十:16)一个人敢án-ne做,tú好teh表示chit-ê人ê心中根本无kā上帝当做一回事,á是讲tī chit种人ê心中,m̄-nā m̄承认有上帝,iáu用chit种欺骗ê方式teh迷惑别人,án-ne mā等于是kah侮辱上帝仝款,lóng是真严重ê错误行为。

问题就出tī chia;想看看,当大家tùi奴隶之地巴比伦tńg去故乡参与建造耶路撒冷圣殿ê时,却发生chit种偷the̍h、发假誓ê行为,án-ne,建造圣殿ê意义又koh是甚么?敬拜上帝就一定tio̍h用真诚kah心灵(参考约翰福音四:23—24),这是siōng基本ê要件。上帝一定会「诅咒」chit种人kah伊ê家庭,表示chit种惩罚是真严重ê。

第5节,chit节开始是第七个异象。

第6节,先知撒迦利亚tī天使ê引chhōa下,看tio̍h一个「篮á」,chit种「篮á」tī希伯来文叫做「伊法」(ephah)。是一种用来装谷类ê桶子。Chit-ê篮á内面装ê「全世界ê罪恶」。

第7到8节,chit两节讲chit-ê篮á里有「一个cha-bó͘人」坐tī内面。天使koh讲chit-ê cha-bó͘人「象徵邪恶」。「罪恶」chit-ê字,tī希伯来文是属tī阴性ê,因为án-ne真可能为tio̍h án-ne之故而用cha-bó͘人来代表。另外,mā有一个原因是kah迦南地ê宗教信仰有关;当地人欢喜崇拜女神亚舍拉,以色列人民就是因为tī迦南地ê时kah当地人拜chit种女神,致使上帝非常ê忿怒,终到hō͘上帝严厉惩罚。

第9节,就tī chit时chūn,空中出现「两个」身上带有「强大ê翼股」ê cha-bó͘人飞了过来。Chia特别提起chit两位cha-bó͘人身上ê翼股ná亲像「鹳鸟ê翼股」,tio̍h注意ê是鹳鸟ê希伯来文是「hasida」,chit-ê意思是teh指「忠心」。换句话讲,chit两个cha-bó͘人身上ê翼股已经teh象徵in两人就是上帝忠实ê奴仆,受tio̍h上帝ê差遣到世界起来。

Koh讲,翼股phah起来会有「风」。Á「风」tī希伯来文是「ruah」,chit-ê字就是圣神ê意思。Án-ne第四章6节讲建造耶路撒冷圣殿,是óa靠圣神ê力量,却m̄是用人ê能力á是势力。Chit两位身上有翼股ê cha-bó͘人,in身上充满tio̍h上帝ê灵来到chit世界上,kā chit-ê teh代表充满罪恶ê篮á带走à。

第10到11节,先知撒迦利亚问天使,想beh知影chit两个有翼股ê cha-bó͘人ài kā chit-ê篮á带到tó位去?天使ê回答是「巴比伦」(中文《和合本》用「示the̍h地」)。这teh代表喜爱崇拜偶像神明ê所在,tī hia hō͘人khǹg tī庙宇中崇拜tio̍h。启示录第十八到十九章,作者mā是用「大淫妇」来teh代表巴比伦。

Án-ne,chit-ê异象真清楚teh说明一件事:tī敬拜上帝ê人民中,in tńg来到故乡了后,所重新建造起来ê耶路撒冷城,bē koh再kah过去仝款,有崇拜偶像神明ê现象存在。上帝beh亲自消除chiah-ê偶像神明,beh kā chiah-ê偶像神明送tńg去原本ê所在。但beh消除chiah-ê偶像神明并m̄是óa靠人ê力量,而是beh靠上帝ê灵chiah有办法,这ná亲像第四章6节所提起ê,重建耶路撒冷kah圣殿ê工作,m̄是óa靠人ê力量,却是óa靠圣神ê带领。

重新查询 专卷研经 撒迦利亚书系列
错误回报,请联系comm[@]fhl.net