先知撒迦利亚tùi异象中对伊ê以色列同胞传出上帝信息ê时，就是kā in讲上帝「beh tòa tī lín中间」（参考二：10）。千万m̄-thang看轻chit句话，这已经teh表明上帝kā成做以色列人民ê保护者，无论tī甚么环境、境遇之状况下，上帝lóng会tī in中间，成做in ê保护者，teh带领in。Mā thang án-ne讲，kui本圣经就是tī讲：只要óa靠上帝ê救恩，上帝就会kah伊同在，无论tī甚么环境下，lóng会体验tio̍h上帝赏赐ê力量。

先知撒迦利亚对tùi巴比伦奴隶之地回乡tńg来到耶路撒冷ê以色列同胞讲，上帝会kah in同在，就是beh kā in讲m̄免惊惶，上帝beh保护in，甚至会用「火墙」来保护耶路撒冷城（参考撒迦利亚书二：5）。伊传出chit种信息，就是beh hō͘以色列人民m̄免担心会有人来破坏in建造耶路撒冷城ê事，mā m̄免惊惶敌人会koh来攻击，颠倒ê，耶路撒冷城会成做世界ê中心，这是因为有上帝khiā起tī hit-ê城，世界各地ê人lóng会想beh来聚集tī hit-ê城，并且相争beh成做上帝ê子民（参考二：11）。

Chit章是记载先知撒迦利亚所看tio̍h ê第四个异象，chit-ê异象ê特别所在，是看tio̍h天顶kah-ná开庭审案ê景象。真像约伯记第一到二章所描述ê，上帝坐tī审判ê桌á前，众天使khiā tī上帝面前，然后有撒旦来到上帝面前想beh控告上帝ê奴仆约伯。Chia则讲撒旦tī上帝天使面前beh控告大祭司约书亚。

第1节，chia称呼约书亚是「大祭司」，伊khiā tī「上帝ê天使面前」，而tī伊ê正pêng是khiā-teh「撒旦」。撒旦是teh指「试探者」、「诱惑者」ê意思。Á大祭司ê职责就是teh代表敬拜上帝者，用专一ê心、敬虔ê心灵敬拜上帝。撒旦就khiā tī大祭司约书亚ê边á，它ê目的是干涉搅扰大祭司约书亚，不beh hō͘伊专心祈祷，它想出所有ê办法beh hō͘伊想tio̍h其它ê事去，hō͘伊无法度kah上帝专心讲话。因为撒旦ê主要工作，就是beh hō͘人离开上帝，hō͘人无法度专心敬拜上帝。

第2节，chia讲愿上帝ê天使「责备」撒旦。原因是tī前面已经提起过ê，以色列人民亡国tī巴比伦帝国了后，teh过奴隶ê生活，受尽折磨，后来上帝怜悯in，kā in赐福有机会tńg去故乡重建家园。所以chit节chia用「ná亲像tùi火中抽出来ê一条柴」chit句话来形容苦难中ê以色列人民。

火，巴比伦帝国tī主前586年攻进耶路撒冷城了后，就是用火火烧hit-ê城kah圣殿。火mā是teh代表上帝ê惩罚。Á「tùi火堆中抽出来ê一条番á火」，意思就是无烧尽ê木柴，赶紧kā它抽出来免得mā被烧毁。

另外一方面，「火」mā表示已经洁净à原本因犯罪而污秽ê以色列人民之心灵。所以撒旦ê控诉是为tio̍h beh阻挡chiah-ê回乡ê以色列人民óa靠上帝，想beh hō͘ chiah-ê以色列人民继续对上帝发出怨言，对上帝失去信心。

第3节，大祭司应该穿插圣袍，因为大祭司是teh带领人民敬拜上帝。现tī大祭司约书亚却是穿插lah-sap ê衫裤，tú好表示伊是无清气ê，所以撒旦就是利用chit-ê机会控告约书亚，讲伊teh污秽上帝ê殿宇，对上帝无敬意。M̄-koh，，大祭司约书亚之所以穿插lah-sap ê衫裤，tú好表示伊是tú tùi ná苦难中tńg来ê族群，需要大家hō͘伊koh khah chē ê鼓励、疼惜，却m̄是胡乱控诉。

另外一方面，大祭司约书亚身上穿插ê lah-sap衫裤，mā是teh表示以色列人民身上ê罪，因为大祭司teh代表以色列人民，原本应该是圣洁ê，现tī伊身上却是污秽、lah-sap ê，所代表ê tú好说明以色列人民ê罪是jōa-ni̍h-á严重，莫怪会hō͘撒旦有真chē ê机会thang来搅乱。

第4节，chit节讲上帝决定kā大祭司约书亚身上lah-sap ê衫裤thǹg掉，换上新ê衫裤。理由是上帝已经除掉了伊ê罪，就等于除掉了以色列人民所犯ê罪，表示上帝已经赦免、赦免以色列人民。这表示是一个全新ê开始，过去ê lóng弃sak了，无koh留落来任何痕迹。

第5节，说明tī chit大祭司身上ê新形象，除了hō͘伊穿新ê衫裤，mā有「清气ê礼冠tī约书亚ê头壳顶」（参考出埃及记廿八：36）。Chit节mā thang参考路加福音第十五章22到23节，耶稣ê譬喻中，hit位慈爱ê老父接纳认罪悔改tńg来ê kiáⁿ儿所做ê举动。

第6到7节，chit两节说明了hō͘上帝拣选ê以色列人民，重新受tio̍h上帝ê重用，hō͘ in新ê命令。Á这新ê命令就是beh遵守上帝ê「律法」，并且认真去执行。Án-ne，上帝就会「垂听」in「祈祷」ê声音，chit点chiah是siōng重要ê。因为大祭司就是beh进入圣殿为民众祈祷ê，这是伊主要ê工作。

照启示录第四章kah第七章ê记载，tī上帝宝座旁有真chē天使围服事。上帝忠实ê奴仆ná亲像天使仝款，in ê祈祷上帝绝对会听。

第8节，tī未来圣殿中ê景象，就ná同以前仝款，m̄是只有约书亚一个人负起祭司ê职务，却是有一阵人lóng同为祭司。M̄-nā án-ne，chia特别提起chiah-ê众祭司kā成做上帝特别启示ê对象。Tī chia作者用「吉兆」chit-ê字，希伯来文是「mopet」，意思是讲「上帝ê能力特别彰显」。这真清楚teh表示chiah-ê祭司m̄是只teh带领咱人敬拜上帝，办理献祭礼仪而已，而且in beh成做先知讲预言，beh传达上帝ê信息hō͘众人民听。

第9节，chit节讲遵行上帝ê话，就会hō͘以色列人民ná亲像khiā立teh石磐顶一般，永远bē动摇。Koh讲，现tī in回乡后siōng重要ê工作，就是重建圣殿，上帝kā in赐福ê应允，就是beh hō͘ in ê圣殿ná亲像建造tī坚硬ê石磐上，永无koh动摇、烧毁。Tī chia讲此石头有「七面」，「七」chit-ê数目tī以色列文化中所代表ê，是完美、神圣，有上帝赐福ê意思。有「七面」mā ē-sái讲是面面俱到无遗落ê所在。这确实bē-bái，当上帝beh kā他所拣选ê chiah-ê子民之罪除尽ê时，必定是非常清楚他ê子民ê状况，mā清楚in确实是已经悔改、认罪à。

第10节，chit节thang参考弥迦书第四章4节。

现在先知撒迦利亚mā是án-ne预言，有án-ne ê一工，当耶路撒冷圣殿建造完成了后，mā是上帝ê话语传开ê时，就tī hit时chūn，上帝ê话kā重新建造世界ê秩序，无战争bē有纷争，左邻右舍大家lóng是好厝边，thang和平相处，同齐享受tio̍h安逸ê生活。