罗马书 9章19节 到 9章33节   背景资料  上一笔  下一笔
当使徒保罗提起kui个拯救工作之主权,lóng是由上帝决定,因为án-ne,有人认为chit种上帝,是不公平ê。因为这会hō͘人感觉家己根本就无存在ê价值,mā无努力向善ê动力kah意念。就án-ne,使徒保罗用chit段经文来解释伊为何会有chit种主张。

第19到21节,因为使徒保罗提起上帝拣选是早tī他chìn前ê计画,因为án-ne有人认为既然是án-ne,án-ne,上帝就无应该对hiah-ê无受拣选ê子民受气,á是发出责难。使徒保罗对chit种问题感觉艰苦心,因为提出chit种问题ê人,是故意chhōe藉口。使徒保罗引用自耶利米书第十八章1到6节有关陶匠kah陶土ê关系做譬喻,主要teh说明上帝ná亲像陶匠,他ē-tàng随心所beh照家己ê计画,á是喜爱ê方式,kā磁土捏成各种造型。伊khah强调ê是:捏陶ê主权在tī上帝,á无在tī人。Á chit种主权表达siōng重要ê方式,就是用拣选来表明。先知以赛亚mā提出chit种看法(参考以赛亚书四十五:9—13)。

第22到26节,chit段经文讲出上帝ê怜悯kah慈悲,他无kā hiah-ê无好ê瓷器弃sak、击碎,是因为他ê慈爱、怜悯,因为án-ne,koh khah应该心存感谢chiah-tio̍h。使徒保罗引用何西阿书第二章23节ê诗歌,以「意译」ê方式表示出来。使徒保罗引用先知何西阿写ê chit-ê诗歌,来表明原本m̄是属tī上帝拣选ê族类,chit-má上帝tio̍h用宽容无比ê疼,kā它列为他所拣选ê子民之一。伊用chit种譬喻,主要teh说明非犹太人(所讲ê「外邦人」),会成做上帝心中ê子民。「本来m̄是我子民」,chit句话mā是先知何西阿ê kiáⁿ「罗・阿米」ê名ê意思。意思是teh指对丈夫无忠实á生落来ê kiáⁿ。因为先知何西阿ê bó͘是一个淫妇。续落来tī第26节引用何西阿书第一章10节,仝款是采用「意译」ê方式,主要teh说明上帝ê决定是会改变ê,á hō͘上帝改变ê原因是人认罪、悔改。

第27到29节,chit句话是引用以赛亚书第十章22节。以色列人一直相信所有ê以色列人民lóng会得救,m̄-koh,先知以赛亚却有无仝ê看法,认为只有少数人ē-tàng得救。耶稣mā bat提出chit种看法,伊讲真正chhōe-tio̍h得救之道ê人少kah会惊人(参考马太福音七:13—14)。这mā说明得救并m̄是以色列人民ê专利á是特权,koh khah重要ê,是人tio̍h努力走chhōe正确ê得救门路。Koh讲,先知以赛亚tī chia指出「chhun落来ê少数得救」,tú好表明上帝怜悯ê恩典。因为上帝若照人所犯罪ê情景来审判,无一个人是「善」ê(参考罗马书三:23),就是因为上帝ê疼,留落来一部分人享受他拯救ê恩典(参考以赛亚书一:9)。Á使徒保罗引用chit句话,主要是teh说明这「chhun落来ê少数」,就是相信耶稣是救主ê人,á chiah-ê人是包括犹太人kah非犹太人在内。

第28节,这是引用以赛亚书第十章23节、第廿八章22节。注意chia所用ê「迅速」,指ê是审判ê时刻to̍h是teh beh来临。Chit对主后第一世纪ê基督徒来讲,意义真深重。In lóng认为上帝teh beh展开全面性ê审判,这kah koh活ê耶稣teh beh koh再临ê观念有密切关系。「彻底审判全人类」,chit句话mā说明上帝会展开全面性ê审判工作,无一个人ē-tàng逃避(参考希伯来书四:13)。然后tī第29节使徒保罗引用以赛亚书第一章9节,chit句经文ê历史背景,是发生tī主前701年,当时亚述帝国ê国王是西拿基立,伊率兵攻打耶路撒冷城,hō͘耶路撒冷城面临被摧毁ê危机,若m̄是先知以赛亚辅佐犹大国王希西家,犹大国早就被亚述消灭à。Chit段历史thang参考以赛亚书第三十六到三十七章,列王记下第十八章13到27节。使徒保罗引用这历史背景,主要teh说明上帝有他拯救ê计画,kah奇妙ê旨意,á chiah-ê事件lóng tī说明上帝对人ê怜悯kah慈爱,chiah会保存hit-ê「chhun落来ê少数」。

第30到33节,使徒保罗提起耶稣传福音ê主题:上帝ê主权。人m̄-thang想beh用家己ê气力来改变上帝拯救ê旨意,人唯一thang做ê事,就是悔改、顺服上帝ê引chhōa,相信耶稣是上帝拯救人类siōng大ê记号。第33节是摘录自以赛亚书第八章14节、第廿八章16节。Chia ê「绊脚石」,就是拯救者,tī旧约是teh指弥赛亚,使徒保罗强调就是耶稣。

重新查询 专卷研经 罗马书系列
错误回报,请联系comm[@]fhl.net