罗马书 9章1节 到 9章18节   背景资料  上一笔  下一笔
Tùi chit章到十一章使徒保罗lóng tī谈论有关犹太人ê问题,tī伊ê看法里,拒绝承认耶稣为救主ê犹太人,就是hō͘上帝所弃sak ê。这问题m̄-nā发生tī犹太人拒绝耶稣,甚至mā发生tī hiah-ê已经承认耶稣为救主ê犹太人身上,in主张tio̍h先以摩西律法所规定ê割礼做基础,来要求其他非犹太人mā遵守,并且强调讲如果无守割礼就无法度得救。因为后者chit种论调已经矮化了耶稣ê救恩。

使徒保罗tī罗马书中有两个主要ê论点:一是每一个人lóng生活tī罪ê掌控下,无一个人tī上帝面前ē-tàng靠tio̍h遵行摩西律法á得救,无论是犹太人á是外邦人lóng仝款。二是上帝显明他ê大爱,透过耶稣ê救赎,hō͘所有信耶稣ê人会得thang因为án-ne soah重新建立kah上帝和好ê关系,这是透过耶稣得tio̍h ê,无论犹太人á是外邦人lóng仝款,无任何人是特别ê。这就是罗马书第九到十一章中所谈论ê问题。因为以往犹太人是kā摩西律法看做是得救ê准则,离开摩西律法就kah得救无望。M̄-koh,使徒保罗beh kā in讲,siōng重要ê是tī耶稣内面,m̄是tī摩西律法中。

Tùi chit段经文thang看tio̍h有人对使徒保罗所讲ê话感觉相当不满,特别是犹太人,因为伊bat讲过:「Án-ne 讲起来,做犹太人有甚么优点?受割礼有甚么利益?(全民版)」(罗马书三:1)以讲到tī血统上作为亚伯拉罕ê kiáⁿ孙,并无表示有甚么特别(参考罗马书四:1),chit种观点lóng hō͘犹太人感觉深受伤害。因此,有bē少犹太人认为使徒保罗根本就是teh侮辱犹太人,有辱犹太人ê荣耀。因此,使徒保罗用chit段话beh向犹太人表达一个基本心意:期待tio̍h家己ê同胞犹太人,ē-tàng相信耶稣,因为耶稣就是in期待已久、是hit位beh来ê弥赛亚。若是ē-tàng hō͘犹太人相信耶稣,就算因此á hō͘伊受tio̍h上帝ê愤怒、诅咒,伊lóng愿意接受。

第1到3节,使徒保罗并无否认犹太人是上帝选民,尤其是因为kah上帝之间有立约ê关系,因为án-ne,in是特别照顾ê民族,ná亲像先知阿摩司所讲ê「tī全世界hiah-ni̍h chē国家内面,我拣选tio̍h lín」(参考阿摩司书三:2)仝款。不过,因为犹太人拒绝耶稣成做in ê救主,因为án-ne,使徒保罗苦劝伊ê同胞,希望in ē-tàng接受耶稣,伊甚至讲如果为tio̍h chit-ê tāi-chì,「纵然我家己hō͘ 上帝诅咒,kah基督隔绝,我mā愿意」chit种热情kah苦心,thang看出伊迫切ê心情。

第4到5节,tī chit两节经文中,使徒保罗提出犹太人几点特别ê所在:
(a)In是上帝ê「选民」(参考申命记七:6,以赛亚书四十九:7,约翰福音十五:16)。

(b)「有kiáⁿ ê名份」(参考耶利米书三十一:9,何西阿书十一:1)。

(c)「分享上帝ê荣耀」(参考以赛亚书三十五:2),指ê是上帝奇妙ê作为,他ê子民mā享受这奇妙作为ê光辉,就是hō͘人赞叹。

(d)kah上帝有「约」,chit-ê约thang tùi亚伯拉罕kah上帝立ê「约」来看(参考创世记十五:17—21、十七:1—8);上帝透过摩西kah全体以色列人所立ê「约」(参考出埃及记十九:5—6、申命记廿九:10—15);约书亚chhōa以色列人民kah上帝立约(参考约书亚记廿四:14—18;耶利米书三十一:31—34)。

(e)上帝赐hō͘ in「律法」(参考出埃及记二十:1-17)。表明生活有顶真ê规律。

(f)有敬拜上帝ê知识,参考利未记中规定敬拜ê礼仪,表明人对上帝ê敬崇。

(g)应允拯救ê恩典(参考以赛亚书九:6—7、五十五:3、耶利米书廿三:5—6、以西结书三十四:23—24、使徒行传十三:23)。

(h)犹太人kah耶稣lóng是「仝一个族ê」,意思是teh指上帝beh藉tio̍h犹太人来拯救所有ê世人,mā表示上帝特别意爱犹太人chiah会án-ne。

这mā说明使徒保罗并m̄是看轻犹太人,却是重视身为犹太人ê身分kah荣耀。

第6到9节,tùi chit段经文thang想像会tio̍h,使徒保罗ê án-ne讲法,必定hō͘犹太人感觉相当震撼,因为伊讲「以色列人并无lóng是上帝ê选民」,这kah in久长以来ê认知有cheng差。原因是犹太一直是tùi血缘ê层面看in kah上帝之间ê关系,m̄-koh使徒保罗是tùi上帝拣选ê角度来看。伊引用创世记第廿一章12节「你会tùi以撒得tio̍h我所应允ê后代」chit句话。因为án-ne,第7节ê讲法是tùi信仰ê层面看亚伯拉罕ê kiáⁿ孙,á tī chia特别指明以撒就是上帝所拣选ê。Á以实玛利虽然mā是亚伯拉罕ê kiáⁿ,却m̄是上帝所拣选ê对象。

Án-ne问题就出来à;上帝beh拣选甚么人?这是上帝ê主权,m̄是犹太人ē-tàng影响上帝ê决定。就亲像上帝无拣选以实玛利,m̄-koh拣选了以撒,chiah有今á日ê雅各kiáⁿ孙犹太人仝款。Á这拣选m̄是根据人ê条件,完全是上帝ê「恩典」,意思是teh指原本m̄是人ê条件ē-tàng配得上,却是因为上帝ê厚爱,hō͘人lóng无条件得tio̍h。因为án-ne,拣选,这是上帝hō͘人ê特殊恩典。换句话讲,上帝「应允」hō͘他所拣选ê人有甚么恩典,这是上帝ê主权,m̄是根据人ê任何条件所达成。续落来伊引用创世记第十八章10节,天使对亚伯拉罕所讲ê应允。chit-ê应允teh表明,性命ê主,是上帝;人看做无可能ê事,tī上帝就是可能,因为tī上帝手中,无做bē到ê事(参考创世记十八:14)。仝款ê,使徒保罗引用chit种经文,就是beh hō͘犹太人知影,只要是上帝ê应允,任何人lóng有性命得tio̍h拯救ê ǹg望。

第10到13节,使徒保罗Tī chit段经文中koh再进一步引用创世记第廿五章22到23节,雅各kah以扫出世ê事,m̄-koh上帝却拣选小弟雅各,á m̄是大kiáⁿ以扫。Chiah-ê lóng teh表明:上帝ê拣选m̄是根据人ê条件来论。因为án-ne,犹太人无法度因为án-ne认为上帝bē拣选外邦人,án-ne chiah是使徒保罗ê中心思想。

第14到18节,「上帝beh怜悯甚么人,就怜悯甚么人」chit句话连续出现两pái;续落来koh讲他「beh hō͘甚么人固执就hō͘甚么人固执」,使徒保罗chit种讲法已经真清楚teh表达一个基本认bat kah观念:拣选ê主权是tī上帝。上帝beh拣选甚么人,lóng m̄是人thang决定ê。这mā表示上帝ê决定tāi-chì,并m̄是根据人ê任何条件。换句话讲,犹太人并无比任何其他族群koh khah有资格。

Tī使徒保罗ê观点里,有两点是无法度改变ê事实,一是上帝对以色列人有应允,因为án-ne,上帝绝对bē废弃他所应允过ê诺言。二是使徒保罗khah强调ê,上帝ê chiah-ê应允已经tī耶稣内面完成à。使徒保罗以上帝拣选雅各为例说明,上帝ê拣选kah人ê行为好bái无关系,却是上帝beh透过所拣选ê人来帮助koh khah chē ê人认bat他tī耶稣内面ê救恩,这救恩正thang说明上帝怜悯ê疼。Ná亲像咱所知影ê,雅各并m̄是个诚实ê人,却是上帝beh透过雅各来彰显他ê疼。上帝bat拣选巴比伦成做他ê奴仆来惩罚以色列人民。仝款ê,上帝mā拣选波斯帝国带领以色列人民重回家乡重建家园kah圣殿,chiah-ê lóng tī说明一件事:上帝ê拣选是为tio̍h beh显明他ê慈爱,kah人ê条件无关。


重新查询 专卷研经 罗马书系列
错误回报,请联系comm[@]fhl.net