Chit章是tùi摩西律法ê观点teh谈信仰kah性命ê问题。使徒保罗先tùi人性软弱ê一面切入，而且kā人性ê弱点刻画得非常清楚，mā对罪分析siōng-kài透彻。伊讲：「我无去做我所意爱ê 好，颠倒tńg 去做我无意爱ê pháiⁿ。(全民版)」（第19节）伊提起人心内深处有两个「律」，一个是chiap-chiap诱惑人弃sak上帝法则ê「律」，另外一个是一再警告人bē-tàng弃sak上帝法则ê「律」，ài人知影节制，mā会知影家己ê软弱。使徒保罗讲chit两个「律」一直存在tī人心内深处，m̄是一般外人ē-tàng看会tio̍h。伊讲出人ê软弱是：人无法度排除诱惑犯罪ê气力，明明知影án-ne bē-tàng，却真想beh去试看māi，结果人输了，这是性命中siōng大ê苦楚。M̄-koh伊mā讲siōng值得感谢ê，就是因为有主耶稣基督，人才ē-tàng因为án-ne soah tùi罪恶中得tio̍h拯救（参考第25节）。得救，这是性命ê一线希望，mā是基督教信仰siōng重要ê信息，hō͘人原本会死亡ê性命得救。

Tī chit段经文中使徒保罗用婚姻ê关系teh讲述人kah上帝ê关系。对犹太人来讲，使徒保罗chit种譬喻真清楚，因为以色列民族ê信仰文化中，会kā上帝kah in民族间ê关系，用夫妻来表示（参考以赛亚书六十二：4—5，耶利米书三：20，以西结书十六：8，何西阿书二：19—20）。因为án-ne，当使徒保罗用夫妻关系来讨论信仰ê问题ê时，对犹太人来讲，一点mā不生份，真容易了解。
第1节，chit节开始是对律法做出定义：表示律法只对活teh ê人才有效力。M̄-koh信仰就m̄是án-ne；信仰会谈论到人死后ê事。

第2到3节，使徒保罗用婚姻ê关系来形容律法效力之限制。犹太人ê社会是用男性做中心，只有cha-po͘人才ē-tàng对cha-bó͘人提出离婚ê要求，cha-bó͘人根本无chit种机会（参考申命记廿四：1）。In ê观念中，cha-bó͘人是附属tī cha-po͘人ê。使徒保罗tī chia想beh表明一点：夫妻因为律法有婚姻ê关系。M̄-koh，如果丈夫往生后，bó͘就是自由ê人，她 thang koh再kah别人结婚。

第4到6节，使徒保罗kā用婚姻关系举例来说明罪kah人ê关系。一个kah基督连结ê人，因为耶稣已经死tī十字架顶了，人ê罪就跟tòe死去。chit-má耶稣是有koh活，因为án-ne，连结tī基督内面ê人，mā tòe koh活，无koh附属tī罪，á是一个自由ê人，ē-tàng kah上帝重新和好ê一个契机，thang照圣神ê指示重新过新生活ê人，而且ē-tàng成做上帝ê同工。