罗马书 5章1节 到 5章11节   背景资料  上一笔  下一笔
罗马书tùi第五章开始到第八章,是另外一个主题。使徒保罗提起一个重要ê信息:因为信á kah上帝有和好关系ê人,必定会得tio̍h永恒ê性命。Tī chit段长到四章ê经文中,使徒保罗进一步强调:「信」,一定tio̍h kah koh活ê耶稣结连做伙。因为耶稣就是上帝hō͘人类siōng大ê恩典。是人kah上帝之间ê唯一桥梁。无耶稣,人就无法度kah上帝重新和好,á耶稣就是为上帝带来他特别ê「爱」。因为án-ne,tī chit段经文中,ē-tàng看出使徒保罗强调tio̍h:有上帝ê疼ê所在,就有「生」。Tī chit-ê四章中,伊以第五章讲「生」ē-tàng脱离上帝ê「愤怒」;第六章讲「生」就是脱离「罪恶」ê缠绊;第七章讲「生」脱离「律法」ê锁枷;第八章讲「生」脱离「死亡」ê要胁。

Chit段经文相当重要,特别是tī第6到11节,使徒保罗讲出基督教信息siōng重要ê精华:当咱iáu是罪人ê时chūn,基督已经为咱死去!换句话讲,m̄是因为咱有甚么好,上帝chiah疼咱,却是咱iáu是罪人ê时chūn,上帝已经先疼咱。Chit种ê疼,是无法度估算ê,mā是无法度取代ê。因为án-ne,伊讲这是上帝无比ê疼。

第1节,一开始,使徒保罗就肯定信耶稣ê人lóng会hō͘ 上帝认定tio̍h义人。Chit种义人,就是kah上帝有和好关系ê人。

第2节,「活tī上帝ê恩典里」ê「活」字,是「引chhōa」、「绍介」ê意思,后来用tī礼拜ê时,以chit-ê字来表示带领人来认bat耶稣ê救恩。使徒保罗用chit-ê字表示:耶稣就是引chhōa人来认bat上帝ê慈爱,mā因为耶稣,人chiah会知影上帝ê疼jōa-ni̍h-á宽阔、广大、深奥。

另外,chit-ê「活」字mā teh表示海港ê引水人带船入港仝款。耶稣就是án-ne ê角色,伊帮助人ê性命进入上帝ê「港口」,因为耶稣,人ê性命得tio̍h真正安息。

「分享上帝ê荣耀」,chia ê「荣耀」一词,thang对照第三章23节所讲ê,人因为犯罪,会失去「上帝ê荣耀」。chit-má因为有耶稣,chiah重新tńg来到本来上帝创造人ê时所hō͘ in人ê「形像」ê荣耀。起初上帝创造ê世界是欢欣ê,因为上帝创造万物后,「赐福」hō͘所有受造物「繁殖」ê气力,这表示受造物本身充满tio̍h性命力,是「好」ê表现(参考创世记一:20—22、26—28)。可惜,后来则因为人犯罪,hō͘ kui个受造ê大地连带受tio̍h惩罚(参考创世记三:17)。chit-má tī主耶稣内面,一切万物重新受造(参考以弗所书四:24)。这「荣耀」一词,一再出现tī罗马书中(参考三:23、八:17-18、21、30、九:23)。意思是teh指人ê kui个存在,lóng hō͘ 上帝ê荣耀所hip亮。Chit种「荣耀」mā ē-sái讲是上帝ê「面」、上帝ê「慈悲怜悯」(参考出埃及记三十三:18—19)。

第3到5节,chit段经文是基督徒不时引用ê经文。Chia使徒保罗强调基督徒ê信仰,是因为耶稣却ē-tàng hō͘人得tio̍h性命ê气力,hō͘一个人「tī患难中」mā会有喜乐。原因是tī耶稣内面,性命会有ǹg望。因为án-ne,即使有苦难,mā会欢喜。因为知影将来有性命ê ǹg望teh thèng候(参考罗马书八:18)。

「忍耐」,是teh指ē-tàng承受压力,m̄是逃避,却是用喜乐ê心接受(有含「忍受」ê意思)。

「患难培养忍耐」,tio̍h注意chit-ê「忍耐」,意思并m̄是真无奈ê接受,却是有坚定ê信心teh等待。因为知影tī苦难ê背后有美好ê应允teh thèng候。

「忍耐蒙上帝褒奖」,《中文和合本》用「忍耐生老练」,所谓「老练」,chit-ê词tī希腊文原文是teh指teh冶铸贵重金属,经过不断火炼,kā其中所含ê杂质除掉,hō͘金属变kah koh khah精纯(参考约伯记廿三:10 ê「考验」、「纯洁」)。使徒保罗tī chia用「褒奖」一词,tī哥林多后书第二章9节用「考验」、第八章2节「考验」、第九章13节「证据」。Tùi chia thang明白:信仰就是需要chit种锻炼、考验,并m̄是安安适适,kah-ná lóng甚么事情无发生就ē-tàng得tio̍h。

「上帝ê褒奖带来ǹg望」,这「ǹg望」并m̄是凭空得tio̍h,却是teh经历过真chē ê测试、磨练、考验,等通过考验了后chiah会有ê果子。

「ǹg望bē致使落空」,chia ê「ǹg望」一词,是teh指对上帝有信心。做一个人对上帝有信心ê时,上帝ê灵会tī伊ê性命里,chit种人bē对性命失望,koh khah bē感觉孤单、无助(参考以赛亚书廿八:16)。因为伊知影上帝爱伊,会kah伊同在。

「伊ê疼灌ak tī咱心内」,使徒保罗tùi「信心」讲tio̍h「ǹg望」;koh再tùi「ǹg望」讲tio̍h「爱」,chiah-ê用词lóng是环环相扣tio̍h。换句话讲,对上帝ê拯救有绝对信心ê人,性命中必定会体验tio̍h上帝拯救ê「爱」。

请注意,chia使徒保罗是第一pái tī罗马书用「爱」(agape)chit-ê字。使徒保罗每pái讲tio̍h上帝对人类ê「爱」ê时,所用ê就是chit-ê「agape」。这是teh指牺牲、奉献、无私、无换来代价ê「爱」(参考约翰一书三:16)。Chit种tùi上帝来ê「爱」,是透过「圣神」来「灌ak」tī人ê心内,是lóng无保留,是源源不断、无停止ê,甚至到满溢出来ê样式(参考诗篇廿三:5)。

第6到9节,chit段经文ē-sái讲是罗马书siōng精华ê一段。使徒保罗讲上帝爱世人,á世人原是罪人。上帝并m̄是因为人好,chiah爱;相对ê,是因为人iáu teh罪恶中沉沦、痛苦tio̍h,chit时,上帝就先疼咱à。Chit种疼是甘愿hō͘他ê独生kiáⁿ耶稣牺牲性命来救赎人。请注意,chia是讲当咱iáu是「罪人」ê时chūn,á m̄是讲「当咱iáu是外邦人」,á是「当咱iáu是犹太人」。使徒保罗是故意beh án-ne讲,为tio̍h是beh突破「犹太人」kah「外邦人」之间ê差别。因为tī上帝ê面前,所有ê人lóng是「罪人」,无「犹太人」kah「外邦人」之间ê分别。犹太人并无否认家己是「罪人」,m̄-koh in不时有一个错误观念,认为有亚伯拉罕当in ê祖先,thang hō͘ in免tī上帝ê惩罚。Mā因为án-ne,行洗礼约翰大声指出in chit种想法kah认知是严重ê 错误(参考马太福音三:9)。

第10到11节,使徒保罗讲出一个人如果kah上帝有和好ê关系,性命就开始有变化,伊会以耶稣为性命siōng大ê喜乐,因为是tī耶稣内面,人看tio̍h上帝ê救恩充满tio̍h伊ê性命。

重新查询 专卷研经 罗马书系列
错误回报,请联系comm[@]fhl.net