罗马书 2章1节 到 2章16节   背景资料  上一笔  下一笔
Chit章thang分做两个部分来看,一是tùi第1到16节,二是tùi第17到29节。Chit章主要是针对犹太人所认为ê得救kah律法关系,讲tio̍h上帝ê审判问题。

Tī chit章中,使徒保罗讲tio̍h一个重要观念:m̄是知影甚么重要就ē-tàng,siōng重要ê是知影ài做甚么,chiah会得tio̍h上帝ê赐福。

犹太人一直认为家己kah上帝有特殊ê关系,常常认为上帝kan-taⁿ会爱犹太人。Tī in ê观念中,lóng是认为上帝kan-taⁿ会审判外邦人,m̄-koh对犹太人则会因为in是选民ê关系,拥有特权,会对in特别保护,赐in外邦人所无ê恩典。M̄-koh使徒保罗认为无chit款tāi-chì,颠倒,所有做恶ê人lóng会受tio̍h上帝ê惩罚。如果上帝ê奖赏是tùi犹太人到外邦人,惩罚mā是án-ne,犹太人并m̄是特殊分子。「因为上帝是不偏待人ê。」

第1到4节,tī chit段经文中,使徒保罗用「评断」chit-ê词,chit-ê词一再出现tī罗马书中。Tī chia,使徒保罗提起犹太人欢喜评断外邦人ê错,m̄-koh in所做ê,却kah in所评断ê对象仝款,chit种人koh怎样ē-tàng逃避上帝ê审判?

第4到6节,使徒保罗tī chia用三个词表示上帝特殊ê疼(1)仁慈。这是teh指上帝lóng是hō͘人悔改ê机会。彼得后书第三章9节:「有人想讲主teh 延chhiân 他ê 应允,其实是teh 宽容lín;他无ài 有人灭亡,是ài ta̍k 人lóng 悔改。(全民版)」(2)宽容。是teh指上帝将他对人ê受气暂时停止落来,为tio̍h是beh beh hō͘人有机会赶紧悔改。(3)忍耐。这是teh指一再坚持落去ê意思,表示讲上帝对人犯罪ê严重,本来就beh惩罚了,m̄-koh他iáu是一再忍耐落来,就是为tio̍h希望人赶紧悔改。Án-ne thang看出上帝ê疼就是希望人悔改。悔改,mā是kui本圣经ê信息,因为只有悔改chiah ē-tàng消除上帝ê受气。

第6节,上帝会照人所做ê事、行为来「报应」,chit种观念是来自旧约圣经ê教导(参考列王记上八:32;诗篇廿八:4、六十二:12;箴言廿四:12;耶利米书十七:10;以西结书十八:30、三十三:20)。

第7到11节,chit段经文真清楚说明一点:善kah恶之间,上帝看kah非常清楚。所谓恒心行善,就是teh追求tùi上帝来ê荣耀,kah永恒ê性命。换句话讲,真实ê行善,并m̄是为tio̍h beh荣耀家己,因为án-ne,上帝对chit种人会hō͘ in「尊贵、荣耀,和平安」;相对tī hiah-ê自私ê人,就是kah追求行善ê人颠倒,chit种人kan-taⁿ会想beh荣耀家己,kā家己当做一切ê中心,chit种人甚至会kā家己偶像化,chit种人,kan-taⁿ会为家己带来上帝愤怒ê审判á遭遇痛苦kah患难。无论是犹太人á是外邦人lóng仝款。原因是上帝并无偏待任何人,tī上帝面前,任何人lóng仝款,无族群之别,mā无社会地位ê高低,koh khah无所谓身分ê贵贱。所有ê人,khiā tī上帝面前接受审判ê时,lóng仝款。

第12到16节,tī chit段经文中,使徒保罗真清楚指出一个观念:m̄是只有听摩西律法ê人,就有免受审判ê保障,这是错误 ê讲法。上帝ê审判是根据每一个人所讲所行为根据。有摩西律法ê犹太人,上帝会根据律法ê基础来审判,á无摩西律法ê人犯罪,上帝mā有另外一种方式来进行审判,á chiah-ê审判lóng是公正ê。真实ê律法并m̄是tī外面表ê文字顶面,却是在内心ê省思。上帝hō͘所有受造ê人lóng有「良知」,chit种来自心内ê「良知」,会做为将来审判ê根据。


重新查询 专卷研经 罗马书系列
错误回报,请联系comm[@]fhl.net