罗马书 15章22节 到 15章33节   背景资料  上一笔  下一笔
Tī头前使徒保罗已经真清楚表明,伊并无想beh tī罗马城开拓教会,因为罗马城已经有人传福音,伊深惊会hō͘人误会。Koh讲,tùichit-má chit段经文thang看出,伊写chit本罗马书信ê主要目的,就是希望透过chit种书信认bat,hō͘罗马教会信徒全力支持伊到西班牙去传福音,án-ne chiah是伊写此书信ê目的。Kah伊写其它书信teh处理教会内部发生ê纠纷非常无仝款。因为án-ne,chit段经文ē-sái讲是伊清楚表示beh去罗马城拜访该教会ê原因。

为甚么使徒保罗一直希望到罗马去?伊并m̄是beh去罗马开拓福音事工,mā m̄是beh tī hia开拓教会,因罗马已经有教会,主要原因有可能是希望到西班牙去传福音(第24、28节),beh藉tio̍h罗马教会信徒ê气力做支援。使徒保罗ê作法就是建立一间教会后,就以该间教会当做支援中心,继续开拓另外一间新教会传福音。

第22到24节,tī第一章13节,使徒保罗并无说明伊为甚么「有kúi-nā-pái计画访问」罗马教会,却lóng受tio̍h阻碍ê原因。Á hō͘ chit项阻碍一直无kah早处理ê另外一个原因,是tī第20节已经提起ê,罗马城已经有教会,就无亲像hiah-ê iáu未建立教会ê地区hit种急迫。Mā可能iáu thang án-ne了解:使徒保罗写罗马书ê时,真可能是tī哥林多城写ê。当时使徒保罗tú tī hia待了三个月ê时间,原本有意赶紧去耶路撒冷了后,就去罗马访问。M̄-koh当伊离开哥林chē到达以弗所,并且结束tī以弗所ê工作,这是伊ê第二pái旅行传道。当伊正准备继续计画ê旅程ê时,却因为hit-ê城发生暴动á延误到哥林多ê时间(参考使徒行传十九:21—23),hō͘伊继续停留tī hit-ê城长到两年以上ê时间。这mā是伊延迟到罗马去ê原因。因为án-ne,伊希望tī工作有一个段落了后,就去罗马教会访问。

第25到26节,chit三节讲出使徒罗伊无办法chit-má就去罗马城ê原因,是为tio̍h beh kā马其顿kah亚该亚等地教会所捐出来beh救助耶路撒冷信徒ê钱赶紧送去耶路撒冷。

第27到28节,伊提出一个真重要ê信仰认知:分享。罗马教会ē-tàng得tio̍h福音信息,是kah耶路撒冷教会有密切关系。因为,耶路撒冷教会分享了福音信息hō͘罗马kah外邦地区ê教会信徒,chit-má外邦人已经知影耶路撒冷有贫困ê人民子弟,就有责任kah in同齐分享物质上ê需要。因为án-ne,伊希望罗马教会也ē-tàng募款救助耶路撒冷ê信徒。伊表示下pái去罗马城ê时,mā会kā福音ê信息分享hō͘罗马教会ê信徒。

第30到31节,使徒保罗请求罗马教会为伊ê行程代祷。尤其是关心伊kā前往耶路撒冷ê事。Chia提起「受tio̍h tī犹太hiah-ê m̄信ê人ê危害」,是因为有kóa顶真、保守ê犹太人,in对使徒保罗tī外面邦地区ê工作相当有意见,特别是使徒保罗并无坚持外邦人基督徒一定tio̍h先受割礼(参考使徒行传廿一:20—22)。其实使徒保罗有一个心愿:伊想用chit种救助耶路撒冷教会sàn-chhiah兄姊ê方式,来缩短犹太人基督徒,kah外邦人基督徒之间ê隔阂有关。伊ǹg望犹太人基督徒会感受tio̍h外邦人基督徒tī信仰上ê疼心,á koh khah愿意接纳外邦人信徒,mā会关怀同在耶稣救恩里ê兄弟姊妹,并同时肯定伊tī外邦人地区工作ê意义。

第32节,chit句「上帝若允准」,mā说明使徒保罗心中有一个预感,he就是伊会tī耶路撒冷受tio̍h迫害,chit件事应该是kah先知亚迦布ê预言有密切关系(参考使徒行传廿一:10)。

第33节,有bē少学者认为罗马书到chia就结束loh。因为chia出现「阿们」(参考罗马书十一:36),表示此书信ê段落结束。M̄-koh mā有另外一种看法,认为tio̍h án-ne书信真有可能是分做kúi-nā-pái chiah写完(参考罗马书十一:36、十六:27)。「赐平安ê上帝」,chit句话koh一pái出现tī哥林多后书第十三章11节c句;腓立比书第四章9节;帖撒罗尼迦前书第五章23节;帖撒罗尼迦后书第三章16节。Chia ê「平安」,并m̄是讲一切lóng真顺利、无事发生,却是指tī苦难中,mā bē丧失对上帝ê信心,iáu有坚强ê意志。

重新查询 专卷研经 罗马书系列
错误回报,请联系comm[@]fhl.net