使徒保罗所写ê书信有一个特色，就是会用一kóa篇幅讨论有关信仰kah生活ê关系。Chit种kah生活相关ê问题，m̄-nā是tī家庭、社会，同时mā tio̍h用tī教会共同信仰团契中。教会就是一个用信仰建立起来ê团契，有来自各种无仝社会、家庭生活背景，对事物ê看法真自然tek mā会有所差别。Koh khah值得注意ê是，当使徒保罗tī外面邦地区开拓教会后，教会内ê信徒就开始有所谓「犹太人」kah「外邦人」。Á犹太人信了耶稣了后，真自然mā会kā传承自犹太人ê风俗、信仰认知带入来。仝款ê，外邦人mā有in家己传承落来ê风俗，这二者之间存在真大ê差别，却beh因为共同信耶稣ê关系来相处做伙，这就需要真大ê容忍心胸chiah有办法，若无，单单是食ê问题，就会引起真chē争端。

罗马教会虽然m̄是使徒保罗所开拓ê，mā仝款有类似顶面所讲ê问题发生，ná亲像食物ê问题，发生tī哥林多教会ê事（参考哥林多前书八：7—12），mā仝款发生tī罗马教会。食物ê问题tī犹太人看起来，就有真chē ê限制，摩西律法写得真清楚，分做清气kah无清气ê物（参考利未记第十一章），真自然tek，犹太人虽然信耶稣，m̄-koh对食物ê看法，必定受tio̍h传统观念ê影响。彼得tī异象中ê反应就是一个真好ê例（参考使徒行传十：9—16）。相对tī外邦人来讲，犹太人认为无清气ê物，外邦人看法可能无仝。

Tùi第十四章开始，直到第十五章13节，使徒保罗lóng锁定一个主题：tī基督ê信仰团契中，大家tio̍h彼此接纳，互相扶持。用体谅别人ê软弱，这就是tī耶稣内面爱ê一种表现方式。

第1到4节，chit段经文是讨论到有关食物ê问题。Tī第1节ê「信心软弱」，并m̄是因为tī性命中tú-tio̍h极大困难，á是因为发生挫折，致使对上帝ê信心产生怀疑、摇动，并m̄是án-ne，却是指tī良心上ê感觉kah信仰之间有冲突，却m̄知该án怎chiah好有giâu疑，á是良心上ê不安。Chit种情况差不多每一个人lóng会tú-tio̍h，因为án-ne，使徒保罗ài大家学习「接纳」，á m̄是用争论ê方式。Chia是tùi生活中每工lóng会tú-tio̍h ê问题讲tio̍h，就是lim食ê事。圣经ê教导是所有上帝赏赐ê物，lóng是洁净ê（参考使徒行传十：15）。使徒保罗希望大家lóng ē-tàng接纳彼此之间对食物看法ê差别，á m̄是一味地批评。

第5到6节，chit两节是关于守toh一天才算是「安息日」ê问题。Chit点确实困扰tio̍h初代教会，即使tī今á日mā有chit种问题，只是无hiah-ni̍h明显而已。耶稣讲：「安息日是为tio̍h 人来设立，m̄ 是人为tio̍h 安息日来创造。(全民版)」（马可福音二：27）使徒保罗强调每一个人lóng应该有家己ê见解，m̄-koh重要ê是无论食á是选择聚会ê时间，lóng是为tio̍h尊崇主ê救恩chiah-tio̍h。

第7到9节，使徒保罗提供一个基督徒一定有ê观念：为tio̍h基督á活。因为基督就是为tio̍h咱来死，mā为咱来koh活。因为án-ne，每一个领受基督恩典ê信徒，lóng应该有chit种认bat，无论是生、是死，lóng是为tio̍h kah基督连结。

第10到12节，chia真清楚讲出一个重要ê信仰认知：每一个人lóng tio̍h向上帝交帐，接受审判（参考希伯来书四：13）。第11节是引用以赛亚书第四十五章23节。使徒保罗mā引用chit节诗歌tī腓立比书第二章10到11节，强调耶稣就是主，大家lóng beh向伊「下拜」。