罗马书 12章9节 到 12章21节   背景资料  上一笔  下一笔
Chit段话真亲像哥林多前书第十三章ê内容。使徒保罗强调一个真诚ê心内,m̄-nā是用来敬拜上帝,mā tio̍h仝款用来对待所有kah咱同齐过信仰团契生活ê兄弟姊妹。如果tī信仰团契中,无法度án-ne对待仝款信仰ê兄弟姊妹,就真oh讲出信仰ê意义tī tó位。

第9到12节,chit段经文真类似哥林多前书第十三章ê内容。主要teh强调基督徒chit-ê信仰团契,ná亲像一个家庭中ê兄弟姊妹,有手足之情,应该彼此相疼,会彼此分享。Tī患难中有喜乐,而且存 ǹg望。Chiah-ê劝勉对早期受迫害ê基督徒有真大鼓舞作用。

第13节,chit节thang参考利未记第十九章33到34节,以及申命记第十五章7到8 节。Lóng是teh强调tio̍h好款待外出ê人,mā就是sàn-chhiah人。

第14节,chit节thang参考马太福音第五章44到46节,路加福音六:27到28节。Lóng是耶稣教导他ê门徒kah跟随者所讲ê话。

第15节,chit节ē-sái讲是「爱人如己」siōng好ê写照。

第16节,「同心彼此关怀」,这清楚讲出一个信仰团契,ē-tàng维持而且bē变质,á是发生分裂,就是建构tī chit种基础之上。「bē-tàng心高气傲」,chit句话thang参考第3节。使徒保罗劝勉基督徒,无论是甚么身分,lóng应该存谦卑ê心。。M̄-thang自高,因为有ê才华lóng是tùi上帝来ê赏赐。

第17到18节,「M̄-thang以恶报恶」chit句话,tī帖撒罗尼迦前书第五章15节koh一pái出现。这kah摩西ê教示—「以牙还牙、以眼还眼」无仝(参考出埃及记廿一:24—25)。耶稣就是教导他ê门徒,tio̍h用疼来赢过仇敌(参考马太福音五:38—42),使徒保罗传承耶稣chit种教导。Mā只有án-ne,chiah ē-tàng tī信仰团契中,大家和睦相处,并且扩大到所khiā起kah工作ê环境中。

第19节,thang参考利未记第十九章18节;诗篇第九十四篇1到2节、第一三五篇14节;箴言第二十章22节。因为人ê判断会有误差,m̄-koh上帝明白所有ê一切,特别是上帝鉴察人ê心内,知影人心内真正计谋,只有上帝ê审判chiah是公正ê,á这m̄是人ê能力所及。Chit节mā teh强调对上帝ài有信心(参考申命记三十二:34)。圣经mā一再提起上帝是会「报应」ê,这报应mā teh表明上帝是会惩罚迫害、陷害、欺压别人者。

第20到21节,thang参考箴言第廿五章21到22节。「羞惭交加」,chit句话tī《中文和合本》ê翻译是用「Kā火炭堆tī敌人头壳顶」。这是古代ê人惩罚仇敌ê方式之一。另外,古埃及ê时代,做一个人表明忏悔ê时chūn,就是the̍h-tio̍h一炉火炭khǹg tī家己ê头壳顶,表示真心忏悔。使徒保罗强调ê是用「善」胜恶。Mā就是用疼来赢过仇敌,因为报仇,kan-taⁿ会带来koh khah chē ê仇恨,bē解决彼此之间ê问题。

重新查询 专卷研经 罗马书系列
错误回报,请联系comm[@]fhl.net