使徒保罗继续讲tio̍h犹太人kah上帝之间ê关系，伊iáu是一本初衷地强调：耶稣，chiah是人kah上帝之间建立合宜关系ê唯一途径。对一个受过相当顶真法利赛派训练ê使徒保罗（参考使徒行传廿二：3、廿三：3）来讲，这并m̄是一件简单ê事。因为犹太法利赛派ê人是非常强调遵行摩西律法ê重要性，并且认为只有án-ne chiah ē-tàng hō͘人看tio̍h得救ê ǹg望，á使徒保罗因为遇tio̍h koh活ê耶稣，hō͘伊对性命ê得救有完全无仝ê体验，mā因为án-ne，改变了伊本来ê性命观念（参考腓立比书三：7—8）。一个得救ê人，就是性命态度改变ê人，会kā本来看做「贵重」、「好」、「价值」等，重新量、评估。「改变」性命ê态度kah观念，这是非常重要ê信仰见证。Chiâⁿ如使徒保罗一再强调ê，tī耶稣内面，成做一个「新造ê人」（参考哥林多后书五：17），kah chit-ê世界ê腐败有所距离、差别，因为心灵有更新ê心思意念（参考罗马书十二：2，以弗所书四：23）。使徒保罗真清楚把握tio̍h伊讨论ê主题――上帝tī耶稣内面ê恩典kah摩西律法之间ê差别。

使徒保罗明确指出犹太人ê问题，是无想beh靠上帝tī耶稣内面ê救恩，却是想óa靠家己ê好行为来自救，伊指出chit种观念、想法、作法，是错误 ê，无真正了解上帝ê救恩。

第1节，chit节thang参考第九章1到3节，koh一pái表明使徒保罗ê心境，伊是jōa-ni̍h-á期待家己ê犹太同胞ē-tàng信耶稣á重新kah上帝和好。为tio̍h án-ne，伊不断来祈祷上帝ê灵ē-tàng感动犹太人ê心。

第2到3节，使徒保罗明确指出犹太人真正ê问题所在，就是对上帝真热心，m̄-koh却无一定是有「真知识」做基础。Chia所讲ê「真知识」是teh指tio̍h对耶稣ê认知来讲，mā就是正确认bat耶稣是基督，是性命ê主，á m̄是óa靠摩西律法（参考使徒行传廿二：3—5）。另外一点，使徒保罗已经指出犹太人ê问题是：认为只要藉tio̍h完成摩西律法，就ē-tàng修好kah上帝之间ê关系，m̄-koh却bē记得上帝已经差遣耶稣成做拯救ê óa靠，m̄是用家己ê气力，却是知影谦卑tńg来到耶稣身上。伊tī chia指出「律法ê义」kah「信ê义」之间差别；前者说明人想beh用家己ê行为完成，后者明示人ê有限、软弱，需要上帝ê救恩，á这救恩就tī耶稣身上，可惜ê是犹太人拒绝接受。

第4节，「终止」，指ê就是「完成」、「成全」、「结束」ê意思。Kā它比较马太福音第五章17节，耶稣讲：「M̄-thang 想讲我来ê 目的是beh废除摩西ê 律法á 是先知ê 教示。我来m̄ 是beh 废除，是beh 成全。(全民版)」ē-tàng看出使徒保罗beh表明ê就是：tī耶稣内面已经完全了律法所需要ê一切。Tī伊ê内面，人就会发见律法真正内涵，而且koh khah容易kā它实践出来。Tùi马可福音第十章17到23节所记载，hit位财主来问耶稣有关永恒性命之道ê问题ê时，伊是自细汉就遵守摩西律法ê规定，m̄-koh伊却无tùi摩西律法中看tio̍h、体验tio̍h永恒性命之道，chiah会来问耶稣。这tú好teh说明：想靠摩西律法得tio̍h永恒性命ê想法是错误 ê。