启示录 8章1节 到 8章13节   背景资料  上一笔  下一笔
头前已经讲过启示录tī编辑上有一个特色,就是用「七」ê数字连续转换。Koh讲,tī编辑上作者mā运用一种「连环扣」ê方式,就是tī第六kah第七ê异象之间,插入另外一个连续「七」ê异象。Á chit两个「七」ê异象koh有仝款ê意义tī内面。启示录chit种中断ê编辑方式,koh一pái出现tī chit种原本已经被中断ê异象中,mā就是tùi第六章12到17节开启第六个印了后,原本thang直连连续第八章1节ê第七个印,m̄-koh被第七章ê插入异象hō͘ phah断à。然后,tùi第八章1节开启第七个印了后,原本应该thang直接解说chit第七个印,m̄-koh soah koh插入第2到5节讲有七个天使the̍h七支号筒。Án-ne表示,第七个印就是teh讲述chit七个天使kah七支号筒。Chit种一再「插入式」ê编辑方式mā就成了启示录ê特殊编辑方法。

    第1节,这是七个印之异象中ê最后一个。Tī第六个印所显示出来ê景象,ná亲像末日来临ê时天翻地覆ê状况,所有ê人、不分任何阶级,lóng躲进了岩石洞穴,甚至呼喊hiah-ê山岭岩石倒塌掩盖tòa in来躲避灾难(参考六:12—17)。因为án-ne,大家lóng安静地等待「第七个印」phah开,án-ne大约等了「半小时」,这表示时间是目nih-á久。换句话讲,上帝ê审判真紧to̍h会来临。这对当时tú-teh受难ê基督徒来讲,是一个真大ê ǹg望。

    第2节,作者讲伊「看见七个天使」,in lóng「khiā tī上帝面前」,而且「接受七支号筒」,chia thang看出chit-ê新异象又koh是另外一个「七」ê开始。Chia ê「七个天使」,tī希腊文ê「七」chìn前,有加上冠词「tous」,表示chit「七个天使」并m̄是一般天使,却是指特定对象,á是被选派出来ê天使,而且有代表性。除了tī chia提起有「七个天使」之外,tī第十五章1节、6到8节、第十六章1节、第廿一章9节等等,lóng有提起chit「七个天使」kah in ê工作。

    第3节,除了七个天使the̍h七支号筒外,chit节讲「另外有一个天使出来,the̍h金香炉,khiā tī祭坛前」。Chit-ê天使并m̄是七个天使中ê一位,却是「另外有一个天使」。Chia ê「金祭坛」是teh指敬拜上帝ê所在。Chia ê「金祭坛」,thang参考耶路撒冷圣殿ê「祭坛」是用金kah铜为材料制成(参考出埃及记廿七:1—8)。

    第4节,hit-ê点to̍h ê香「tùi天使ê手中升到上帝面前」,chit句话真清楚表明天使ê工作之一,就是kā人ê祈祷转达hō͘上帝(参考诗篇一四一:2)。

    第5节,这是另外一幅画,头前讲祈祷thang藉tio̍h天使手中ê金香炉呈献到上帝面前。chit-má则讲天使「Kā香炉装满祭坛顶ê火,hiat去地上去」,然后出现各种hō͘人震撼ê景况,包括「有雷轰、响声、sìh-nà,kah地动」。这是tùi天顶降落来ê,象徵tio̍h上帝对信徒祈祷ê回应。圣经一再用「雷轰、响声、sìh-nà,kah地动」来表示上帝ê显现kah惩罚。因为án-ne,作者用chit种方式teh表示:上帝听信徒祈祷了后一定会回应chiah-ê为tio̍h见证福音而受难者ê祈祷。

    第6节,chit节若续接tī第2节后面,读起来会比较顺。作者tī chia讲chiah-ê天使「the̍h七支号筒准备ài吹号」,这是为tio̍h beh宣布上帝审判ê结果。吹号,表示上帝来临、显现,ài众人lóng注意。

    第7节,tùi chit节开始,一直到第十一章,就是chit七个天使吹出号筒ê声音。chit七个号筒mā分做两组,第一组有四枝号筒,第二组有三枝号筒。这ná亲像tī头前七个印仝款,头前有四个印一组,后面三个印另成一组;前者是对自然界造成严重打击,后者则对人类ê社会生活带来极大痛苦。

    「第一个天使一吹号」,所发出号筒ê声音是出现「冰雹kah火,搀tio̍h血」,这kah出埃及记第九章23到25节记载ê第七个灾难真接近。

    地上「三分之一」ê青草、树木lóng被毁à。原本tī第七章1到3节,是讲有一个捧tio̍h永远活ê上帝ê印之天使,来对khiā tī地ê四极ê四个天使讲,beh挡tiâu地上ê大风来毁灭「地、海、树木」,不beh hō͘会摧毁地上一切万物ê大风来伤害,chit-má soah讲有「三分之一」被毁灭à。Tùi chia mā看tio̍h上帝ê恩典,因为上帝并无全面性ê毁灭。

    第8到9节,这是「第二个天使」吹号筒。Chia无记载是甚么人kā一座tio̍h了火ê山hiat去海中。Chia mā是提起「三分之一」ê海洋变色,包括海水变成血,「海中ê生物死去三分之一」,另外「船只mā损pháiⁿ了三分之一」。Chit种海洋变成血ê景况,真类似出埃及记前ê第一个大灾难(参考出埃及记七:20—21)。而且kah第一枝号筒造成ê结果仝款,前者讲tio̍h大地ê花草树木被烧毁,chia讲tio̍h ê是海洋生态ê剧烈改变。

    第10到11节,这是「第三个天使」吹号筒。Tī第二枝号筒发出声音了后,海洋变了色,chit-má则移转到江河,这kah人ê生存有密切关系,因为江河若变色,人ê性命就有危险。「有一粒大星,像火烧tio̍h ê火把仝款,tùi天顶坠落来」,因为chit-ê缘故,致使河流、水源ê生态lóng改变à。而且有「三分之一ê河流kah一切水源」,lóng因为án-ne变成「苦」ê水一般。这ná亲像出埃及记描述第一个灾难中,尼罗河ê水变色,河水发臭无法度lim(参考出埃及记七:17—19)。M̄-koh tī chia则koh khah严重,因为有「真chē人lim了」chit-ê变苦ê水lóng「死去」。

    第12节,这是「第四个天使」吹起第四枝号筒。日头、月娘、星辰等「lóng被打击」而黯然失色,亮度减少「三分之一」。Chit-ê灾难kah出埃及记描述ê第九个灾oh得有类似ê所在(参考出埃及记十:22—23)。M̄-koh chia所指出ê天色乌暗,受tio̍h影响ê乃是大地,并m̄是天顶。因为欠缺日月星辰ê光照,大地五谷等生长必定受tio̍h严重ê影响,人民ê生活mā连带受tio̍h灾害ê波及。

    第13节,chit节中断了第五个天使续接pûn号筒ê时刻。因为出现「一只tī高空飞翔ê鹰」,它高声呼喊「惨lah」ê声音。Chit只「鹰」ná亲像报幕者teh提醒读者tio̍h注意,下一波ê灾难会koh khah严重。


重新查询 专卷研经 启示录系列
错误回报,请联系comm[@]fhl.net