启示录 19章1节 到 19章10节   背景资料  上一笔  下一笔
第十九章ê 1到10节是继续第十七到十八章,teh歌颂上帝对巴比伦帝国进行严厉审判ê结果。然后tùi第十九章11节开始,直到第廿二章结束,就是属tī启示录最后ê一个段落。Tī chit-ê最后ê段落中,除了继续论到巴比伦灭亡ê情景之外,mā讲tio̍h tī耶稣基督koh再临chìn前,hiah-ê反基督ê气力会koh一pái chhōe机会倒抛,基督徒kah教会会受tio̍h攻击,m̄-koh续落来了后,就thang看tio̍h新天新地ê出现,mā就是新ê耶路撒冷来临。

    Tī chit段经文中,共计出现三组呼teh-hoah歌颂上帝ê声音,第一组tùi第1到4节,呼喊ê声音是来自天顶ê一大阵人;第二组是第5节,声音是tùi宝座发出;第三组是第6到8节,声音mā kah-ná是来自一大阵人,m̄-koh是m̄是kah第1节ê人仝款,并无确定。Chit三组所歌颂ê lóng tùi「哈利路亚」开始,因为án-ne,mā hông称做「哈利路亚颂」。

    Chit段经文是续接前第十八章所描述上帝惩罚巴比伦帝国了后,天顶就跟tòe发出欢喜颂赞ê歌声,表明对上帝惩罚巴比伦帝国ê欢喜。

    第1节,chit节ē-sái讲是teh回应第十八章20节所提起ê「天ah,tio̍h欢喜」。Chia提起有天顶kah-ná有「一大阵人teh呼喊」,chit群人是第七章9节所提起是「经历过大灾难ê」信徒,á是「为耶稣做证来殉道ê人」(参考启示录六:10、十七:6)。M̄-koh mā有可能是teh指「千千万万天使」teh歌颂ê声音(参考启示录五:11)。Á是第4节则提起tī chiah-ê大歌声中,iáu有二十四个长老kah四个活物同声齐teh唱「哈利路亚」。

    「哈利路亚」chit-ê词连续出现四pái(参考1、3、4、6节)。这是犹太人用来歌颂上帝ê siōng普遍ê话语,意思就是「Lín tio̍h o-ló上帝ê名」(参考诗篇一三五:1)。「救恩、荣耀、权能lóng是tùi咱ê上帝来ê」,chit句话thang参考马太福音第六章13节,耶稣基督教导他ê门徒祈祷ê时用ê结尾句话。Mā thang参考启示录第十二章10节,天使用chit种句话teh o-ló上帝ê救恩。

    第2节,大家齐声歌颂上帝是因为他审判hit-ê「大淫妇」,而且上帝ê审判是「真实公义」ê。因为伊除了「败坏世界」之外,伊mā同时杀害「上帝奴仆」(参考启示录十六:5—6、十八:20),对tī án-ne恶质ê罪行,上帝ê审判绝对是严厉ê。

    第3节,这是第二pái用「哈利路亚」来歌颂上帝。

    「火烧ná大城ê烟不断」,表示惩罚极重,受罚ê城非常凄惨,差不多是hō͘焚毁殆尽,表示上帝惩罚罗马帝国mā会是án-ne严厉。

    第4节,这是第三pái用「哈利路亚」歌颂上帝公义ê审判。Chit节mā koh一pái提起「二十四位长老kah四个活物」,这mā是本册最后一pái提起。In ê出现lóng是为tio̍h歌颂o-ló上帝,thang参考第四章到11节、第五章8到14节。

    「阿们」,意思是「心内完全同意」。

    第5节,这是另外一个声音,有mài-koh tī第1节发出ê声者。
    「续落来」一词,表示chit-má发出ê「声音」kah头前ê声音是相关连ê。Chia特别说明声音是tùi「宝座」发出ê,而chit声音ê内容,是teh召唤所有「敬畏」上帝ê人lóng来歌颂「o-ló」上帝。

    第6节,这是第三个声音出现,kah头前两种仝款,lóng是一大阵人ê声音,m̄-koh声源是m̄是仝款并无确定。作者用三种无仝ê内涵来描述chit pái声音ê差别,第一个ná亲像「一大阵人」发出ê声音;第二个声音ná亲像「大瀑布」仝款,chit-má则像「雷轰ê声音」,圣经作者ài用「雷轰」ê声音表示上帝ê拯救力量临到(参考以赛亚书廿九:6,约珥书三:16)。

    「全能ê上帝做王」,意思是teh指上帝掌权,m̄是属tī政治领域,却是性命ê领域,即使是统治者,in ê性命mā tī上帝手中,上帝是in ê王,是in性命ê主宰。

    第7到8节,除了歌颂上帝ê伟大之外,Tī chit两节siōng特别ê是提出「羊羔ê婚期到à」,chit种用婚姻ê关系来描述上帝kah他ê子民之间关系,ná亲像「夫妻」一般有bē-tàng分ê亲密关系(参考以赛亚书五十四:5—8,以西结书十六:8,何西阿书二:16、19—20)。启示录作者约翰tī chia beh表明一个重要信息:上帝绝对bē hō͘他所意爱ê「bó͘」受难而无顾。

    「洁白光亮ê麻纱衫裤」,chit间代表ê意思就是上帝众子民ê「义行」,表示in确实是有遵照上帝ê旨意做tāi-chì,无任何邪念。

    第9节,「你beh写落来」,这是天使hō͘作者约翰ê命令,ài伊写落来所看tio̍h ê chiah-ê异象。Á tī chit记录中特别强调ē-tàng受tio̍h邀请参加羊羔婚宴ê是「有福」ê人。因为he是上帝国度ê喜宴,上帝就是婚宴ê主人。先知以赛亚讲上帝ê喜宴非常「真贵」(参考以赛亚书廿五:6)。

    第10节,chit节讲beh敬拜ê对象,m̄是天使,因为天使mā是人,只因为忠于上帝了后,hō͘ 上帝拣选出来传达上帝信息ê「奴仆」。天使m̄是神,m̄是万物kah性命ê创造者,mā是上帝「奴仆」。

    启示录作者一直努力teh传达一个信息:旧约先知所预言ê事,lóng tio̍h tī耶稣基督ê身上彰显出来。耶稣基督就是旧约众先知所预言拯救之爱ê总结。

重新查询 专卷研经 启示录系列
错误回报,请联系comm[@]fhl.net