启示录 16章1节 到 16章21节   背景资料  上一笔  下一笔
Chit章描述七个天使带「最后ê七种灾难」,上帝用chit种方式ài beh进行最后ê审判。chit七个灾难kah出埃及ê灾难mā有类似ê所在,显示启示录chit本作品ê特色,m̄-nā数字上一再重述使用,而且以数字「七」siōng常见。另外一方面,mā有灾难内容ê重复运用,chit种灾难则以出埃及前,发生tī埃及遍地ê大灾难做基础。M̄-koh tī chit组ê七个灾难中,以第四个灾难siōng特殊,mā是头前灾难所无出现过ê。

    第1节,chit节提起有「大声音向七个天使」发出命令,chit-ê大声音是tùi「圣殿」发出来ê。如果圣殿代表上帝ê居所,则chit声音就是tùi上帝来,他ài beh进行审判kah忿怒而发出声音。

    「碗」,是一种浅浅ê碗,而且tī chit「七碗」ê头前有加上定冠词,表示chiah-ê碗lóng是为某一kóa对象特别订制ê。Chia强调碗中所盛ê,乃是「上帝ê忿怒」。

    第2节,这是「第一个天使」所the̍h ê碗,chit-ê碗「倒tī土脚」,而所带来ê刑罚是hō͘ hiah-ê身上有兽ê印记ê人身上lóng长满「既臭而且毒ê疮」,这mā是hō͘人ê性命受tio̍h严重折磨ê一种方式(参考约伯记二:7)。

    Tī出埃及chìn前ê第六个灾难中,就是「疮灾」(参考出埃及记九:8—12)。申命记记载摩西警告以色列人,若是无遵守上帝ê诫命而过「淫乱」ê生活,会因为án-ne带来上帝ê忿怒而遇tio̍h chit种严厉ê毒疮之灾(参考申命记廿八:35)。

    第3节,这是「第二个天使」the̍h第二个碗,伊kā碗里所盛上帝ê忿怒倾倒tī「海上」,结果「海水」lóng变成「死人ê血」,hō͘海中所有ê「生物全lóng死去」。Chit种灾难tī出埃及ê灾难中mā发生(参考出埃及记七:17—21)。Á tī第一回ê连续七个天使the̍h七支号筒中ê第二个天使,其所造成ê灾难mā是án-ne,hō͘海水变成血,海中生物全lóng死亡(参考启示录八:7)。海是以色列文化中用来表示邪恶ê khiā起ê所在。如果海水lóng变成血,mā表明chiah-ê邪恶者lóng会遇tio̍h死亡ê结果,其所以赖以维生ê环境变迁,无koh适合in khiā起。

    第4节,「倒tī河流kah水源里」,chit种灾难ê方式mā是ná亲像海水变成血仝款,tī chia是hō͘所有河流kah水源变成血,án-ne,kā会hō͘人ê生存tú-tio̍h严重ê威胁。

    第5节,「管理水ê天使」,chiah-ê天使只是负责「管理」,并无发出命令,天使是beh听从上帝发出ê命令做tāi-chì。上帝创造人ê时,mā是赋予人有「管理」ê责任(参考创世记一:28)。

    上帝是「到圣者」,chit句话讲出当时罗马帝国皇帝自认是「神圣」者,m̄-koh启示录作者就是beh hō͘读者知影,只有创造宇宙万物ê上帝,chiah是惟一永生ê主宰(参考出埃及记三:14,以赛亚书四十一:4、四十三:10,启示录一:4、8、四:8),只有他chiah是「神圣」ê。M̄-nā án-ne,chit位创造万物ê上帝mā是「公义ê审判者」,因为án-ne,他一定会替受tio̍h冤屈者伸冤。

    第6节,chia所提起ê「先知」并m̄是指旧约ê先知,却是指tī早期教会中hiah-ê传达上帝信息ê福音工作者(参考使徒行传十一:27、十三:1、廿一:10,哥林多前书十二:28,使徒行传四:11)。

    「上帝子民」,thang参考启示录第六章9节。

    第7节,上帝ê审判是公义ê,chit点mā是kui本圣经ê信息之一。上帝ê公义包括他ê慈爱(怜悯),怜悯慈爱ê上帝,绝对bē hō͘无罪ê人受tio̍h冤屈(参考创世记十八:25)。

    第8节,描述第四个天使。Chit节kah第七章16节相对。启示录ê作者认为归属tī上帝ê子民,in并无会hō͘日头á是任何炎热ê光线所烫伤。会hō͘日头烫伤ê人,就是hiah-ê迫害上帝子民ê人tī土脚掌权ê人。

    第9节,thang参考第21节。人心堕落甚至tú-tio̍h严重ê灾难「犹原不悔改」,ná亲像埃及王仝款,即使受tio̍h hiah-nih-chē ê灾难,mā是想出所有ê办法beh对抗性命ê主宰上帝,chit点chiah是上帝siōng痛心ê事。

    第10到11节,这是第五个天使施行ê大灾难,对象是坐tī「王座」上ê兽,这表示ná专门teh迫害基督徒ê统治者,其实,就是teh指tio̍h罗马帝国皇帝讲ê。当chit-ê忿怒ê碗倾倒落去ê时,发生严重ê变化,一是「乌暗罩tiâu了兽ê国度」,kah以色列人tī出埃及chìn前所经历到ê乌暗仝款,灾难ê情景是埃及人khiā起ê所在chiah有乌暗,而以色列人ê地区lóng大放光明,两个呈现出明显ê对照(参考出埃及记十:21—23)。Chia讲只有「兽ê国度」chiah会被乌暗所罩tiâu,并且hiah-ê人会痛苦到咬舌,chit-ê情景就比埃及所tú-tio̍h ê乌暗iáu koh khah严重à。二是in犹原被毒「疮」缠身,若koh加上乌暗ê痛苦而咬舌,án-ne就是雪上加霜ê痛苦。M̄-koh chit种加重痛苦ê经历,并无hō͘ chiah-ê有权势ê统治者知影谦卑、认罪、悔改,反tńg是变本加厉,拒绝上帝ê恩典。

    第12节,这是第六个天使。伊kā上帝ê忿怒倾倒tī「幼发拉底大河上」,造成河水干涸,并且出现thang通过chit-ê河ê道路。这有kah顶面仝款帝带领以色列人民过行过干涸ê红海(参考出埃及记十四:21)、约旦河(参考约书亚记三:17)仝款。先知以赛亚讲上帝会吹干埃及ê海,并且kā幼发拉底河用烧热风吹干,好带领以色列人tùi受掠之地tńg来故乡(参考以赛亚书十一:15)。

    第13到16节,chit段thang讲是第六个天使kah第七个天使之间ê插入段落,ē-sái讲是另外一个异象。Ná亲像头前两组异象中所提供ê,tī第六kah第七之间koh有新ê异象出现仝款。Thang参考第七章、第十章1节到第十一章14节。

    第13节,tùi「戾龙ê口、兽ê口,kah假先知ê口出来」ê邪灵,tī chia用「水鸡」来表示。作者用水鸡teh代表lah-sap、吹嘘ê意思,teh代表邪恶者ê面目。Tī出埃及灾难中ê第二个就是水鸡之灾(参考出埃及记八:5—7)。作者指出三个邪灵分别出tī「戾龙ê口、兽ê口,kah假先知ê口」出来。

    「假先知」,指ê是专门teh讲白贼言ê人(参考耶利米书十四:14—15),in以欺骗博取人ê信任,喜爱讲谄媚ê话(参考列王记上廿二:6)。

    第14节,chit节提起「邪恶ê灵」ê特徵,就是「会行奇迹」,这是in欺骗人去跟tòe ê pián仙á。

    「伟大ê日子」,这是teh指末日来临,mā是上帝审判ê时刻,m̄-koh同时mā是teh指上帝拯救ê来临(参考玛拉基书四:5—6)。

    第15节,chit节thang参考马太福音第廿四章42到44节、路加福音第十二章35到40节、帖撒罗尼迦前书第五章2节。

    「jōa-ni̍h-á有福」,这是启示录中记载七pái「有福」中ê一个,另外六个记载tī第一章3节、第十四章13节、第十九章9节、第二十章6节、第廿二章7节、14节等等。

    第16节,作者讲beh kah上帝对抗ê所在是tī「哈米吉多顿」。有bē少学者认为这是teh指一个名叫「米吉多」(Megiddo)ê山,m̄-koh却无真正chhōe-tio̍h chit座山。真可能是作者为tio̍h m̄ hō͘统治者发见伊所讲ê意思,故意kā古代军事必争之地,用含糊ê方式来表达,为tio̍h是beh说明上帝绝对bē放过chiah-ê迫害他子民ê统治者,beh hō͘ chit-ê审判ê日子成做一场类似重大而且残酷ê战争hit种,kā所有ê背叛者全部lóng带来惩处。

    第17节,「成了」,chit句话出现tī耶稣基督被钉死十字架chìn前(参考约翰福音十九:30),表示伊完成了上帝ê使命。Tī chia作者约翰是kā它用来表示迫害上帝子民ê残暴统治者沦亡了(参考启示录十四:8),kah耶稣完成上帝使命完全无仝(参考启示录廿一:6)。M̄-koh lóng是teh表示结束ê意思。

    第18节,有大ê响声出现,chiah-ê lóng是启示录作者引用来形容上帝出现ê方式之一(参考诗篇十八:6—15、五十:3—6)。Chit节「地动」用两pái,表示「地动」乃是上帝表达忿怒ê主要方式之一(参考以赛亚书廿九:6,耶利米书十:10、五十:46,以西结书三十八:19—20)。

    第19到20节,地动造成ê灾难非常大。巴比伦「裂为三段」,这表示是彻底ê倒塌,无法度koh再恢复á是khiā起来,mā代表完全毁灭ê意思。Tī chia表面上讲是巴比伦,其实beh讲ê是罗马帝国。

    第21节,「大冰雹」phah到人ê身上。这是上帝用来惩罚背叛者ê工具之一(参考以西结书三十八:22)。Chit种冰雹ê灾难mā是出埃及前ê十大灾难之一(参考出埃及记九:22—25)。上帝mā用冰雹来打击kah以色列人对敌ê亚摩利人,hō͘ in死亡惨重(参考约书亚记十:11)。Chia讲tùi天顶降落ê冰雹重达四十公斤,表示被chit-ê冰雹phah到身上ê人,绝对无生存ê可能。因为「四十」mā代表是极限ê意思。

重新查询 专卷研经 启示录系列
错误回报,请联系comm[@]fhl.net