启示录 13章1节 到 13章18节   背景资料  上一笔  下一笔
第十三kah十四chit两章,作者就用「怪兽」连续出现ê方式,来描述chiah-ê邪恶势力怎样chhōe机会beh攻击忠实tī上帝ê子民。Chit两章mā是继续第十二章17节所讲ê,戾龙会继续不断来攻击。因为án-ne,chit两章ê「怪兽」就是头前所讲ê「戾龙」。

    启示录作者ê时代,面临罗马皇帝多米田残酷迫害基督徒ê环境下,是用chit种方式描述罗马皇帝ná亲像「怪兽」一般teh威胁并管辖in,一个接一个出现,带hō͘基督徒惊惶kah不安。甚至会hō͘基督徒感觉上帝kah-ná已经bē记得他ê子民ê苦难,á是邪恶ê势力已经掌权了ê款。Mā因为chit-ê缘故,作者一再提醒并鼓舞当时ê基督徒,一定会有「耐心kah信心」(参考启示录十三:10),因为上帝审判ê日子teh beh来临。

    第1节,「我看见一只兽tùi海里起来」,chia并无说明这是甚么兽。M̄-koh tùi chit只兽拥有「十个角kah七个头」,kah第十二章3节出现ê hit只戾龙仝款,mā是有「七个头kah十只角」。无仝ê所在是chit只怪兽tī「每一个角上lóng戴tio̍h王冠」,而戾龙则每一个头壳顶lóng戴tio̍h王冠。其实「头」kah「角」lóng仝款ê意思,teh代表领导、统治者,有权力ê人。

    Chia特别强调「每一个头壳顶写tio̍h侮辱上帝ê名号」,意思是chit七个头ê顶面lóng有一个名号是自称做某某神,表示in lóng kah上帝仝款伟大,chit种态度就是teh亵渎上帝,m̄ kā上帝khǹg tī眼中。如果「七个头」teh表示罗马皇帝,án-ne,tī启示录作者ê时代,tú好历经了奥古斯都皇帝了后ê七位罗马皇帝:包括有(1)提庇留(Tiberius,14~37 AD)、(2)加里古拉(Caligula,37~41 AD)、(3)格老丢(Claudius,41~54 AD)、(4)尼禄(Nero,54~68 AD)、(5)威斯巴先(Vespasian,68~79 AD)、(6)提多(Titus,79~81 AD)、(7)多米田(Domitian,81~96 AD)。

    第2节,作者描述chit只tùi海里起来ê怪兽身上,有豹、熊、狮等凶猛野兽ê特徵。作者用chit种方式teh表达这是只非常奇怪、无人性而且凶猛ê野兽。因为chit只像戾龙ê怪兽,连婴á、孩童lóng会生吞落去(参考十二:4)。

    第3到4节,chit节真清楚讲出chit只怪兽「kah-ná受过致命重伤」,因它bat tùi天顶被击败摔到地起来。M̄-koh它却有复原ê能力,而且复原ê非常好。为甚么会án-ne?作者并无解释。Chit两节teh隐喻:真chē人欢喜跟tòe残暴者行。Á是讲:一个统治者非常残暴,却iáu是会得tio̍h真chē人跟tòe,甚至kā它当做是「拯救者」、「神明」一般ê看待。Chiah-ê有权势者tī siōng颠峰ê时,其跟随者lóng是会发生歌颂ê声音,认为天下脚无人ē-tàng kah之相媲美。M̄-koh圣经作者则一再提醒,无论是在世间á是宇宙之间,lóng chhōe bē-tio̍h thang kah上帝相比ê对象(参考出埃及记十五:11,诗篇三十五:10、一一三:5)。

    第5到7节,chit段经文描述chit只怪兽ê特徵,它有「一张夸大亵渎ê嘴巴」,表示它看bē起上帝,一「开嘴污辱上帝ê名」,mā污辱上帝ê「居所」。所谓「居所」,thang理解是teh指上帝子民(基督徒)聚会ê所在,mā就是「教会」。甚至连「所有tòa tī天顶ê」mā lóng被亵渎,这表示怪兽ê行踏已经是到à无法无天ê状态。Chia「tòa tī天顶ê」,是teh指围tī宝座边ê天顶使者。这真清楚表示凡是上帝ê选民lóng tī chit只怪兽「攻击」ê范围之内,无一个特例thang佳哉免得被波及。

    「四十二个月」,mā就是三年半ê时间,表示chit只兽chhun落来ê时间无chē了(参考启示录十二:12)。

    第8节,会kā chit只怪兽当做是神明敬奉ê,就是hiah-ê名已经无tī「性命册」上ê人民,chiah-ê人乃是弃sak上帝、弃sak上帝ê人。圣经ê作者强调只有tī性命册上有名ê人,chiah ē-tàng进入上帝ê荣耀内底(参考腓立比书四:3—4,启示录二十:15、廿一:26—27)。

「羊羔」,thang参考第十二章11节。这是teh指拯救ê记号。

    第9节,「有耳áê,lóng tio̍h听!」表示人应该tio̍h注意听天顶ê信息,并m̄是来自地上统治者ê命令。

    第10节,chit节ê前半句,启示录作者引用了耶利米书第十五章2节,下半句则引用马太福音第廿六章52节耶稣所讲ê话。前半句主要teh说明:tī chit迫害中间,mā ē-tàng看出上帝ê旨意,因为án-ne,m̄免惊惶kah逃避,tio̍h勇敢地接受,心甘情愿地为信仰承受无法度避免ê迫害。后半句则是teh指出chiah-ê迫害人ê,结局会受tio̍h仝款ê对待(报应)。

    「上帝ê子民lóng需要有耐心kah信心」,chit句是引用马太福音第十章22节,耶稣基督讲为tio̍h伊而坚持到底者,必定会得tio̍h拯救。

    第11节,chit节讲另外一只tùi地里出来ê兽有「两个角」,而且「像羊ê角」,意思是看起来真亲像羊羔(参考十二:11),其实是一只koh khah恐怖ê怪兽。因为它会伪装来迷惑信徒。Chit种情形tī每一个动荡ê时代lóng会发生。

    第12节,chit只tùi地起来ê怪兽,「采行头一只兽ê一切大权」,意思是chit只兽是teh执行前一只兽所订ê一切迫害计画,就是前只tùi海里起来ê怪兽ê帮凶。Chit只兽做siōng恶质ê事,就是「强迫大地kah所有tòatī土脚ê」,lóng tio̍h「去拜」ná头一只兽。其实,无论是地里á是海里出来ê chit种怪兽,lóng是「像戾龙」仝款。

    第13到14节,chit两节lóng说明chit只怪兽大有能力,会「行大奇迹」,chit款tāi-chì siōng容易迷惑人心。它既有能力「hō͘火tùi天降tī土脚」,「迷惑了所有tòatī土脚ê人」,因它有chit种能力,因为án-ne koh khah容易迷惑当时ê人,认为它就是神,iáu吩咐「世间ê人」为chit-ê怪兽造「一座像」,供世人崇拜。

    第15节,chit-ê第二只兽看起来就kah-ná拥有ná亲像上帝ê能力仝款,「thang kā活气pûn入去hit头一只兽ê像里去」(参考创世记二:7),而且「杀害所有不拜兽像ê人」,这表示tī一片迫害ê环境中,iáu是有人坚持对上帝ê忠实,除了上帝以外,绝对m̄承认有其他ê上帝。

    Tùi chia看tio̍h chit-ê第二只怪兽显现神迹,是为tio̍h beh人民去拜ná第一只怪兽。结果两只怪兽互相连结做伙,力量koh khah大,迫害人民ê压力mā增强。

    第16节,chit-má chit只怪兽则命令所有ê人,无论是自由á是奴隶ê,lóng tio̍h做记号,表示所有ê人lóng一定tio̍h服从它。Chit种记号有ê tī「正手」,有ê tī「额头」。「正手」,表示「权柄」ê意思。一个人tī「正手」被印上记号,表示伊ê权柄已经无koh属tī伊家己,却是属tī记号上ê主人。「额头」ê记号,这是古代奴隶通常hông印记ê所在,清楚而且容易辨识。

    第17节,「无chit-ê印记,就无法度做买卖」,chit句话已经真清楚统治者用chit种方式,逼其统治下ê人民一定tio̍h顺从。这会hō͘基督徒感受tio̍h生存ê危机,因为无经济活动kah商场买卖,就无生活ê机会。若是迫害到chit种情况,想beh无受侮辱,恐惊就无有jōa-chē生存空间à。 
   
    第18节,「chia需要有智慧」,圣经谈「智慧」,意思是teh指认bat上帝ê意思。因为án-ne,认bat上帝ê人,就会明白甚么人是虚假ê神。Chit只怪兽ê代号,就是一个数字,而此数字就是「六百六十六」。有真chē圣经学者解释chit-ê数字tú好就是尼禄皇帝名ê代号。因为古代ê人会用拼音字母当做数字来表示,亲像「A」teh代表「1」chit-ê数字。M̄-koh mā有学者认为「六六六」有另外一个意思,是teh指「七」ê一个缺角,表示无完整。它象徵tio̍h即使有án-ne大有能力ê统治者,mā不过是一般人而已,并m̄是创造万物ê上帝。M̄-koh「六六六」chit-ê数字真确ê意义是甚么?实在真oh明白。

重新查询 专卷研经 启示录系列
错误回报,请联系comm[@]fhl.net