这mā是一篇歌颂上帝就是以色列民族ê君王ê诗篇。Tùi第九十五篇到九十九篇ê中间，以chit篇siōng-kài特别，因为chit篇诗歌是偏重tī以色列民族kah上帝之间ê关系。Ná亲像头前真chē诗篇所强调ê，chit位万国之王ê上帝，是一个公义ê君王，他一定会主持公道。

Tī第3节、第5节、第9节等等，lóng有一句「伊神圣庄严」，这清楚kā咱讲chit首诗是用颂赞上帝做主题写ê。Chit首诗ê特色是tī：上帝ê神圣庄严，tùi他ê统治方式表明出来，亲像tī第2节，提起上帝ê统治威力超越万国。

第1到3节，「ki-lō͘-pek」，这是teh指上帝ê天使。Tī上帝ê约柜，有雕刻ki-lō͘-pek tī盖kòa顶面，表示上帝kah以色列人民之间有上帝ê天使ki-lō͘-pek看守tio̍h约。以西结书讲in固守tio̍h上帝宝座（参考以西结书十一：22），in听从上帝ê命令做tāi-chì。Chit首诗篇开始，就讲上帝做王掌权，大地就会震动，只要是上帝做王，万国万民lóng会来归顺，而且会同出颂赞歌声传扬他ê圣名。

第4到5节，chit两节讲出上帝ê特性，就是喜爱公义、好怜悯（参考弥迦书六：8）。Chia用「喜爱公正」、「建立公平」、「伸张公义」、「支持公道」等词来形容chit位ná亲像君王ê上帝。

第6到9节，chit段短短诗歌，用摩西、亚伦，kah撒母耳来说明tùi出埃及进入旷野，一直到进入迦南地了后ê历史，说明上帝会垂听in ê祈祷。虽然tī in行过ê路上，是一再犯罪hō͘上帝忿怒、艰苦心，甚至用严厉ê方式惩罚以色列人民，m̄-koh chiah-ê惩罚lóng表达上帝是一个赦免ê上帝。若m̄是上帝有怜悯ê疼，以色列人民早就被敌人hō͘消灭。因为án-ne，诗人用chit种诗歌teh带领以色列人民歌颂上帝。