诗篇第九十六到九十九篇，以及第四十七篇kah第九十三篇等，lóng是用来歌颂上帝，认为上帝就是以色列民族ê君王，以及过新年ê时歌颂ê诗歌。Chit首诗歌mā thang tùi历代志上第十六章23到33节看tio̍h chit首诗ê内容，mā常常hông看做是tùi巴比伦奴隶之地释放tńg来后所写ê，因为tī以赛亚书第四十到六十六章中，thang看tio̍h真chē类似chit首诗歌内容ê资料。因为án-ne，解释chit首诗歌mā常常hông看做是一个全新ê世代ê来临，因为上帝带领以色列人民脱离外族ê统治，thang回乡重建耶路撒冷城、圣殿，kah故乡。以感恩kah欢欣ê心境o-ló上帝ê恩典，并坚信上帝就是in ê君王，会带领in，并以公义kah信实统治in。

第1到6节，ná亲像第九十五篇仝款，族群á是部落ê长老、领袖出来，高声呼喊所有ê人lóng tio̍h出来歌颂上帝，而且是beh「ta̍k工」lóng来传扬上帝拯救ê「佳音」。

第3节提起上帝ê「荣耀」、「伟大ê作为」等词，lóng是teh表示上帝ê拯救ê意思。Á第4节ê「上主到大」，意思是teh指至koân、神圣ê意思。

第5节ê「列国ê神lóng不过是偶像」，表示虚无，m̄是真实ê，因为án-ne，根本就m̄是神（参考九十七：7）。Tī以赛亚书第四十章18到26节、第四十一章23到24节、第四十四章6到8节、第四十六章5到8节等等经文，先知以赛亚lóng有清楚提起虚假ê偶像神明之特色，chiah-ê偶像神明m̄-nā无法度知影teh beh发生ê事，家己连动mā bē，iáu需要别人来帮助，chit种神明koh怎样ē-tàng拯救别人？无可能ê事！真正神，就是亲像chit位诗人所讲ê，是「创造诸天」ê神，chiah是真正神。

第6节ê「大能」是teh指上帝拯救ê气力，而「华美」则是teh指上帝居所圣殿之美，是无tè比。

第7到9节，诗人tī第7节chia讲「地上万民lóng tio̍h颂赞上主；tio̍h o-ló他ê荣耀kah大能」，然后tī第8节b句随时提起「tio̍h带供物，进入他ê殿宇」。如果「殿宇」指ê是耶路撒冷圣殿，就有真特别ê意思。因为耶路撒冷圣殿献祭ê祭坛所在，m̄是外邦人thang进入ê，只有犹太人chiah ē-tàng进入祭坛边。因为án-ne，当诗人án-ne描述ê时chūn，真清楚teh说明一个心中ê期待：有án-ne ê一工，全世界所有ê人民lóng kā以耶和华上帝为主，lóng kā以耶路撒冷圣殿做中心敬拜上帝，而chit点是久长以来先知文献中一再提出ê ǹg望。

第9节ê「坦覆 (thán-phak）敬拜」，表示用穿插圣洁ê衣饰来敬拜上帝，表示一种对上帝极高ê尊崇ê意思，ná亲像参加婚宴ê欢喜一般。

第10到13节，chit段诗歌表明上帝chiah是真正审判者kah统治者。Tī他ê治理之下，「公义」是治理ê基础，信实是他治理之下ê记号，因为án-ne，所有一切受造物，lóng teh beh tī chit两个基本法则之下，显现性命ê活力。