诗篇 87章1节 到 87章7节   背景资料  上一笔  下一笔
Chit首诗篇mā是被称做「锡安ê歌」,kah第四十六篇、第四十八篇、第七十六篇、第八十四篇kah第一二二篇等,lóng是属tī「锡安ê诗歌」。

Chit首诗歌非常特别,tī第4节讲耶路撒冷会成做所有ê人ê中心城市,无koh有任何国籍、族群ê分别,大家lóng是属tī上帝ê子民。Á chiah-ê人iáu包括tī历史上kah以色列人民有极大冲突ê族群在内,mā lóng会是上帝圣城耶路撒冷ê「公民」。

第1到3节,chia kā耶路撒冷看做是上帝siōng爱ê城,因为tī chia有上帝ê圣殿,而且圣殿之内有约柜。上帝透过约柜显现,并且向以色列人民讲话。

第4到6节,chia提起巴比伦、非利士、泰尔,kah古实等国家,in lóng bat kah以色列人民对立,甚至统治过以色列人民。M̄-koh taⁿ lóng会臣服tī上帝ê治理之下,lóng tio̍h到耶路撒冷来敬拜上帝,成做上帝ê子民,kah以色列人民仝款,lóng是上帝手中名册上有名ê子民。

第7节,koh一pái肯定耶路撒冷是性命ê中心,是hiah-ê人领受上帝赐福ê来源。

Chit种诗歌有一种异象:希望有án-ne ê一工,以色列会成做世界ê中心,所有万民lóng kā聚集tī耶路撒冷――上帝ê圣城,向上帝敬拜。Chit种看法真接近先知以赛亚ê思想(参考以赛亚书二:2―3)先知弥迦ê预言中mā讲出仝款ê话(参考弥迦书四:1—2)。

重新查询 专卷研经 诗篇系列
错误回报,请联系comm[@]fhl.net