Chit篇诗篇kah诗篇第四十篇13到17节仝款。有趣味ê是，诗篇第四十篇是编辑tī诗篇第一集ê最后，而这第七十篇mā是编辑tī第二集ê最后，而且最后lóng是用仝款ê诗句做结尾。唯一无仝ê是：Chit篇所用ê上帝ê名是「以罗伊」，tī第四十篇是用「耶和华」。

这mā是属tī哀歌ê诗篇，mā是哀歌诗篇中siōng短ê一篇。

第1节下半句ê「上主ah，求你快来帮助我」，kah第5节最后一句完全仝款。头尾lóng teh祈求上帝帮助，tú好说明chit首诗篇ê诗人，是因tú-tio̍h性命ê困境而写ê诗歌。

第2到3节，thang清楚看出诗人向上帝祈求帮助，是因为有人「beh杀害」伊，tī伊tú-tio̍h困难ê时，m̄-nā无人伸手帮助伊，iáu用幸灾乐祸ê态度嘲（sau）笑伊，hō͘伊感觉非常ê难堪。Á这两项lóng是上帝所无欢喜ê态度。

第4到5节kah诗篇第四十篇13到17节仝款。