诗篇 66章1节 到 66章20节   背景资料  上一笔  下一笔
这mā是一首o-ló ê诗歌。真明显ê chit首诗是分做两个部分,一是tùi第1到12节,作者lóng用复数ê「咱」,第13到20节诗人lóng是用单数ê 「我」。因为án-ne,有kóa诗篇ê学者认为这是两首诗篇合并成做一首诗歌。

第1到4节,诗人一开始就呼吁「万民tio̍h欢呼颂赞上帝」,表示这是全国人民吟唱ê诗歌。Tùi第3节thang看出诗人呼吁大家来颂赞上帝,是因为看见上帝行奇妙神迹,hō͘敌人来投降。这表示只要上帝一出手,就算siōng强猛ê埃及军队mā只有ē-tàng葬身红海,而亚述西拿基立皇帝率领二十gōa万ê军队tī主前701年围耶路撒冷城,mā tī一夕之间死亡chē kah十八万五千人,最后就是落荒而逃。类似chit种例真chē,只要想tio̍h chiah-ê,就真自然tek会唱出歌颂ê诗歌。

第5到7节,chit段诗歌提出出埃及过红海ê历史背景。诗人呼吁大家来看上帝「tī人间ê奇妙作为」,只要小khóa详细想一下,就ē-tàng明白这是teh指人无论怎样想lóng想bē到ê事,亲像鸟怎样会飞?蛇ná会无脚,却ē-tàng tī沙土上快速移动?海水怎样会家己摇动,掀起高浪?chia讲上帝「Kā海变成陆地,hō͘咱ê祖先步行过去」,这真清楚是teh指上帝带领以色列人民行过红海,然后koh行过约旦河。

第7节是为第5到6节作简单ê结语,讲上帝ê目睭鉴察世间万国。Chit-ê意思真清楚,上帝并m̄是不管世间ê事,他创造ê宇宙kah人间世界,他一定会管理,hō͘伊bē脱序,án-ne世人kah世间万物ê性命chiah ē-tàng继续保存落去。

第8到12节,这是一个新段落。第8节kah第1节仝款,呼吁大家来歌颂上帝。虽然在世间ê性命旅程中会tú-tio̍h真chē考验、重担、仇敌ê攻击等,m̄-koh chiah-ê lóng是一种磨炼,上帝lóng是保守看顾。

第13到20节,tùi chit段诗歌开始,所用ê动词lóng是单数,表示chit段诗歌是属tī个人teh o-ló歌颂上帝ê诗歌。Tī chit段诗歌中,诗人真清楚表示上帝已经有回应伊所下ê愿,因为án-ne,诗人一定会还愿,表示对上帝ê感谢。Án-ne,向上帝祈祷chiah会蒙上帝垂听。

重新查询 专卷研经 诗篇系列
错误回报,请联系comm[@]fhl.net