这是一首感恩ê诗歌。真亲像tī Tòa棚节ê时用来感谢上帝ê诗歌。Mā有诗篇ê学者认为是tī久长干旱了后，因为天降落甘霖滋润了大地，致使农作物ē-tàng重新掖种，而且有丰富ê收成，因为án-ne，诗人á是村落ê长老带领村民歌颂上帝。所以，这mā是一首团体ê o-ló诗歌。

第1到4节，「锡安」，这是teh指耶路撒冷，mā teh表示上帝所在ê所在。Beh去向上帝iáu「所下ê愿」。原因是向上帝祈求，已经蒙上帝回应。

诗人认为siōng重要ê一件事，就是罪蒙上帝赦免。性命中无甚么事比hō͘ 上帝赦免koh-khah重要ê。

早期社会有一个观念：上天若无落雨，就是因为人犯罪惹起上帝ê受气。Ná亲像先知以利亚时代，上帝因为亚哈王kah以色列人民悖逆严重，用干旱来惩罚北国以色列，有长到三年时间都无落雨。

诗人认为上帝拣选ê子民，一定会遵行上帝ê旨意，而遵行上帝ê旨意，就ná tòa做伙tī上帝ê殿宇中，永远享受着有上帝同在ê喜乐。

第5到8节，chit段诗歌讲出上帝有奇妙ê作为。Chit种奇妙ê作为，就是用他ê气力，hō͘群山安定bē摇动，而且hō͘「海洋ê怒号，水涌ê呼啸」lóng ē-tàng tī他手中被控制。

圣经作者一再表示：宇宙万物lóng是上帝创造ê，因为án-ne，上帝会控制kui个宇宙万物，hō͘伊运行tī一定ê秩序之下。上帝mā会对海洋下命令，hō͘伊分开成道路，mā会移动群山。
所谓「tùi日出到日落」，意思是只要有看见阳光ê人，lóng tio̍h因为上帝奇妙ê作为而发出欢呼ê声音。

第9到13节，chit段诗歌真明显kah Tòa棚节ê庆祝有关。Tòa棚节mā hông称做「收藏节」，就是kā收成ê农作物收藏起来好准备过冬。

诗人一开始就提起「降霖雨」，这是非常chán ê甘露、雨水ê意思，án-ne，大地就ē-tàng有收成，而且是丰收，因为土地有甘霖滋润，就会肥，无需要人工施肥，只需要上帝ê甘霖就够用。Án-ne，「大地不断生产五谷」养饲所有ê人类kah动物。

雨水，m̄-nā是人类需要，所有ê生物，无论是空中ê飞鸟，地上ê行兽、昆虫等，lóng需要雨水chiah ē-tàng生存。Á雨水，是tùi上帝来赏赐，m̄是人ê气力ē-tàng得tio̍h。Mā因为雨水滋润大地，大地发出茂盛ê草，hō͘牛、羊tùi án-ne ē-tàng繁延遍满大地，mā hō͘五谷满仓，永远bē有iau饿ê威胁，bē有干渴ê痛苦。