诗篇 41章1节 到 41章13节   背景资料  上一笔  下一笔
Chit首诗mā是诗篇所有150篇中第一段落ê最后一篇(第一篇到四十一篇)。诗篇第一篇讲tio̍h听从上帝旨意ê人「有福」,chit首诗mā是tùi「有福」讲起。诗人所谓「有福」,是因为得tio̍h上帝ê眷顾。性命有上帝眷顾ê人,即使是tī患难中,mā会得tio̍h兴旺ê气力。

Chit首诗歌就ná亲像《现代中文译本》tī起头标题所写ê,是「一个病人ê祈祷」,诗人teh祈求上帝医ê诗歌。M̄-koh chit种病并m̄是身躯上ê,却是心灵上ê,á是心内ê。是诗人被知己朋友出卖ê时所写ê诗歌,而chit种痛苦大大超过肉体上ê病痛。

有kóa诗篇学者认为chit首诗篇是大卫所写ê,原因是伊ê kiáⁿ押沙龙叛变窜位,而伊siōng好ê幕僚亚希多弗竟然走去当押沙龙ê参谋(参考撒母耳记下十六:15、23),koh khah hō͘大卫无法度容忍ê,就是押沙龙为tio̍h beh表示伊窜位成功,iáu tī王宫ê平顶上公然kah大卫ê疼妃做爱(参考撒母耳记下十六:22),chit款tāi-chì无论发生tī任何人身上,lóng会感觉痛心疾首。

第1到3节,chia一开始就讲tio̍h「关心穷苦人ê人」就是有福气ê人。Chit种人就是tī回应上帝拣选ê疼。因为án-ne,上帝mā会关心chit种人。

Koh讲,chia所讲ê「穷苦」,m̄是只有指金钱、财物上ê,iáu包括人ê软弱、无助、孤独、困境等。诗人讲会关心chit种人ê人,一定会得tio̍h上帝ê帮助作为回报。

第4节,诗人向上帝表示伊「得罪」上帝,这hō͘人真紧to̍h想起大卫王tī犯奸淫罪了后,tī诗歌中mā是án-ne表达(参考五十一:3—4)。Chia ê「得罪」ê意思,是表示故意用恶质ê计谋陷害别人ê性命。

第5到6节,诗人tī chit两节诗歌中提起仇敌恶质ê行踏,m̄-nā讲毁谤伊ê话,而且一再ê诅咒伊死去。

第7到8节,chit两节继续说明仇敌怎样对诗人设计陷害,就是故意用siōng恶质ê手段讲kóa毁谤ê话,只为beh hō͘诗人因为án-ne忿恨来死。

第9节,chit节是诗人向上帝表明身心痛苦ê原因,就是连家己siōng知己ê朋友mā出卖伊。这若是大卫所写ê诗歌,án-ne就是伊siōng好ê幕僚亚希多弗出卖伊,而家己ê大kiáⁿ背叛伊。Tī新约福音书siōng出名ê例,就是犹大出出卖耶稣。

第10节,chit节真需要注意,因为诗人祈求上帝hō͘伊康复,thang hō͘伊向仇敌报复。其实,诗人ê意思是请求上帝医伊,hō͘伊thang tùi chit种被敌人陷害ê困境中行出来。只要伊ē-tàng行出chit种性命困境ê阴霾,就等于是teh报复敌人ê陷害仝款。却m̄是亲像文字上所写ê,tio̍h用仝款ê方式去报复。

第11到12节,诗人向上帝恳求,只要上帝帮助伊,想beh陷害伊ê气力就会消失,án-ne,伊就ē-tàng lóng无惊惶地khiā立tī上帝面前,hō͘ beh陷害伊ê人感觉见笑万分。第12节ê「廉洁自守」,这表示伊tī上帝面前是一个诚实者,对上帝绝对忠实。

第13节,chit句ē-sái讲是诗篇第一集ê总结。诗篇ê每聚集尾lóng是用chit句型(参考诗篇七十二:19、八十九:52、一○六:48、一五○:6)。



重新查询 专卷研经 诗篇系列
错误回报,请联系comm[@]fhl.net