诗篇 17章1节 到 17章15节   背景资料  上一笔  下一笔
这是一首恳求上帝伸冤ê诗歌。Kah头前已经读过ê第四篇、第七篇、第十篇、第十一篇,以及第十三篇等类似。诗人tī诗歌中一再表示家己是清白ê,不应该受tio̍h chit种折磨,hō͘伊ê性命陷入了困境。

第1到2节,chit两节真清楚表达一个认bat:上帝就是公义ê审判官。原因是上帝绝对bē受tio̍h任何人情ê包围影响,他会注意听受tio̍h冤屈者哭诉ê声音。

第3到5节,诗人坚信上帝观察人ê心内,知影人心中ê意念。Chia mā提起「暗夜」,表示he是siōng容易hō͘人失迷、犯罪ê时刻,诗人向上帝表示,就算tī siōng容易犯罪ê暗夜时刻,伊mā是真清楚上帝ê旨意,无违背。因为伊是跟tòe上帝ê旨意行,遵行上帝ê命令做tāi-chì,tòe-tiâu上帝ê脚步,无偏离。

第4节ê所谓「讲邪恶ê话」,表示专门讲毁谤、做假见证ê话,mā有挑拨是非ê意思,是陷害别人ê一种方式。

第6到9节,诗人祈求上帝垂听伊ê祈祷,并且祈求上帝「显示奇妙ê慈爱」。Tī圣经中只要提起上帝「奇妙ê慈爱」,就是teh表示上帝tùi埃及kā以色列人民带领出来。因为这是无人ē-tàng料想得tio̍h ê事,上帝竟然ē-tàng真轻易tùi当时被看做siōng强猛ê埃及帝国手中,kā siōng脆弱ê以色列人民带领出来,m̄-nā án-ne,iáu带走了埃及人ê财富,并且透过红海淹灭了埃及精锐部队。

另外一方面,讲上帝「奇妙ê慈爱」iáu有另外一个意思,就是上帝所行ê神迹奇事,chiah-ê lóng是人无法度预估、想像会tio̍h ê。像tùi天顶降落吗哪,tùi石磐出泉水,hō͘红海ê水分开等等,只要是神迹奇事lóng是teh说明上帝奇妙ê慈爱。诗人祈求上帝用他行神迹奇事ê方式来保护,án-ne伊ê仇敌就无法度对伊有任何伤害。

第10到12节,这短短三节诗歌,诗人kā敌人描述ê非常彻底,包括1.心肠刚硬、2.随时chhōe机会伤害人、3.残害人ê手段ná亲像凶猛ê狮一般。

第13到15节,诗人祈求上帝用他ê「剑」来痛击仇敌。所谓上帝ê「剑」,就是teh指上帝ê话语(参考希伯来书四:12)。

第14节,充分显示早期以色列民族非常流行ê观念:老父ê罪过,kā继续惩罚到kiáⁿ孙身上。Chia所讲ê「今世富足ê人」,是teh指hiah-ê用不正当手路夺取别人财富ê人。如果in kā chit种财富留落来hō͘ in ê kiáⁿ孙,mā ē-sái后代kiáⁿ孙连带受tio̍h严厉惩罚。

第15节,诗人强调若是因为遵行上帝ê旨意而hō͘行为正直,chit种人,随时lóng thang见tio̍h上帝ê荣耀,就会「满心快乐」。

重新查询 专卷研经 诗篇系列
错误回报,请联系comm[@]fhl.net