这是一首祈祷ê诗歌，mā是属tī哀歌。Tī现代中文译本有标题写「晚祷」，是根据第2节：「愿我高举ê双手成做晚祭。」所谓「晚祭」，是teh指每工早暗lóng当献祭ê一部分。出埃及记第廿九章39到41节清楚提起早、晚献祭ê内容。诗人用祈祷代替献祭，说明伊心中确实是敬虔ê态度，如同在献牲祭ê时hit种，m̄敢怠慢。

第1到2节，诗人表示伊已经面临性命ê苦难，祈求上帝「快快帮助」伊，伊祈求上帝「垂听」伊ê祈祷，祈愿chit种祈祷会亲像所烧献ê香之烟仝款，冉冉地升上天去，hō͘上帝闻到、听见伊祈求ê声音。

第3到4节，诗人虽然心内痛恨邪恶ê人，m̄-koh伊iáu是beh谨守家己ê嘴舌，bē出恶言，m̄-koh求上帝帮助伊有能力抵挡作恶ê人ê诱惑，bē加入in ê行列。

第5到7节，Tī chit段诗歌中，诗人深信正直ê义人ê祝福chiah真实，就算是出tī义人ê责phah，伊mā甘心接受。伊深信邪恶ê人一定会受tio̍h上帝严厉ê惩罚。

第8到10节，诗人知影邪恶者ê厉害，m̄是人ê能力有办法分辨、防范，只有上帝ê帮助chiah有够额ê气力阻挡。诗人除了祈求上帝帮助伊有chit种能力外，mā祈求上帝hō͘作恶ê人「陷入」家己设计想beh陷害别人ê罗网中。