这是一篇非常特别ê诗歌，有学者认为应该是tī hông掠去巴比伦做奴隶了后，透过深切反省而写做ê诗歌。若是hō͘掳了后ê诗歌，就真容易明白原来诗人回想起过去tī大卫王朝到所罗门王时代，to̍h是以色列民族siōng兴盛ê时代，而且是边疆幅地siōng真阔ê时代，m̄-koh mā因为án-ne，以色列人民开始骄傲起来，渐渐bē记得上帝ê话语。却tī hông掠去做奴隶，tam尽敌人对in ê侮辱了后，开始有深切ê反省而写出chit首诗歌。

Kui首诗篇短短三节用了四pái「m̄敢」，表示kah过去完全颠倒ê态度ê意思。

第1节，「m̄敢koh再狂傲」，这「狂傲」一词，表示心内ê骄傲。「妄自尊大」，这表示目中无人ê意。「m̄敢koh再有大企图」，表示m̄敢koh再有雄心大志，原因是若无上帝赐福，一切lóng会成做妄想。「m̄敢koh做力所不及ê事」，表示谦卑而bē狂傲，自认真有能力ē-tàng完成想beh得tio̍h ê计画。诗人讲会先知影上帝ê旨意了后，chiah来决定是m̄是beh去做。因为若m̄是上帝同在，就算有能力，mā是无用。

第2节，chit节真有意思，断奶ê婴á是会烦躁ê，m̄-koh若是躺tī母亲ê怀抱中，就会感觉舒适安稳，无koh有惊惶。因为án-ne，心灵会宁静，这是因为体会tio̍h上帝看顾ê恩典了后，有感而发。

第3节，这是诗人ê呼吁，伊认为只有tńg来到上帝ê身边，对上帝有绝对ê信心，chiah ē-tàng享受第2节所提起ê美境。