Chit首诗歌kah第十二首仝款，lóng是属tī哀歌，诗人teh呼求上帝ê拯救。这是诗人ê身心受tio̍h重创，向上帝发出求救ê诗歌。

第1节，chit节thang对照第廿二篇第1节：「我ê上帝，我ê上帝，你为甚么弃sak我？我哀号求助，你为甚么m̄来帮助我？」两个所beh表达ê意义仝款。

Chit首诗tī第1到2节以四个问题发出：「bē记得」、「不理睬」、「悲愁」、「敌人耀武扬威」等等等chiah-ê词，lóng thang感受出诗人哀嚎ê声音。

Chia ê「不理睬」，kah「掩面」是仝款ê意思，类似chit种词tī诗篇中一再出现（参考廿七：9、三十：7、四十四：24、六十九：17、八十八：14、一○二：2、一四三：7）。诗人beh表达一个重要观念：若是上帝m̄-chhap，性命就会失去ǹg望。

	第3到4节，诗人祈求上帝「看顾」伊，因为伊知影只有上帝ê引chhōa、扶持，chiah ē-tàng看见性命ê亮光。

第5到6节，chit两节表示对上帝有绝对ê信心，第6节所讲ê「你施恩厚待我」，mā thang翻译成「你用厚厚ê恩典补偿了我」，表示上帝确实有听伊ê祈祷，并且「补足」了所有ê一切需要，而且超过所需要ê一切。