Tùi第4节「伊tùi奴役中kā我释放出来」，chit句话就thang看出chit首诗乃是tùi巴比伦释放tńg来后ê作品。Kah诗篇第一二四篇真类似。

第1到2节，chia所讲ê「幼年以来」，指ê是tī早年以色列人民ê祖先tī埃及受苦ê意思。M̄-koh，到chit-má，无任何一个仇敌ē-tàng毁灭、消灭in，是因为有上帝做in ê óa靠ê缘故。Tùi第2节thang看tio̍h仇敌ê迫害，是用「残酷」ê手段对待in，这m̄-nā是早年tī埃及做奴隶ê时受tio̍h án-ne对待，后来hông掠去巴比伦做奴隶ê时mā是hō͘侮辱（参考诗篇一三七：1—6）。M̄-koh都无hō͘ in因为án-ne而变成懦弱、不堪一击。因为上帝是in ê óa靠。

第3到4节，「tī我尻脊骿留落来了深深ê伤痕」，这表示以色列人民hông掠去做奴隶ê时，受tio̍h鞭phah所留落来ê记号，chit种伤痕是无法度涂灭、抹去ê记号，chit种记号ná亲像tī田里，作穑人用犂耕过ê「犂沟」仝款「koh深koh长」（参考弥迦书三：12）。

第5到8节，chit段诗歌是诗人对受难同胞ê鼓励，伊用上帝会诅咒欺压in ê仇敌来表达，伊讲憎恨「锡安」ê人，lóng会hō͘ 上帝所击退。其实，伊ê意思是teh指欺压in，等于kah上帝为敌仝款。因为in就是上帝所拣选ê子民。Chiah-ê仇敌会ná亲像「长tī厝顶上ê草」，意思是无土地作它生长ê凭藉，真紧to̍h会「枯干」，就算有成长，mā不过是稀稀落落，连beh割成「一把」当柴火烧lóng嫌少，bē有人「奉上主ê名祝福」in。