Chit-ê首kah第一二七篇lóng是属tī「智慧文学」ê诗歌。是普遍被众祭司用来教导人民ê教材。只要是敬虔地敬拜上帝，尊上帝为主，必定会得tio̍h上帝ê赐福，兴 旺ê情况ná亲像结实累累ê果子树一般。Kā chit首诗kah第一首、一一二首比较khah来看，会发觉in之间ê内容真接近。

第1节，chit节开始就讲「敬畏上主ê人jōa-ni̍h-á有福ah！」然续后落来koh讲「遵行」上帝命令ê人mā是「有福」ê人。

第2到3节，说明「有福」ê内容，包括享受家己劳碌所得tio̍h ê，m̄免担心有缺乏；家庭会美满，m̄-nā bó͘会生湠chē-chē到ná亲像「结实累累ê葡萄树」，这表明ê是充沛ê性命力，而且所生落来ê子女，ná亲像性命力极强ê「橄榄树」，一棵棵栽种tī溪水边一般。

第4节，诗人koh一pái用肯定ê语气讲「敬畏上主ê人」，一定会得tio̍h ná亲像第2到3节所提起ê tùi上帝来赏赐之福。

第5到6节，这是祭司tī圣殿祝福ê用语。因为耶路撒冷是犹太人生活ê中心，因为án-ne，当诗人讲「一生一世目睹耶路撒冷ê繁荣」ê时，伊ê意思mā是teh讲敬虔ê人会繁荣、富足ê过一世人。