非常清楚，chit首是为歌颂耶路撒冷圣殿而唱ê诗歌。

第1到2节，一阵人相招作伴去耶路撒冷圣殿，看见圣殿就心生欢喜，因为ē-tàng平安来到in向往真久ê圣殿，心中真自然tek感觉兴奋。

第3到5节，tùi第3节「耶路撒冷是一座重建ê城」chit句话，ē-tàng看出chit首诗是tī受掠释回后所写ê诗歌。特别是tī第4节「各支族，就是以色列ê各支族lóng来到chia」chit句诗词，thang看tio̍h原本tī所罗门王往生后分裂ê以色列民族，已经因为主前586年完全沦陷tī巴比伦帝国，chit-má tńg去故乡了后，koh一pái结合做伙，无koh有所讲ê南、北二国之分。因为án-ne，chit-má是所有支族ê人lóng thang聚集做伙，而且是tī耶路撒冷圣殿敬拜上帝，这是自从主前 930年以来不bat有过ê经验，是上帝赏赐hō͘ in极大ê恩典。第5节ê「以色列ê君王tī chia审判人民」，这是teh指上帝ê意思。因为上帝就tòa tī圣殿里。

第6到9节，因为耶路撒冷过去bat遇tio̍h巴比伦帝国hō͘摧毁，因为án-ne，诗人呼吁大家来为耶路撒冷祈求「和平」，表示无koh有战争带来ê分裂，mā bē koh受到摧毁。