第一一三篇开始到一一八篇，lóng是Pôaⁿ过节暗顿ê时必唱ê诗歌。这六篇诗hông称做「颂赞诗集」。这几首诗歌常出现ê诗句是「tio̍h o-ló上主」。其实chit段诗歌m̄-nā是tī Pôaⁿ过节唱，mā tī五旬节、Tòa棚节、奉献节等等节期ê时chūn唱。通常是tī Pôaⁿ过节ê暗顿ê时唱第一一三到一一四篇，饭后唱一一五到一一八篇。马可福音第十四章26节讲：「in唱了一首诗，就出来，到橄榄山去。」就是唱诗篇第一一五到一一八篇中ê一篇。

这是一首颂赞上帝ê诗歌。主要teh o-ló上帝ê威严、荣耀，以及他对卑微、穷苦ê人ê眷顾、疼惜，ná亲像tī第一三八篇6节a句所讲ê：「上主至尊无上，m̄-koh伊看顾卑微ê人。」上帝虽然非常ê尊贵、威严、至上无比ê荣耀，m̄-koh他会垂怜hiah-ê tī卑微、困苦中ê子民。犹太人tī重要节期中lóng会吟唱chit首诗歌。

第1到4节，chia一开始就讲tio̍h「上主ê奴仆」，tī以色列人民ê观念中，in就是上帝拣选ê「奴仆」（参考以赛亚书四十一：8、四十三：10、四十四：1、21、四十九：3）。另外一方面，所有ê君王、领袖等，lóng是上帝ê奴仆，祭司、先知mā是。因为án-ne，当带领全会众聚会ê人讲「上主ê奴仆ah，tio̍h颂赞」chit句ê时，等于所有ê会众lóng tio̍h回应第2节，讲上帝ê名「应受颂赞」，而且是beh颂赞到「永远」。然后第3节启者koh宣告讲「tùi日出到日落之地」，续落来回应ê群众tio̍h讲「上主ê名应受颂赞」，第4节mā是仝款ê方式。

第5到9节，chit节讲出chit位伟大ê上帝，是jōa-ni̍h-á关心卑微困苦ê子民。第6节ê「观看诸天kah大地」，表明上帝关心他所创造ê天地万物。然续后落来第7到9节，诗人teh表达一个基本观念：上帝m̄是离人间真遥远，他m̄是高高在上，不闻人间苦难ê声音，m̄是，他是关心至极。特别ê所在是上帝会tùi「粪土中救拔贫乏人」，chit句话表明ê是社会中贫乏人往往被当做无用ê对象，ná亲像粪土般ê hō͘人轻视、隔离出来。M̄-koh上帝却beh提拔chit种人，hō͘ in高升而且尊贵ná亲像王子一般。仝款ê，tī以色列人ê文化中，无法度生育ê cha-bó͘人是hō͘人看bē起、轻视ê对象，mā是cha-bó͘人性命中siōng大ê耻辱，m̄-koh上帝却beh hō͘ chit种cha-bó͘人「tī厝受敬重」。注意chit句「赐伊kiáⁿ」，有两种意义：一是看起来无可能有娠生kiáⁿ ê人，ē-tàng有娠生育。另外一种表示充满tio̍h性命ê活力，thang帮助真chē困苦ê人得tio̍h安慰。