诗篇 104章1节 到 104章35节   背景资料  上一笔  下一笔
这mā是四首颂赞上帝创造之美ê诗篇之一,其它三篇是第八篇、第十九篇1到6节、第廿九篇等。作者tùi上帝创造ê宇宙万物开始讲起,颂赞上帝创造ê美。有一种讲法,认为chit首诗是用创世记第一章为基础,写出创造ê美kah奇妙。亲像第1到3节,是创造ê第一到两工;第4到18节,是创造ê第三工;第19到24节,创造ê第四kah第六天;第25到26节,是创造ê第五天;第27到 30节,是kui个创造ê总结,讲tio̍h一切受造物lóng是tī上帝ê「气」中生活,因为万物性命ê来源,就是上帝ê「气」á是「灵」。

第1到3节,第1节ê a句,kah chit首诗篇最后一节(第35节)最后仝款。因为án-ne,起头诗句kah结尾诗句仝款,lóng是用「我ê灵ah,tio̍h颂赞上主!」。

Chit段诗歌tùi「光」开始,然后有「穹苍」出现,续落来是有「高天ê水」,mā有「云彩」kah「风」。这诗人mā讲上帝以云彩当做「战车」,表示云彩是上帝ê交通工具(参考诗篇六十八:4,申命记三十三:26,以赛亚书十九:1)。

第4到9节,chit段诗歌出现创造ê第三工,mā就是大地kah大海ê出现,诗人特别强调上帝ê命令一出来,连水lóng得听从。Chit种讲词对以色列人民来讲真特别,原因是in看海洋、大水lóng是危害性命ê气力。M̄-koh chit种危害性命ê气力听tio̍h上帝ê命令,就lóng乖顺听从,m̄敢超过jú雷池一步。

第10到13节,chit段诗歌开始出现山岭间有水thang供给野兽、野驴á lim,有树木hō͘空中ê飞鸟栖息、吟唱诗歌,而且有大地thang生出供给人类食用ê菜蔬,mā hō͘人thang种作五谷杂粮。

第14到18节,chit段诗歌提起「酿酒」,这表示人开始种植果子树,mā会制造食用ê「油」kah得tio̍h粮食「培养体力」。第16到18节,诗人提起高耸ê香柏树松树lóng是上帝栽种ê,hō͘鸟á thang tī树á顶做巢作窝延续下一代性命,m̄-nā án-ne,mā有野山羊kah石獾出入。

第19到23节,chit段诗歌特别提起日月星辰kah日夜ê变化,这真清楚是创世记第一章14到19节ê背景,m̄-koh mā说明有kóa民族kā日月星辰当做神明teh崇拜ê时,诗人却真清楚表示,chiah-ê并m̄是神明,却是上帝创造用来管理时间ê。Chia mā提起人kah狮出现。

第24到26节,chit段提起海洋,以及海里ê动物。比较khah特别ê所在,是tī第26节,诗人提起人类造ê船只tī海洋航行,ná亲像海中ê动物teh泅水仝款。

第27到30节,chit段诗歌ē-sái讲是头前所有创造ê一个结论,表示chiah-ê受造ê一切,ē-tàng延续性命落去,lóng是上帝ê赐福。若是上帝kā他ê活气收tńg来,性命就结束。换句话讲,所有万物ê性命,lóng是tī上帝手中。上帝mā赏赐食物hō͘所有受造ê动物,以及人类。

第31到35节,这是诗人teh歌颂上帝创造ê伟大,只要活teh ê日子里,一定lóng tio̍h o-ló歌颂。只要知影人ê有限、渺小,以及上帝就是性命ê主宰,所有作奸犯罪ê人就会遁形消失,m̄敢胡作非为。

重新查询 专卷研经 诗篇系列
错误回报,请联系comm[@]fhl.net