箴言 29章1节 到 29章27节   背景资料  上一笔  下一笔
Chit章以聪明ê君王做主题,说明有智慧ê君王m̄-nā是国家社会ê福气,koh khah是人民ê幸福。同时mā用「义人」、「明智人」来表示好ê君王,相对ê,用「愚戆人」、「邪恶人」来形容昏君。

第1节,chia讲愚戆ê人即使用心教导、责罚,mā是改变不了伊。Chit种情形ná亲像撒母耳记上第二章25节所描写ê祭司以利ê kiáⁿ仝款。

第2节、第4节、第12节、第14节、第16节,chiah-ê经文lóng用来描述一个好ê君王必定会「秉公行义」,hō͘人民受益,chit种国家一定强盛,chit种君王bē听谄媚ê话,会知影维护sàn-chhiah人ê权益,chit种国家、社会一定长治久安。相对ê,一个愚戆ê君王,是人民ê悲哀,因为tī chit种君王统治之下,贪污一定盛行,国家真紧to̍h会败坏,原因是伊欢喜听虚假ê话,mā无执行公义ê政策。其中第2节、第4节lóng是对偶句话。另外,tī第廿八章12节、28节等等,mā提起好ê君王是人民ê福气。

第3节,chit节是对偶句话。Chit节ê上半句thang对照第十章1节、第十五章20节、第廿三章24到25节、第廿七章11节等等,lóng是提醒kiáⁿ只有成做明智者,chiah会hō͘父母得tio̍h欣慰。下半句「结交娼妓ê,倾家荡产」,chit句话thang用来对照第五章7到10节、第六章26节。Mā thang参考路加福音第十五章13到14节耶稣譬喻中所描述ná浪荡ê kiáⁿ之景况。

第5节,thang参考第廿八章23节。Chia ê「谄媚」,表示虚假ê言词,结果kan-taⁿ会hō͘家己受害,一点利益mā无。

第6到11节、第23节、第27节,chiah-ê经文lóng提起明智者kah愚戆者之间ê差别,mā是用对偶句话呈现出来。邪恶者kan-taⁿ想beh设计谋害别人,结果ka-la̍uh tī家己ê网罗中,因为伊既会陷害别人,就bē尊重别人ê权利。Kan-taⁿ会讲究家己ê利益,会tī动乱中获取私益,心中憎恨正直人。相对tī明智ê人,既不设计陷害别人,就bē ka-la̍uh tī家己ê网罗中,thang过自由ê生活。伊所想tio̍h ê,就是关心、协助贫困ê人ê需要,lóng是会想办法协助维护社会安定。无论是做帮助人ê事,lóng是会心怀若谷,谦卑应对,m̄-koh对邪恶ê人会有强烈ê反感。

第13节,ná亲像第廿二章2节所讲ê:「sàn-chhiah人kah有钱人有一处仝款,二者lóng是上主所造。」chia主要是teh说明所有ê人lóng得tio̍h上帝仝款ê赏赐、恩典,m̄-koh,有kóa人知影怎样运用上帝ê赏赐,贡献社会,有kóa人却是kā上帝ê恩典乱使用到作恶ê事顶面。Ná亲像耶稣tī马太福音第五章45节所讲ê:「天父hō͘日头照好人,仝款mā照pháiⁿ人;落雨hō͘行善ê,mā hō͘作恶ê。」上帝对待所有ê人lóng仝款,m̄-koh有ê人却m̄知感恩,反tńg去行pháiⁿ事,án-ne chiah是hō͘上帝伤心ê所在。

第15节、第17节,chit两节thang参考第十三章24节、第十九章18节、第廿二章6节、15节、第廿三章13节等等,chiah-ê经文lóng有提起管教子女,一定对in有帮助。

第18节,chit节提起遵守上帝ê律法,是维护kui个社会安定ê气力。Chit种社会chiah ē-tàng安定,人民chiah有幸福thang讲。

第19节、第21节,chit两节lóng提起管教奴仆ê方式,一定tio̍h用实际而且真实ê态度规范。单用言语讲教,无啥路用。Á放纵奴仆,kan-taⁿ会hō͘家己受害。

第20节,thang参考第十五章2节、第廿六章12节。「信口开河」表示随便而且语带夸耀,chit种人kah愚戆ê人无两样。

第22节,chit节thang参考第十四章17节、29节、第十五章18节、第廿二章24到25节等等。谈及一个明智ê人,会知影怎样控制家己ê脾气,免得因急躁而制造koh khah chē ê纷争。

第24节,「kah盗贼仝伴」,chit种人mā是盗贼,等于是hō͘家己受tio̍h律法ê制裁。

第25节,「惊人」,有几种原因,其中之一,就是缺乏信心。因为án-ne,「信靠上帝」就是siōng好ê保障kah óa靠。

第26节,一般人lóng认为君王ē-tàng替人伸冤,á是hō͘人真chē利益,其实,真正对人ê性命有帮助ê,是上帝;他赐hō͘人ê礼物chiah是永恒无变ê。Mā是对人ê性命siōng有帮助ê。君王所hō͘ ê,往往是利益一时而已,甚至有一工,伊会索取tńg去。


重新查询 专卷研经 箴言系列
错误回报,请联系comm[@]fhl.net