箴言 28章1节 到 28章28节   背景资料  上一笔  下一笔
Chit章是用「正直」做主题汇集起来ê箴言。

第1节,chit节是对偶句话,用「邪恶人」kah「正直人」成对比。所讲ê内容ná亲像俗语所讲ê:「m̄做亏心事,m̄惊半暝有人敲门。」另外一句是:「有理行天下。」

第2节,chit节mā thang参考第廿九章2节。Chit节thang讲和以色列ê历史有关系;tī所罗门王往生后,以色列分裂做做南北二国,北国以色列,南国犹大。北国tùi开国国王耶罗波安一世ê主前930年开始,到何细亚ê主前721年亡国止,短短ê二百十年时间,总共换了十九个国王,有九个王朝,thang看出窜夺王位ê情况真严重。先知何西阿就án-ne传出上帝ê话讲:「In 热 kah 亲像火炉,吞灭 in ê 士师。In ê 君王lóng 倒落去;in 中间lóng无人求叫我。(全民版)」(何西阿书七:7)chit种国家政情必定bē稳,社会mā真容易纷乱。相对ê,南国犹大则稳定了真chē,tùi罗波安ê主前930年开始,到最后西底家时代终止ê主前586年,前后共计三百四十五年中,mā是十九个国王,m̄-koh lóng是属tī大卫ê王朝。

第3节、第12节、第15节、第16节、第28节,chiah-ê经文lóng kah统治者有关,好ê统治者必定是通达事理,而且会维持公义、照顾sàn-chhiah人等弱势者。相对ê,如果是一位暴君,就完全无仝款,伊m̄-nā会欺负sàn-chhiah人,而且会手段残酷,大家kan-taⁿ会想出所有ê办法beh闪避伊ê统治。其中第12节、第28节,lóng是对偶句话。

第4节、第5节、第7节、第9节,chiah-ê经文lóng kah遵守律法有关系。其中第4节是对偶句话。Á tio̍h注意ê,chia所讲ê律法,是teh指上帝ê规矩。因为án-ne,遵守律法规矩做tāi-chì,就会知影上帝所kah意ê是甚么。违背上帝法则ê人,就算祈祷,mā bē得tio̍h上帝所垂听(参考诗篇第一篇,约翰福音九:31)。

第6节、第8节、第11节、第20节、第21节、第22节、第24节、第27节,chiah-ê经文lóng kah财富ê来源,以及对贫困者ê关怀态度有关;一个人富有,如果无疼心,án-ne累积起来ê财富mā会失去。仝款ê,如果一个人ê财富是因为tùi贪婪、诈欺、高利贷、收受o͘-se、剥削别人而累积起来ê财富,chit种人bē得tio̍h上帝ê赐福。第27节是对偶句话。

第10节,chit节说明只有心思邪恶ê人chiah会诱惑正直人去作恶,chit种人最后必定会ka-la̍uh tī家己所设计ê陷阱中。相对ê,不心存陷害人ê人,就是心地纯洁者,一定会蒙上帝赐福。

第13节,chit节lóng是对偶句话。用「掩盖(khàm)」kah「承认」过错,这二者之间必定无仝。因为上帝会以仁慈对待承认家己过错ê人(参考约翰一书一:9)。

第14节,chit节mā是对偶句话。Chit节真清楚讲出一定tio̍h用敬畏ê心灵敬拜上帝,bē-tàng固执不冥,心地刚硬,chit种听bē落去上帝ê话,结果是自取灭亡。

第17节,刣人,这是上帝所严厉禁止ê事。M̄-thang阻止对chit种人受tio̍h律法ê惩罚。因为这是伊一定tio̍h接受ê惩罚。

第18节,chit节是对偶句话。Mā thang参考箴言第十章9节。「行为正直」kah「行为诡诈」成相对。Chia是teh指照律法ê规定做tāi-chì,而且是诚实,m̄是钻牛角尖ê思绪。

第19节,chit节thang参考第十二章11节。只有勤劳ê人才bē浪费时间tī hiah-ê琐碎不事生产ê事顶面。Chit种作穑人绝对会有存粮。相对ê,必定sàn-chhiah。

第23节,讲诚实话ê人,一定会受tio̍h koh khah chē ê「爱戴」,相对ê,欢喜讲「谄媚」ê话ê人,一定会hō͘人轻视。

第25节,chia ê「自私」隐含tio̍h「贪婪」ê意思。Chit种人siōng容易挑起争端,「制造纷争」。Á「信靠上主」ê人一定会得tio̍h上帝ê赐福,永远bē缺乏。

第26节,愚昧ê人,无论怎样劝伊都无用。结果必定引来灭亡。M̄-koh相对tī聪明ê人,必定会听从智者ê劝勉。Chit种人必定会得tio̍h帮助。


重新查询 专卷研经 箴言系列
错误回报,请联系comm[@]fhl.net