箴言 16章1节 到 16章33节   背景资料  上一笔  下一笔
Chit章主要teh强调上帝就是一切ê主宰,人需要谦卑,m̄-thang认为家己事事lóng ē-tàng,只有上帝chiah有chit种能力,因为他是万物ê创造者。

第1节、第9节,chit三节经文lóng teh强调一个基本认bat:真正成就人所计画ê事,是上帝。Kah台湾ê俗语「千算万算,不值得天一划」,á是中国ê俚语「谋事在人,成事在天」仝款。Mā thang对照第十九章21节、第二十章24节、第廿一章30到31节等等经文。

第2到3节,chit两节讲tio̍h上帝观察人心内ê心思意念。如果人骄傲,上帝bē hō͘ in祝福。因为án-ne,知影kā所计画ê万事「交托上主」,chit种人必定会「成功」。

第4节,所谓「天生我才一定有用」,用chit句俗语来看第4节就真接近。作者强调弃sak上帝ê人,最后必定会「灭亡」。

第5到7节、第18节,圣经一再讲「狂傲ê人」,心中bē有上帝,chit种人心中看bē起上帝(参考诗篇十四:1)。箴言第六章17节bat讲chit种人mā是上帝所讨厌ê对象。M̄-koh相对ê,对上帝忠实,信靠、敬畏上帝ê人,一定会得tio̍h上帝ê祝福,即使是仇敌目前,mā会化干戈为玉帛。

第8节,chit节thang参考第十五章16节。诚实是一个人ê性命siōng重要ê要素。宁可守tiâu,mā无愿意因欺骗而富有。

第10到15节,chit段经文lóng kah君王ê治国态度有关;讲tio̍h君王若想beh长治久安,hō͘国家稳定,siōng重要ê是tī审案、治理国政ê时,必定是用「正义」为根基。因为好ê君王知影倾「听正直」、「诚实」ê话语。

第16节,「智慧」、「知识」lóng仝款ê意思,这是无法度用世间任何贵重ê物件,包括「精金」、「纯银」等换来得tio̍h。

第17节,智者显现出来ê就是「正直」,chit种人会知影「远离邪恶」,而且会「谨慎行正路」,án-ne就会「保全」性命免受伤害。

第19到20节,「谦卑」ê人会kā家己ê身段放落来kah「sàn-chhiah人来往」,因为伊会听从上帝ê话,去关心贫困ê人,结果发见家己「受益无穷」,因为伊会蒙上帝赐福(参考十九:17)。相对ê,就是「狂妄ê人」,in根本无kā sàn-chhiah人看tī眼内,in心中只想beh夺取koh khah chē财物。

第21到24节、第27到28节,chit段经文谈及讲话ê表达方式;包括讲话「温雅」(第21节)、「三思而后言」(第23节)、「恳切地ê话」(第24节)、像「无赖」者所讲ê话语(第27节)、危言耸听、搬弄是非ê话(第28节)等。Á只有「聪明人」chiah会讲出适当ê话语,伊mā会知影接受「教导」加添知识。

第25节,chit节kah第十四章12节完全仝款。

第26节,「m̄敢pîn-tōaⁿ」kah「勤劳」工作真接近。Chit节mā thang参考第十二章24节、第27节、第十三章4节等等经文。

第29到30节,chit两节lóng提起「心术不正」ê人,无论伊做甚么,lóng是为tio̍h beh「欺骗厝边」,「图谋pháiⁿ事」。上帝一定会清楚知影chit种人心中所图谋ê邪恶ê tāi-chì。

第31节,chit节thang参考利未记第十九章32节。表示年老「白发」ê人,mā象徵是智慧ê记号。

第32节,「忍耐」kah「自制」仝款,有chit种本领,就是一种无形ê坚强力量thang致胜仇敌。

第33节,chit节kah第1、3、9节是仝款ê意思。「抽签问卜」除了表示「谋略」之外,mā指偶像神明ê意思。换句话讲,除了上帝以外,其他ê神明lóng无法度取代上帝对人性命ê决定权。这mā是摩西律法严厉禁止求神问卜ê原因(参考利未记十九:26),因为chit种行为是迦南地人民敬拜偶像神明ê方式,chiah-ê偶像神明无法度决定人ê运命。除了上帝,无人ē-tàng知影人ê性命会怎样样。Tī约拿ê故事中,hiah-ê水手虽然抽签知影问题出tī约拿,m̄-koh即使众水手用尽一切办法beh平息风涌,却白做无功,因为in无法度改变上帝beh约拿去完成ê工作。

重新查询 专卷研经 箴言系列
错误回报,请联系comm[@]fhl.net