箴言 14章1节 到 14章35节   背景资料  上一笔  下一笔
Chit章mā是kah头前一章仝款,lóng是用「愚昧人」、「邪恶人」,kah「正直人」、「智慧」、「聪明人」相对照,说明二者之间ê差别。除了这以外,mā有几pái谈及谨慎讲话ê重要性,亲像第3节、第5节、第25节等等,lóng teh强调tio̍h讲适当ê话。

第1节,chit节thang参考第三十一章10到31节所描述ê「贤慧ê bó͘」。贤慧是建立一个家庭ê基础,相对ê就是「愚戆ê cha-bó͘人」,in对家庭lóng无帮助,kan-taⁿ会「拆毁」破坏而已。箴言有kúi-nā pái提起,亲像第十二章4节、第十九章13节、第廿一章19节等等,lóng讲愚戆ê cha-bó͘人真会唠叨。

第2节,chit节是对偶句型。所谓「行为乖僻」,是teh指不按照规矩办事,专门钻牛角尖,á是钻漏洞ê意思。

第3节、第5节、第25节,chit三节lóng提起有关谨慎讲话ê重要性,特别是讲诚实话,m̄-nā tī证人席上会救人ê性命,mā会得tio̍h别人ê尊敬。相对ê,就是讲白贼言,kan-taⁿ会伤害别人性命,chit点thang参考诫命第九条。

第4节,「cheng-seⁿ耕犁」,意思是teh指殷勤劳动ê意思。虽然是cheng-seⁿ来代表,m̄-koh mā表示一个人若是认真勤劳工作,必定会有够额ê谷物储存在仓库里,bē致使iau饿。

第6到9节,chit段经文用「愚戆人」、「狂妄」ê人kah「明达」、「聪明」、「正直人」等相对照,说明二者之间ê差别。主要teh说明m̄-thang想beh tùi愚戆人ê身上得tio̍h智慧,in犯siōng严重ê罪mā m̄肯认错悔改。M̄-koh相对ê,就是聪明ê人表现出来ê,就是求知欲真强,mā知影会学习彼此赦免所犯ê过错。

第10节,这是一节相对句型。说明人心内ê感受,绝对m̄是外人ē-tàng体会。

第11节、第14到16节、第32节,chiah-ê经文lóng是用「正直人」、「聪明人」kah「愚戆人」、「pháiⁿ人」等相对照,mā讲出这二者之间ê差别。主要teh说明正直人无论环境怎样改变,伊lóng ē-tàng屹立不摇,而且结局会得tio̍h「善报」,伊ê所行必定会小心,mā因为án-ne而ē-tàng「闪过祸患」。M̄-koh相对ê,就是愚戆人结局会亲像倒塌ê厝,伊用残暴手段所做ê事,必定会hō͘伊「败亡」。

第12节,用「道路」来比并一个虚假ê人,表面上看起来真正直,其实是领人行向死亡。

第13节,chit节用「欢笑、欢乐」来掩盖(khàm)心内ê愁苦,结果是目nih-á ê。意思是teh指不真实,就算是大家欢笑聚集做伙,mā是目nih-á ê享福,灾难iáu-koh bē停止。Chit对hiah-ê作恶者来讲就是án-ne。亲像抢夺tio̍h,欢喜kan-taⁿ会短暂时间,惊惶被发见ê时间koh khah长。因为án-ne,只有愚戆ê人chiah会做chit款tāi-chì。

第17到19节、第29节,chia真清楚表示「愚戆人」ê特性就是急躁,总会败坏好事,「自食恶果」。相对ê,通情达理ê人会冷静处理发生ê事,hō͘人看起来就知影是一个有智慧ê人,结果愚戆人lóng tio̍h来chhōe伊帮助。

第20到24节,这四节真清楚teh表达一个基本生活态度,就是聪明ê人,会怜悯别人ê苦难,bē因为别人sàn-chhiah就看bē起伊,会知影殷勤做工;只知影享受,轻视贫困ê人,kui工kan-taⁿ会闲聊,chit种人,bē得tio̍h别人ê尊敬,最后会变成sàn-chhiah。

第26到27节,chit两节强调「敬畏上主」ê人,tùi án-ne会得tio̍h性命。因为敬畏上主乃是智慧开端(参考一:7、九:10),而智慧hō͘人得tio̍h性命(参考三:17、四:6、九:11、十五:24、廿一:16)。

第28节,一个聪明有智慧ê君王,一定会珍惜伊ê子民,因为伊知影伊ê权柄是来自人民ê支持。

第30节,「心内平静是肉体ê 活命;怨妒会 hō͘ 骨头朽澜。(全民版)」chit句 thang对照第十七章22节:「欢喜ê 心是良药;忧伤 ê 心会 hō͘ 骨枯焦。(全民版)」教父奥古斯丁讲:「骄傲是万恶ê根源。」人时常会因为骄傲产生嫉妒ê心,而罪则常会埋伏tī嫉妒ê中间。

第31节,「怜悯贫寒」这是kui本圣经ê主题,对tī苦难者m̄-nā无法度轻视,而且tio̍h伸出援手kā in救助,这乃是teh回应上帝ê疼,mā就是对上主敬虔ê态度。

第33到35节,chit段经文讲出一个国家、政府,需要有智慧ê人来治理,只有án-ne,chiah ē-tàng hō͘「国家强盛」,有chit种臣仆chiah是君王ê福气。相对ê,愚戆ê人kan-taⁿ会带hō͘ kui个民族耻辱,因为chit种臣仆无尽忠职守,对灾难为何发生「一无所知」,必受tio̍h君王惩罚。

重新查询 专卷研经 箴言系列
错误回报,请联系comm[@]fhl.net