腓利门书 1章1节 到 1章25节   背景资料
Chit张phoe是使徒保罗所写ê书信中siōng简短ê一封,只有短短25节而已。是写hō͘歌罗西教会ê一位名叫腓利门信徒ê书信,主要是teh替腓利门厝里一位名叫阿尼西谋ê奴隶恳求,希望腓利门ē-tàng因为耶稣基督ê缘故赦免伊逃亡ê罪刑。Mā tùi chit张phoe中thang看tio̍h使徒保罗真尽心ê替一位弱势者参详拜托,是真值得学习ê一门信仰功课。

第1节,ná亲像使徒保罗写hō͘以弗所教会ê书信中仝款,伊自称是作耶稣基督ê「囚犯」,意思是teh指伊为tio̍h见证耶稣基督死去koh活ê信息,受掠入监狱。Chit点tùi第9节、第10节、第13节、第23节等等,koh一pái重复出现「囚犯」、「坐牢」等词,就thang确定chit张phoe是使徒保罗tī监狱中写ê。

Koh讲,伊讲chit张phoe是伊kah提摩太同齐写ê,这表示伊写chit张phoe ê时chūn,提摩太就tī伊ê身边。M̄-koh mā有另外一个可能,就是腓利门认bat提摩太,而使徒保罗用提摩太ê名,是beh hō͘腓利门知影,伊kah提摩太对phoe内beh讲起有关阿尼西谋ê事有共识。

第2节,chit节提供一个非常重要ê资料,就是腓利门ê厝已经是信徒聚会ê所在。Chit种聚会ê方式mā是早期教会siōng大ê特色,lóng是用家庭聚会ê方式开始教会chit种信仰团契。伊特别提起teh聚会ê信徒中有「亚腓亚姊妹」;伊真可能就是腓利门ê bó͘,而「亚基布」则in ê gín-á。因为阿尼西谋是in厝里ê奴隶,所以in lóng关心此事件。而且chia用「服役」一词,是因为使徒保罗ài kā传福音如同在相战仝款,表示in lóng是同齐为福音事工努力ê同伴。

第3节,这通常lóng是当时写phoe ê一种礼貌,就是tī自我绍介了后,随时有请安kah祝福ê话。

第4到5节,伊讲每pái为腓利门祈祷,因为腓利门是一个真有疼心kah信心ê人。这真可能是伊除了提供家己ê厝当做聚会ê所在,并且tī每pái聚会了后供应爱餐。另外有一个可能,就是伊不时资助贫困ê家庭,hō͘贫困ê信徒thang得tio̍h温饱,伊chit种ê疼心传到使徒保罗hia去。

第6节,特别提起「仝一个信仰内面ê团契」,chit句话teh表明大家lóng是耶稣基督ê信徒,mā lóng相信独独信靠耶稣基督是koh活ê主。因为án-ne,chiah ē-tàng藉这kah耶稣基督「连结」,享受死去koh活ê「一切好处」。

第7节,koh一pái肯定腓利门tī疼心上ê美好见证。

第8节,tùi chit节开始直到第21节,使徒保罗chit段经文中讲tio̍h伊写chit张phoe主要目的,就是beh向腓利门提起有关阿尼西谋ê事。

第8到9节,使徒保罗讲写chit张phoe是为tio̍h一项「请求」,而且chit项请求是出tī心甘情愿ê态度。换句话讲,伊beh hō͘腓利门知影,伊m̄是因为腓利门请托而写chit张phoe,mā m̄是因为某种私人ê利益chiah写chit张phoe,而纯粹是为tio̍h beh实践耶稣基督ê疼。Chia伊特别提起家己虽然贵为福音ê「大使」,却因为福音ê缘故而成做「囚犯」。这mā teh暗示腓利门必需要有仝款准备,无一定mā成做囚犯,m̄-koh可能会带来损失。

第10节,使徒保罗讲阿尼西谋乃是伊「tī基督里ê kiáⁿ」,是「灵性上ê老父」。Chit种方式ê譬喻说明一件事:信仰kah性命相连。Chia用来表明伊kah阿尼西谋ê性命是连结做伙,无法度分离。

第11节,chit节真有意思,原因是使徒保罗讲阿尼西谋逃离腓利门ê厝了后,就成做一个「无甚么路用」ê人,原因是逃离ê奴隶ná亲像一个逃犯仝款,即使koh再kā伊掠去奴隶市场贩卖,mā bē卖到好价钱。使徒保罗讲过去阿尼西谋对腓利门看起来「无甚么路用」,m̄-koh chit-má则对腓利门kah使徒保罗lóng有「路用」à。Chit-ê「路用」一词,tú好就是阿尼西谋名ê意思。使徒保罗án-ne讲,siōng主要就是beh hō͘腓利门明白,阿尼西谋改变了,而且是变kah kah过去无仝款à。伊希望腓利门会重新hō͘阿尼西谋一pái机会。

第12节,使徒保罗提起chit张phoe ê主题,就是beh kā阿尼西谋送tńg去iáu hō͘腓利门。Chia使徒保罗用「送tńg去」,chit-ê词原本是由两个动词合并做伙ê复合动词。第一个动词是「ana」,意思是teh指「回覆」,另外一个动词是「pempo」,意思是teh指「转呈」。Án-ne意思就是teh指一个属下kā一个案件转「呈」到上级去。这就有真特别ê意义了,表示使徒保罗并无想beh指导腓利门怎样处理阿尼西谋,却是由腓利门家己决定该怎样办。意思就是伊会完全尊重腓利门ê意见。

使徒保罗续落来讲阿尼西谋是带伊ê「心」同齐去ê,这就是teh向腓利门暗示,阿尼西谋ná亲像teh代表伊仝款,而伊愿意用性命担保阿尼西谋确实是无仝款à。

第13到14节,使徒保罗一直认为得tio̍h福音ê人,lóng对传福音hō͘伊ê人欠tio̍h「福音债」,而还「福音债」siōng好ê方法,就是kā福音koh再传hō͘别人,若无,就会欠福音ê债便jú chē。伊强调阿尼西谋是已经替腓利门还了这笔「福音债」,m̄-koh伊无希望chit种讲法hō͘腓利门感觉被强求,因为án-ne送tńg去阿尼西谋,hō͘腓利门家己决定这笔福音债ê还方式。

第15节,使徒保罗提出新ê看法,认为阿尼西谋虽然bat擅自逃离,看起来kah-ná是一种损失,m̄-koh chit-má阿尼西谋「甘愿」tńg去侍奉腓利门,必定比以前伊iáu未得tio̍h福音ê时,koh khah努力tī奴隶ê角色kah工作上,而且bē koh再逃离,会是一个koh khah可靠ê奴仆,án-ne对腓利门来讲的确是一件koh khah好ê报偿。

第16节,这是chit张phoe siōng重要ê一节。使徒保罗希望腓利门接纳阿尼西谋ê时,m̄-thang koh再kā伊看做是奴隶,是kā伊看做一个信仰内面ê兄弟。这真清楚teh表示:腓利门kah阿尼西谋tī信仰上lóng是使徒保罗ê「kiáⁿ」,in当然就是「兄弟」à。其实,这mā是使徒保罗beh提醒腓利门ê一点,因为tī腓利门ê厝提供给信徒聚会,而且阿尼西谋thang帮助腓利门分担福音ê事工。

第17节,chit节mā是teh回应第12节所讲ê,使徒保罗讲阿尼西谋tńg去,ná亲像带伊ê「心」去腓利门hia仝款。Tī chia,伊进一步讲,接纳阿尼西谋就等于接纳伊仝款。因为伊kah阿尼西谋tī信仰上ná亲像「父子」,是分bē开ê。

第18到19节,真有可能阿尼西谋会逃离腓利门ê厝,是kah伊做甚么错事有关,而tùi chia所提起ê「亏欠」ê用词来看,可能就是teh指金钱á是财物上ê「欠」。使徒保罗讲伊愿意负责赔偿这部分ê债务。不过,tī chia使徒保罗提醒腓利门mā欠伊ê债,就是福音ê债。因为福音乃是kah性命有关ê「财产」。换句话讲,使徒保罗认为阿尼西谋若是欠腓利门ê「金钱」之债,he是身外ê物,而腓利门欠使徒保罗ê债,则永恒性命ê债。两个之间ê大细、chē少一目了然。

第20节,使徒保罗讲「咱lóng是基督内面ê兄弟」,chit句话讲出kui个教会信仰团契ê意义,就是大家tī教会内,就ná亲像一个大家庭里ê兄弟姊妹仝款,无甚么人是甚么人ê主人、奴仆ê位阶cheng差。

第21节,伊表明对腓利门有清楚ê认bat,mā相信腓利门会听从伊ê指导。因为chit-ê缘故,伊「chiah写chit张phoe」,并且深信腓利门会用koh khah chē ê疼来接纳阿尼西谋tńg来到身边。

第22节,当使徒保罗写chit张phoe ê时,可能想tio̍h koh过无久就ē-tàng出狱tńg去,án-ne就ē-tàng去探望一下腓利门,tùi án-ne,伊ài腓利门替伊准备一个房间,chit种写法对腓利门来讲mā是一项极大ê鼓励,因为当时大家lóng感觉接待使徒保罗,是一项光荣ê事,thang接待上帝忠实ê奴仆,就是一件甜美ê事。

第23节,「以巴弗」,可能是开拓歌罗西、老底嘉,kah西拉坡里等三间教会ê一位忠实之福音奴仆(参考歌罗西书四:12—13)。伊chit时真可能就是陪伴使徒保罗tī监狱中,因为án-ne,伊讲「kah我同齐坐牢」。

第24节,chia提起同工「马可」,这是teh指约翰・马可,伊原本是Tī使徒保罗第一pái旅行传道ê时,由巴拿巴推荐同行ê伙伴(参考使徒行传十三:5),后来m̄知何故半途离开(参考使徒行传十三:13),使徒保罗bat为tio̍h án-ne事大大受气(参考使徒行传十五:37—38)。chit-má chia koh出现,表示伊koh加入使徒保罗ê行列,后来得tio̍h使徒保罗ê o-ló(参考提摩太后书四:11)。

	Á「亚里达古」则帖撒罗尼迦人,mā是使徒保罗ê好同工(参考使徒行传十九:29、二十:4,歌罗西书四:10)。

	「底马」,后来Tī使徒保罗写hō͘提摩太ê书信中,bat提起伊「贪爱现世」,离开使徒保罗,家己到帖撒罗尼迦去。Tī chia,伊则kah使徒保罗同工ê。

	「路加」,伊是一位医生,一直是使徒保罗传福音ê时ê好帮手,真少离开使徒保罗(参考提摩太后书四:11)。

	第25节,ná亲像tī头前已经提过ê,使徒保罗遵照当时写phoe ê方式,tī结束ê时koh一pái祝福收phoe ê人。


重新查询 专卷研经 腓利门书系列
错误回报,请联系comm[@]fhl.net