Chit段经文koh一pái表明kā利未人分别出来，并m̄是摩西个人ê意思，却是遵照上帝ê指示做ê。

第20到22节，chia一再重复叙述有关kā利未人分别出来，是以色列人民ê大事，大家lóng确实遵照上帝命令摩西一一地做，因为利未人ê工作lóng是kah圣幕有关，mā就是kah敬拜上帝ê礼仪相关，bē-tàng随便。

第24到26节，chia讲in工作ê年限是tùi二十五到五十岁，m̄-koh，tī第四章35节中却讲年龄是tùi三十到五十岁。有圣经学者认为：(1)可能前五年是属tī学习ê时期。(2)另外一种可能是因为战争死伤ê人siuⁿ chē，致使圣殿ê祭典礼仪工作欠缺人手。(3)mā有ê学者讲以前ê三十岁，是因为tī旷野时代ê会幕ê时期，搭帐棚ê生活，各种设备lóng真简单，人力够额。后来提早到二十五岁，是因为圣殿已经建造完成，管理范围真阔繁多，需要ê人手khah-chē，因为án-ne，kā年龄提早到二十五岁开始。由此thang知，第四章kah chit章ê资料来源，可能是因为ê时期无仝有变化。

Koh讲，第26节特别强调退休后ê利未人，iáu是ē-tàng继续襄助其他少年ê利未人关系献祭á是维护圣幕ê工作，m̄-koh bē-tàng单独行动，表示in thang m̄免承担工作ê责任。