民数记 32章1节 到 32章15节   背景资料  上一笔  下一笔
这是非常有意思ê一章,因为chit章说明以色列人民中ê吕便kah迦得chit两个支族ê人,iáu未进入迦南地就想停脚tī约旦河东岸,无想beh进入迦南应允之地à。因为in发见iáu有比迦南地khah súi ê土地thang供in牧放牲畜。

另外有一个可能,就是已经长到近四十年ê旷野漂流、征战ê时间,人心确实mā会疲乏。因为án-ne,in请求摩西准in建造城池tī迦南地外围ê约旦河东岸。Á tī第十三、十四章,记载摩西bat派十二支派ê代表先进入迦南地去窥探,结果回报ê人,除了约书亚kah迦勒主张攻打外,其余ê窥探者回报ê时,lóng讲述当地人ê魁武高大,ná亲像巨人,以色列人绝对phah不赢in。Chit种论调差不多hō͘以色列人民对进入迦南地ê心破碎。Mā为tio̍h chit-ê tāi-chì,以色列人民确实是付出真大ê代价,上帝伸手严惩in,hō͘年满二十岁以上ê人lóng无法度进入迦南地。因为án-ne,当吕便kah迦得两支派ê代表来见摩西,讲in想停留tī约旦河东岸ê时,摩西确实是相当不满意ê。M̄-koh in理性地解释原因,表明kah惊惶「巨人」ê事无关,却是确实看tio̍h迦南地外围约旦河东岸ê雅谢kah基列之地真阔,koh khah适合in牧放牲畜。摩西后来准in ê条件是:in一定tio̍h带头冲锋陷阵攻打迦南地,帮助其他十个族占领迦南地以后,in chiah thang tńg来东岸khiā起。

M̄-koh,这有一个基本观念一定tio̍h注意:若是无愿意进入迦南应允之地,只因为看见约旦河东岸ê美,这就等于藐视上帝ê赐福,ná亲像以扫看轻大kiáⁿ名份仝款(参考创世记廿五:34)。

值得注意ê是,除了第1节kā吕便排tī第一位外,以后lóng是迦得排tī吕便ê头前,á吕便是雅各ê大kiáⁿ,这有可能是当做者写此资料ê时,迦得支族ê发展已经大大超过吕便支族ê势力à。

Chit段经文一开始就讲吕便kah迦得chit两支派,tī牲畜牧育ê工作上真有成就,牛羊真chē,chit点tī旷野漂流时间,确实是件非常无容易ê事。这mā讲出上帝对in ê赐福。In mā看见就tī in暂时停留ê「雅谢kah基列」chit两个地区,真「适合牧放牲畜」。

第2到5节,吕便kah迦得chit两支派ê代表就去见摩西、以利亚撒kah以色列各支派ê领袖。In表示想beh留tī约旦河东岸chiah-ê地区,「mài叫阮过约旦河去,tòa tī hit-pêng」,这是in提出ê建议,mā是in ê心愿。

第6到10节,摩西一听见chit两支派ê代表提出chit种意见了后,随时表示看法:tùi in ê祖先(已经往生)派出代表去侦探迦南地tńg来,就表示无想beh进入,hit时已经有过一pái大大影响tio̍h kui个民心士气。chit-má in提出chit种要求,mā是仝款,kah in ê祖先仝款。

第11到15节,摩西提起in祖先就是因为chit-ê缘故,害所有年满二十岁以上ê人lóng无办法进入应允之地。只有两个人就是犹大支派ê迦勒kah以法莲支派ê约书亚坚持听从上帝ê旨意,chiah保存性命落来。摩西认为chit-má吕便kah迦得所提出ê,tú好是重蹈in祖先所犯ê 错误,「成做新一代ê罪人」,这会引起上帝ê忿怒,真可能引起另一pái大量死亡ê灾难。摩西提出相当严厉ê警告。

重新查询 专卷研经 民数记系列
错误回报,请联系comm[@]fhl.net