民数记 24章1节 到 24章13节   背景资料  上一笔  下一笔
Chit章主要mā是由两首诗歌组成(第3到9节、第15到24节)。这两首诗歌mā是巴兰ê预言,说明上帝对伊ê子民以色列坚守所立ê约,hō͘以色列人民强盛,征服摩押以及附近ê族群。然后tī第20到25节,连续预言亚玛力人、基尼人,以及后来ê亚述帝国lóng会灭亡。仝款ê,巴兰一再重述伊ê职责是:「上主所讲ê,我就照án-ne 讲(全民版)」(第13 节)

Chit段经文是继续第廿三章27到30节所记载ê,摩押王巴勒要求巴兰继续讲对以色列人民诅咒。Á巴兰iáu-koh照规定ài巴勒排设祭坛,hō͘伊通过献祭走chhōe上帝ê旨意。

第1到2节,tùi chit两节thang看出巴兰前两pái lóng是先走chhōe上帝hō͘伊预兆,好明白上帝ê旨意。chit-má经过两pái了后,伊已经知影上帝就是beh赐福hō͘以色列人民,因为án-ne,虽然巴勒王带伊上比珥山顶,伊iáu是俯视旷野ê以色列人民,就tī chit时,「上帝ê灵支配tio̍h伊」。换句话讲,前两pái伊讲,是透过献祭所得tio̍h ê预兆来讲话,chit-pái就m̄是án-ne,是上帝ê灵亲自kah伊同在ài伊讲话。

第3到9节,这是第一pái上帝ê灵感动巴兰讲。Tī chit段诗歌中强调:

一,上帝是全能者。因为是全能者,一般人ê能力无法度左右他ê旨意。

二,以色列民族就是上帝拣选ê子民,看起来就是美,而且充满tio̍h上帝赏赐ê能力。

三,是上帝带领in出埃及,并且hō͘ in大有能力,所向无敌,ná亲像凶猛ê狮子仝款。

第9节ê后半句thang对照创世记第十二章3节,上帝呼召亚伯拉罕出哈兰ê时所hō͘ in ê应允。Ē-tàng看出耶和华上帝是一个守约ê上帝,他坚持所立ê约是永远ê约,永bē改变他对拣选子民ê疼kah祝福。

第10到11节,chit时摩押王巴勒受气à,因为连续三pái,巴兰m̄-nā无诅咒以色列人民,颠倒,lóng是hō͘ in以色列人民祝福。就án-ne伊决定取消本来答应beh hō͘巴兰ê报酬。

第12到13节,chit两节mā是回应第廿二章18节。巴兰真清楚回答巴勒,表示就算有kui个王宫ê财宝hō͘伊,伊mā是一定tio̍h按照上帝ê意思传达信息。

「我只有ē-tàng讲上主ài我讲」,chit句话是tùi第廿二到廿四章ê中心主题。表示忠实tī上帝ê人,讲上帝ài伊讲。Bē因为有任何诱惑力,á是迫害力,就改变上帝ài伊传达ê信息。


重新查询 专卷研经 民数记系列
错误回报,请联系comm[@]fhl.net