Chit章mā是继续巴兰ê故事。Ná亲像tī第廿二章20 kah 35节记载上帝对巴兰所讲ê：「Chiah-ê 人若来叫你，你就起来kah伊去，总是，我所kā 你讲ê，你tio̍h 遵thàn。(全民版)」后来巴兰见tio̍h摩押国王巴勒ê时，就是án-ne对巴勒讲：「上主所讲ê，我就照án-ne 讲(全民版)」」（第12节）á chit-ê句话就成做第廿三章ê中心信息。

Chit章是用两首诗歌构成ê，主要内容lóng是teh重述上帝坚守他对以色列人民所立ê约，beh赐福hō͘以色列人民，hō͘ in ê kiáⁿ孙chē kah ná天顶ê星，海边ê沙。上帝beh保护雅各ê kiáⁿ孙以色列人民，hō͘以色列chit-ê国家强盛ná亲像强悍ê公狮。

巴兰是hō͘巴勒邀请来诅咒以色列人民ê，chit-má却一再唱出上帝beh保护以色列人民ê诗歌，这当然致使巴勒不爽快，伊希望巴兰诅咒以色列人民（第11节）， 至少巴兰若无法度诅咒以色列人民，mā无法度祝福in。M̄-koh，巴兰真清楚kā巴勒讲，伊「只有ē-tàng讲上主ài伊讲」（第12、26节），这mā是先知siōng基本，mā是siōng重要ê职责（参考列王记上廿二：14）。如果先知不传达上帝，á是无忠实tī上帝ài伊讲，chit种先知就无算是先知。

第1到4节，巴兰ài摩押王巴勒先建造「七座祭坛」准备作烧化祭ê路用。烧化祭ê用品是「七只公牛kah七只公羊」。Chiah-ê「七」，lóng teh表示用siōng好ê方式，只为tio̍h beh得tio̍h上帝ê启示，á是见tio̍h上帝ê面。
值得注意ê是第3节，巴兰tī chia对巴勒讲，上帝「启示」伊甚么，伊就kā伊讲甚么，chit句话kah先知米该雅所讲ê仝款。

第5到6节，果然上帝回应了巴兰献祭，对伊讲话。

第7到10节，tī chit段诗歌中thang清楚看tio̍h，巴兰并无讲出诅咒以色列人民，伊确实kā上帝启示伊传达出来，内容是上帝坚守他对以色列人民ê应允。特别是tī第9节，巴兰讲出以色列民族是上帝特别拣选出来ê族群，kah其他族群有区别。因为án-ne，tī第10节ê下半句并m̄是上帝ê启示，却是巴兰听上帝启示伊传讲了后，心中有真深ê感触，mā希望家己ná亲像以色列人民仝款，享有上帝特别ê赐福。

注意第8节，上帝ê奴仆一定tio̍h忠实tī上帝。上帝无ài伊讲，伊就无法度讲。