民数记 16章1节 到 16章15节   背景资料  上一笔  下一笔
Chit章是由两组事件编辑而成ê,lóng是记载有关以色列人民对摩西ê不满。一则记载带头反抗摩西ê是利未人以斯哈ê kiáⁿ可拉,另外一组是大坍kah亚比兰,比勒ê kiáⁿ安,以及另外两百五十个有名望ê领袖,in公开叛变摩西kah亚伦ê带领。结果引起上帝极大ê忿怒,连带ê为以色列人民带来瘟疫ê惩罚,结果死亡ê人数相当chē。

Chit段经文讲述摩西带领以色列人民tī旷野漂流ê过程中,tú-tio̍h真chē波折,除了来自以色列人民每tú-tio̍h困难就埋怨in外,就是来自家己厝内部ê不满。前有家己ê阿姊美莉安kah兄哥亚伦对伊ê不满,chit-má是利未支族哥辖家族ê人背叛。Chit种否定摩西带领ê权威,mā bat发生tī第十四章4节。

第1到3节,chia提起带头背叛摩西ê带领,就是哥辖家族ê 可拉,kah伊仝伴ê有吕便支派来便利押ê两个kiáⁿ大坍kah亚比兰,以及比勒ê kiáⁿ安,另外iáu有两百五十位有淡薄á有名望ê领袖。In成群结队地来到摩西kah亚伦面前,公开挑战in ê权威。In背叛ê原因,根据第9到11节ê记载,是kah摩西制订出来ê制度,就是亚伦家族做祭司,á利未人则帮助祭司者有关。Tùi án-ne认为摩西kah亚伦是「高抬家己,高过上主ê会众」。其实,摩西所做ê lóng是照上帝所命令。因为án-ne,若是in对chit项制度不满,mā m̄是摩西ê问题,却是上帝ê旨意。Á想beh叛变者,lóng会用真堂皇ê理由,ná亲像可拉tī chia所讲ê「全体会众lóng是属tī上主ê」,而且强调上帝kah in同在。

第4到8节,可拉所代表ê,并m̄是个人,却是有一阵利未人相挺。因为án-ne,摩西ài in隔工带tio̍h香炉,内面装tio̍h火炭kah香,直接到上帝ê祭坛前,摩西用chit种方式beh证明,到底上帝是拣选甚么人?照利未记第十章1到2节ê记载,亚伦ê kiáⁿ拿答kah亚比户,就是因为无按照规矩进入祭坛,the̍h-tio̍h香炉圣满了火,烧了凡俗ê香献hō͘上帝,结果就死tī祭坛边。Chit-má摩西ài可拉mā带chiah-ê物件,看家己是m̄是hō͘ 上帝拣选ê祭司。

第9到11节,tùi chit段经文thang明明确知影可拉认为in利未族人ê地位比亚伦ê家族当祭司khah低。In ê看法牵涉tio̍h对tī圣幕祭典各项礼仪,扮演ê角色轻重ê认知,认为利未人并无比亚伦ê kiáⁿ孙差,ē-sái讲是tī以色列人民中ê地位却比祭司阶层ê人低。M̄-koh摩西认为chit种观念是错误 ê,hō͘ 上帝拣选出来参与侍奉祭祀敬拜礼仪,无论是担任toh种工作,lóng是一种荣誉,应该看做是siōng重要ê大事。因为án-ne,摩西kā in谴责chit种行为等于是背叛上帝,原因是摩西并m̄是制度ê规划者,伊全部lóng是照上帝吩咐ê去做。

第12到15节,吕便家族来便利押ê kiáⁿ大坍kah亚比兰chit两个人tī chia对摩西所讲,其实真清楚,就是拒绝接受摩西ê领导。摩西ài in mā到圣幕ê祭坛去,in就公开表示拒绝。并且认为摩西带领in离开肥ê埃及,进入甚么lóng无ê旷野。摩西听了后大为受气,伊向上帝祈求, mài接受chit家族献祭ê祭品。同时表明家己并无tùi献祭ê物件中领受过in奉献ê祭品。

重新查询 专卷研经 民数记系列
错误回报,请联系comm[@]fhl.net