Chia记载chiah-ê探子tńg来后，in向摩西、亚伦，kah全体以色列人民报告迦南地勘查后ê实情，mā同时强烈主张mài入去迦南地。Tī所有chiah-ê探子中，除了迦勒kah约书亚两人主张应该tio̍h进入迦南地外，其余十个lóng表示反对。

第25到29节，in进入迦南地，共计tī内面勘查长到「四十工」，这表示勘查到非常详细ê意思。In kā带tńg来ê果子hō͘大家看，并且证实迦南地确实是一个「流奶kah蜜ê肥土地」。In同时强调当地居民「真强悍」，而且有巨人亚衲ê kiáⁿ孙。In mā提起六个族群名，包括有亚玛力人、赫人、耶布斯人、亚摩利人，kah迦南人等。Á in ê城墙是「koh大koh坚固」。单单由城墙ê高大来看，就知影当地ê文化、国力lóng是真进步ê，因为城墙表示建筑ê科技，kah文化ê记号。Án-ne，想beh进入占有hi̍t 所在，是连想lóng m̄免想à。

第30节，犹大支派ê代表迦勒，除了安抚chiah-ê表示悲观ê代表外，伊iáu是坚持主张，chit-má就应该上去占领迦南地，并且强调以色列人民有够额力量。

第31到33节，m̄-koh chit群代表iáu-koh有真悲观ê想法，认为无可能进入而且占有迦南地。为tio̍h beh阻止chit项进入迦南地ê计画，这十个族群代表就到以色列人民中间去散布而且夸大一kóa情景，he就是认为当地ê物产无够饲当地人，其实，一截葡萄枝需要两个人扛，就表示物产丰富，够额有chhun。In甚至描写以色列人民比起巨人亚衲ê kiáⁿ孙，有ná草蜢á仝款ê渺小。Chit种传言确实是影响tio̍h民心ê安定。因为in就是为tio̍h beh进入迦南地á离开埃及，若是进入迦南地mā仝款成做当地人民ê奴隶，以色列人民一定感觉相当ê郁卒。