Chit章是记载发生tī摩西厝里ê事件。原因是摩西ê阿姊美莉安kah摩西ê兄哥亚伦，lóng认为in mā thang像摩西仝款领受上帝直接hō͘ in ê信息。Chit件事引起上帝ê忿怒。

Chit段经文讲述美莉安kah亚伦对摩西ê不满。

第1 kah 2节，事件ê开始，讲因为摩西娶「一个古实ê cha-bó͘-gín-á做bó͘」，引发美莉安kah亚伦ê批评。古实，是含ê kiáⁿ孙（参考创世记十：6）。In ê不满只不过是一个藉口而已，真正原因是tī第2节，因为嫉妒摩西tī以色列人民中ê地位日渐高升有关。虽然亚伦是有「大祭司」ê高尚位阶，m̄-koh tī以色列人民中ê地位，iáu是远不及摩西ê角色。上帝对摩西ê重视，tùi出埃及记第四章16节，上帝对摩西讲chit种话：「亚伦会替你对人民讲话，伊会对你准做嘴，你会对伊准做上帝。(全民版)」chit节真清楚，亚伦ê角色其实是tī摩西ê支配之下，ná亲像利未人是tī祭司ê指挥之下仝款。

第3节，chit节讲出摩西ê为人是「比世间任何一个人lóng谦卑」，连上帝lóng欢喜kah伊面对面讲话，ē-tàng得tio̍h án-ne恩典ê人确实无chē。