Chit段资料真可能是后来加入ê。摩西恳求伊êbó͘ 舅何巴作向导，帮助伊带领以色列人民行chit段漫长ê旷野旅途。

第29节，何巴，tī chia讲是米甸人，tī士师记第一章16节讲是基尼人。这两族ê人lóng khiā起tī旷野，游牧民族，而且有bē少人相混杂khiā起做伙。In对tī炼铜ê技术真有心得，后来以色列人民因为得罪上帝，结果有真chē人因为án-ne被毒蛇咬死，上帝ài摩西铸造铜蛇挂tī柱á顶，hō͘以色列人民看见铜蛇á得痊愈（参考民数记廿一：4—9）。Á这铜蛇真可能就是出tī基尼人ê手。

Tī头前讲有云彩当做in拔营启动á是停止扎营ê记号，m̄-koh，beh行向tó一个所在，是需要对旷野熟悉ê人带路。摩西chhōe-tio̍h对这方面相当有经验ê「小舅子」来帮忙，mā thang看出伊ê用心kah智慧。

第30到32节，何巴是tī旷野出世、长大ê人，对旷野环境甚熟，因为án-ne，有伊带路会koh khah清楚tī tó一个所在扎营koh khah妥当。