尼希米记 1章1节 到 1章11节   背景资料  下一笔
尼希米记第一章1节踏话头án-ne写tio̍h:「以下ê记载是哈迦利亚ê kiáⁿ尼希米ê事迹。」如果照chit句话来看,尼希米记kah以斯拉记是两本无仝ê经册。M̄-koh,如果继续看落去,tùi「亚达薛西做波斯皇帝ê第二十年基斯流月」chit句话就会发见,即使尼希米记kah以斯拉记是两本经册,m̄-koh记载ê内容却是仝款时代背景ê事。因为án-ne,有圣经学者认为这是一本连做伙ê「上、下」经册。Mā有ê kā它合并为一卷,亲像《希腊文译本》(koh kā它称做《七十士译本》)就是。

照尼希米记第二章1节kah 7节ê记载,尼希米是tī亚达薛西皇帝执政ê第二十年(一:1)申请回乡,而tī隔年成行,这是主前445年。Á以斯拉记第七章7节soah讲以斯拉回乡是tī亚达薛西皇帝在位ê第七年,mā就是主前458年。

第1节,chit节真简单ê地绍介尼希米是「哈迦利亚ê kiáⁿ」,而这「哈迦利亚」ê名kan-taⁿ出现tī chit所在,因为án-ne,背景资料lóng m̄足。「尼希米」chit-ê名ê意思是「耶和华安慰」。

Chit节讲尼希米tī「亚达薛西皇帝ê第二十年」,这mā是主前446年,而「基斯流月」是希伯来历ê九月,mā就是chit-má ê年历十一月中旬到十二月中旬。Chit位亚达薛西皇帝一世,在位期间是主前465到424年。Chit时ê尼希米iáu停留tī波斯ê「京城书珊」,因为伊hit时是波斯皇帝ê「酒政长」,mā就是tī皇宫中工作。这工作ê职责是专门teh服事皇帝lim酒ê,主要工作就是tī皇帝lim酒chìn前,先tam味beh hō͘皇帝lim ê酒,并确认酒是安全无毒。因为án-ne,kah皇帝ê关系非常密切,每餐一定tio̍h tī皇帝身边。虽然伊ê地位并m̄是非常重要,m̄-koh因是常常陪tī皇帝身边,影响力必定bē输位高权重ê大臣。

第2到3节,尼希米ê兄弟哈拿尼kah一阵tùi耶路撒冷来ê人,tī书珊城相tú,伊向in探听有关故乡ê情景,chiah知影原来耶路撒冷城墙破损,而且犹太同胞受tio̍h侮辱。

Chit节经文ê背景thang参考以斯拉记第四章,发出命令禁止tńg去故乡ê犹太人继续施工建造耶路撒冷城墙ê,就是chit位亚达薛西一世。理由是犹大省长kah书记以及其他相关ê人员,bat写奏册hō͘亚达薛西皇帝,认为chiah-ê犹太人修筑耶路撒冷城墙,就会「m̄肯纳各种捐税」,致使国库损失,并且认为khiā起tī耶路撒冷城ê犹太人「一直是叛逆ê,自古以来,一直损害列王kah各省ê省长。Chit-ê城ê居民一直lóng是真oh治理ê」(参考以斯拉记四:12—16)。结果亚达薛西皇帝一接tio̍h奏摺,马上就下命令,ài省长利宏kah书记伸帅,阻止犹太人重建城墙,in「用武力逼kah犹太人停工」(以斯拉记四:21—23)。

第4到11节,chit段经文是尼希米听tio̍h了后,非常「艰苦心得流下目屎」,tī「悲伤几nā工」中间,伊用禁食方式向上帝祈祷ê内容。

Tī chit段祈祷文中,伊先认罪,并为所有以色列人民认罪,而且承认tùi祖先开始就犯错,chit种错,就是对上帝无够忠实,无遵行上帝ê旨意。续落来,伊祈求上帝会记得bat应允过摩西所讲ê,只要以色列人民悔改认罪,愿意遵行上帝ê旨意,上帝会tùi世界各地,kā四散ê以色列人民带领tńg来chit-ê应允hō͘以色列人民khiā起ê迦南地敬拜上帝(参考申命记三十:1—5)。伊恳求上帝垂听伊kah所有敬畏上帝ê人ê祈祷,hō͘波斯皇帝对伊特别开恩。这表示尼希米心中计画进行一项特别ê工作,chiah需要祈求上帝hō͘波斯皇帝会特别对待伊。

重新查询 专卷研经 尼希米记系列
错误回报,请联系comm[@]fhl.net