弥迦书 3章1节 到 3章12节   背景资料  上一笔  下一笔
续接第二章13节所提起ê,上帝kā亲自牧养他ê子民,beh带领in重新tńg来到自由,teh过快乐、充满性命力ê日子。相对ê,tī chit第三章则清楚指出以色列人民会堕落ê原因,to̍h是kui个社会充满tio̍h虚假,chiah-ê lóng kah当ê时社会ê领袖有密切关系,包括君王(统治者)kah宗教领袖(先知),in lóng m̄真实,却是专门做欺骗ê工作带来ê结果。

    Tī先知弥迦之作品中就thang发见kui个社会充满tio̍h假先知,in ê特色to̍h是为tio̍h beh「饲腹肚」而讲假预言,讲坦白to̍h是kā先知ê工作当做一种职业,chit种先知是只ài有人出钱,伊就讲in欢喜听ê话,只为tio̍h beh讨好人。这to̍h是先知阿摩司ê时代所tú-tio̍h ê情景(参考阿摩司书七:14—15)。Thang án-ne了解:真正先知,并m̄是家己想当先知to̍h是先知,先知mā无法度靠学习变成先知。先知是传讲上帝ê信息,所以上帝会亲自启示他所拣选ê奴仆先知。若无得tio̍h上帝ê启示,却假借上帝ê名义发表任何言论,chit种人to̍h是属tī假先知。假先知会行神迹奇事(参考马太福音七:21—23),m̄-koh m̄-thang bē记得,in所传讲ê话kan-taⁿ会迷惑人心远离上帝而已,对人ê性命是m̄是得救并无甚么意义thang讲。

第1节,先知弥迦有真强烈ê声音teh谴责当ê时ê社会已经失去公义。Tī第二章1到2节伊指出当ê时hiah-ê有权势ê贵族、达官显要,看tio̍h欢喜ê土地、房屋,就想出所有ê办法beh侵占,mā因为án-ne,所以「无一个人ê家庭á是财产是安全ê」(参考二:2b)。现先知弥迦讲一个统治者应该提供「正义」ê原则。所讲「正义」,简单地讲to̍h是「公平」,大家tī上帝面前lóng仝款有性命ê尊严。

第2到4节,chit段经文thang清楚看出先知弥迦指出伊看见ê景象,to̍h是司法人员所做出来ê,ná亲像活活地kā人ê皮「剥」落来,kā chit种人ê肉「剔下」khǹg入去锅里煮,mā像残酷ê屠夫「phah碎」了人ê「骨头」仝款ê恶质。先知弥迦真清楚指出,chit种人无论怎样祈祷,上帝lóng bē听,因为in m̄-nā无替受冤屈ê人伸冤,反却是趁机会欺负弱势者。因为上帝是公义ê,他bē眼睁睁地看tio̍h他ê子民受tio̍h欺压而不闻无问。

第5到6节,chit段经文是针对hiah-ê专门迷惑上帝子民ê假先知而传出上帝beh惩罚in ê信息。Tī chit段经文中,先知弥迦提起有kóa先知是为tio̍h混一嘴饭就乱讲话,chit种先知to̍h是名符其实ê假先知。Chiah-ê假先知会用「战争恐吓」人民,只因为为人民无想beh供养in。M̄-koh上帝对付chiah-ê假先知ê方式,to̍h是hō͘ in koh khah án怎都无「好日子」thang过。M̄-nā án-ne,mā bē有「异象」thang看,而且「讲bē出预言」。Chiah-ê lóng teh表示上帝已经弃sak chiah-ê人,因为chiah-ê假先知竟然是用占卜、巫师用预测ê方式,试beh明白性命是m̄是安危,上帝就用惩罚chiah-ê巫师kah占卜ê人所得tio̍h ê惩罚仝款,hō͘ in「蒙羞」。

    第7到8节,chit两节tú好呈现对比;tī第7节讲hiah-ê假先知á是行巫术ê人,必定听bē-tio̍h上帝tńg来应in ê话kah祈祷,因为in是欺骗上帝子民ê人,上帝当然bē听in ê祈祷。Á第8节则先知弥迦明确表示家己ê身分—上帝ê奴仆,有上帝ê灵kah伊同在。先知弥迦讲家己充满tio̍h「主ê灵kah 能力」,先知以赛亚bat传出上帝拣选他ê奴仆ê时,会以他ê灵充满被拣选ê人(参考以赛亚书四十二:1)。有上帝ê灵充满ê人,必定会充满「正义感kah勇气」,会明确地指出人民ê错误,所犯ê「罪」。却m̄是kan-taⁿ会讲咱人欢喜听ê话。Hō͘徒保罗就讲伊不讲「谄媚ê话」,「免讨人ê欢喜,只求取悦hit位察验」人心ê上帝(参考帖撒罗尼迦前书二:4—6)。

    第9到11节,chit段话koh一pái tńg来到南国iáu大ê执政者身上;先知弥迦kā伊谴责们胡作非为ê事实。先知弥迦Tī chit段预言中就真清楚指出南国iáu大ê官员ê问题,to̍h是in侮辱上帝ê名,因为in并无按照诚实来治理国家,却一koh再以污秽、lah-sap ê手段teh侮辱上帝ê名。咱tī chit段经文中看tio̍h几件恐怖ê行为:一是:憎恶正义、颠颠倒是非(第9节);二是:tī耶路撒冷城有残酷刣戮ê行为,是暗刣ê行踏,是非法ê,无经过公平审判ê(第10节);三是:法官接受o͘-se,这是颠颠倒是非ê主要因素(第11节a句);四是:宗教领袖败pháiⁿ了信仰基础-—kan-taⁿ知影图谋财利(第11节b句)等。当先知弥迦指出南国iáu大官员有顶面所讲chiah-ê问题了后,随时指出上帝teh beh毁灭chit种国家,准讲in用「上帝之城」所称呼ê耶路撒冷城mā仝款,因为in已经kā上帝ê城变成刣害无辜ê性命ê城。Ná亲像玛the̍h西王所做仝款ê恶事,引起上帝ê忿怒(参考列王记下廿一:16)。

    第12节,「锡安山kā像田地被翻动;耶路撒冷会变成废墟」,chiah-ê后来lóng tī主前586年巴比伦帝国攻入耶路撒冷了后验证à。

重新查询 专卷研经 弥迦书系列
错误回报,请联系comm[@]fhl.net