马可福音 7章1节 到 7章13节   背景资料  上一笔  下一笔
第1节开始就提起有tùi耶路撒冷来ê经学教师kah法利赛人,in tàu阵来见耶稣,这表示耶稣tī加利利所传上帝国ê信息,kah伊所做ê事,已经引起当时宗教众领袖ê注意,而且这m̄是第一pái,tī第三章22节mā bat经提过,因为án-ne,这ē-sái讲是另外一波tùi权威阶层派出来调查ê代表。

第2节,这是引发议论ê问题—耶稣ê门徒有人用「无清气ê手食饭」,chia强调是「无亲像法利赛人hit种先洗手」。Chit句话表示chit种「洗手」ê规矩并m̄是出tī摩西律法,却是法利赛人附加上去ê。法利赛人加添了真chē传统风俗变成一定tio̍h遵守ê规矩,结果jú加jú chē,甚至chē到hō͘人感觉窒碍oh行(参考马太福音廿三:4)。

Siōng早规定tio̍h洗手,是针对祭司ê要求,因为in tio̍h主持献祭ê礼仪,需要沐浴洁身。M̄-koh,后来却演变成一般人民tī食物件chìn前tio̍h洗手,表示所食ê物件mā因为手ê清气,内心mā清气。

第3到4节,chit两节是马可福音作者进一步解释犹太人chit种洗手kah洗涤器物ê规矩。需要洗涤tùi市场上买tńg来ê物件,是因为in认为市场上ê物件真容易被外邦人ê手摸过á污染,因为án-ne,siōng好经过洗涤洁净了后chiah用,án-ne chiah会hō͘家己tī生活上ê各方面lóng保持「洁净」。

第5节,chiah-ê宗教领袖直接指责耶稣无教导他ê门徒遵守传统ê风俗,就是m̄-tio̍h,ná亲像第二章18节质疑伊无教导门徒禁食仝款。

第6到7节,耶稣引用以赛亚书第廿九章13节,说明耶稣时代ê犹太人宗教领袖,in kah先知以赛亚时代ê以色列人民仝款,lóng是kan-taⁿ求表面,无真实ê内心,意思就是假冒为善。Á koh khah严重ê是用家己来代表上帝ê命令,án-ne非常危险mā真无应该。

第8到9节,耶稣强调一定tio̍h kā人ê传统风俗,kah上帝ê命令作一个明确区隔出来,bē-tàng混淆。

第10到13节,tī chit段经文中,耶稣举十诫ê第五诫有关「tio̍h孝敬父母」chit条诫命为例,指出chiah-ê宗教领袖m̄-nā严重曲解诫命之本意,而且错误地teh教导民众,tú好显示了in ê贪婪。原因是in认为奉献hō͘上帝,比奉养父母koh khah重要。其实,一个真正爱上帝ê人,一定会tùi孝敬父母开始做起。M̄-koh in认为上帝比父母重要而且大,因为án-ne,kā应该奉养父母ê钱á是物件,the̍h去献祭,表示家己敬虔,耶稣认为chit种态度并无正确,讲穿了,in是teh逃避作kiáⁿ ê责任。这就是in往往kā家己ê意思加tī摩西律法顶面来解释,当做是摩西律法ê条文,要求人民mā遵守。


重新查询 专卷研经 马可福音系列
错误回报,请联系comm[@]fhl.net